Hosea 12 - MUKANDA USANDU WA ZAMBI 1975

¹ Eframe kakulia fuji yamokomoko; kakukaula fuji ya ku Chivumbuko tangwa lieswe. Kakwokesa mahuza ni upupilo; kakulikata ni Asuria; kakutwala maji ku Engitu.

² Yehova kanasumu Yunda, kumakalamba Yakomba kastigu ya kulita ni ndako jenyi. Kumakamufwetesa nikulita ni yitanga yenyi.

³ Mwe mu jimo yakwata yayo ku kashijino, muze hapwa lunga yalitachika ni Zambi.

⁴ Yalinwa ni mungelo, yakumba; yalila, yafupa vumbi lienyi. Yatakana ni Zambi ku Mbetele; kwenako Zambi yahanjika nenyi—

⁵ Yehova Zambi-ya-Tujita, mwe Yehova jina lienyi ngwenyi,

⁶ Chocho yena, ku tachi ja Zambi ye, hiluka, lalaminya ku zango ni upatwilo wa kulita; mba matangwa eswe twaminyina Zambi ye.

⁷ Aye kapwa mukwa kusepa wa mbalansa ja kwonga, kakuzanga kupinjisa.

⁸ Eframe hanambe ngwenyi, Ewa, alioze nguli pichi, hinapita yuma yinji ya yami mwene. Alioze upite wenyi weswe kuuchi kuhasa kufwika uhie wenyi nilimwe tangwa.

⁹ Ami nguli Yehova Zambi yenu chize ku chifuchi cha Engitu. Mungukanutwamisa cheka nawa mu mbalaka ngwe ha matangwa a yiwanyino ya kufunjika.

¹⁰ Yami nahanjikile kuli aprofeta; yami nokesele usolwelo, nikuhana yishima ku makanwa ja aprofeta.

¹¹ Nyi uhenge muuli mu Ngiliate kumakalumuka amokomoko. Nyi malambula kuji a ngombe mu Ngilingali makapwisa yilumbilo yo ngwe milumba ya mawe ha mihanga mu minda.

¹² (Yakomba yachinyina ku chifuchi cha Arame; kwenako Izalele yalingila milimo hali pwo, yafunga mapanga akazuke pwo.)

¹³ Kuli profeta Yehova wachijile A-Izalele ku Engitu, ni kuli profeta waafungile.

¹⁴ Alioze Eframe hehia chikolo kashika Mwene wenyi mamuhichika ni mulonga wenyi wa manyinga hali iye. Mahilwisa hali iye nawa sau lienyi.