Hosea 13 - MUKANDA USANDU WA ZAMBI 1975

¹ Ha kuhanjika Eframe, malunga achikimine; wanangamine mu Izalele; alioze wahile ha mulonga wa Mbale, wafwile.

² Ni haliapwila kanaliwezela uvulumunyi weka ni weka nikulilingila tuponya twa kuzuzulula, ni mahamba a kulinga ni utotombo ni prata yo. Yeswe, milimo ya yilangaji. Shihilenu yitapo kuli wano ngwo, Atu kakumbejala ana a ngombe!

³ Kashika mapwa ngwe mbundu ya chimene; hanji ngwe mume uze wakuma washi; ngwe yizungu yize yakuhehuka ku chizungwilo hanji ngwe mwishi unakatuka ku njanela.

⁴ Yami nguli Yehova Zambi yenu chize ku chifuchi cha Engitu. Kunwanyingikine Zambi niumwe shina yami, kukushi niumwe chilamwina shina yami wika.

⁵ Yami nanunyingikine mu puya, mu chifuchi cha pwila.

⁶ Alioze muze halia hakuta, Mayuka, mba mbunge jo jalifujile; kashika anguvulamine.

⁷ Kashika ni yami mungupwa kuli ayo ngwe ndumba; ngwe changwi mungujikinyina ku sesa lia jila.

⁸ Mungwalundumukina ngwe ursu yoze hamwiya ana jenyi. Mungwapula pambo; kwenako mungwaha ngwe ndumba; ngwe ngongo kakwapapulula.

⁹ Enu A-Izalele mungunwonwona mba iya manukwasa?

¹⁰ Mwanangana wenu yoze manulamwina kulihi ali? Alemu jenu akwa kunufunga— waze nwambile ngwenu, Twehe mwanangana ni alemu?

¹¹ Hinanwaha mianangana ni utenu wami, mba hinaachiza ni ufwatulo wami.

¹² Uhenge wa Eframe haukasa; shili yenyi hamutulikilayo.

¹³ Misongo ya kumusema hiyamuheta, alioze aye mwana keshi mana, mumu haliapwila kasolo kupalika ku utuhukilo wa chimbi.

¹⁴ Mungwakula ku tachi ja Shiole? Mungwahula ku kufwa? Ena kufwa, yilungo ye yilihiyo? Ena Shiole, kwonwona che Chilihicho? Keke hiyanguswamina ku meso jami.

¹⁵ Chipwe matatuka hakachi ka ayayo hindu fuji ya ku Chivumbuko muyiza, fuji ya kuli Yehova ni kukatuka ku puya. Mba shima lienyi muliuma; fuji lienyi lia meya mulipwa lia chau. Kumuyikahupa yuma yeswe yilemu ku zuwo lienyi lia kutulikila upite.

¹⁶ Samaria mambata uhie wenyi, mumu hakatukila Zambi yenyi. Makafwa ni katana, ana jo akepe makaahwotola ku mitwe ni tufumba two makaahangula.