Hosea 11 - MUKANDA USANDU WA ZAMBI 1975

¹ Muze Izalele wapwile mwana namuzangile. Ku Engitu nasanyikine mwanami wa lunga.

² Cheswe nalikolezele kwasanyika o yalikoleza kukatuka kuli yami. Yawezela kushihila yitapo Ambale nikwochela insensu mahamba.

³ Chipwe chocho yami mwene nalongesele Eframe kwenda. Naakangayikine mu moko jami hindu kanyingikine yami naawukile.

⁴ Naasongwelele ni mihipu ya keke, ni malenge a zango. Nalumukine kuli ayo ngwe yoze makokolola kanga ha mbangachi jo. Nahetaminyine kuli ayo nikwalisa.

⁵ Kumakahiluka nawa ku chifuchi cha Engitu, alioze Ka-Asuria makapwa mwanangana wo, mumu katayile kuhiluka kuli yami.

⁶ Katana makatenukina yihunda yo, nikumanununa njalo ja mapito jo ja yihunda, nikwaonwona mu mbonge jo.

⁷ Atu jami hasa mbunge jo akangwehuke, kashika hinaafunjikila kanga mba niumwe maachizayo.

⁸ Ena Eframe, kuchi munguhasa kukwecha? Ena Izalele, kuchi munguhasa kukukunjika? Kuchi munguhasa kukupwisa ngwe Andama? Kuchi mungukulinga ngwe Zepoime? Mbunge yami kuyatayile muchima; keke yami yinaliwezela chivukuminya ni vumbi.

⁹ Chichi kulinga utenu wami usasu; chichi kwonwona nawa Eframe. Mumu nguli Zambi, hi nguli mutu ko, yami mwe Musandu mukachi kenu, kashika chichi keza mukwonwona.

¹⁰ O kumakakaula Yehova, mba iye makateta ngwe ndumba. Ewa makateta mba anenyi-a-malunga meza nikuchikima ni kukatuka ku Chitokelo.

¹¹ Makakatuka nikulipupwisa ngwe tujila ku Engitu, ngwe tutele ku chifuchi cha Asuria mba mungwahilwisa ku mahio. Chocho kanambe Yehova.

¹² Eframe hanangujingilika ni mahuza, munyachi wa Izalele hanangujingilika ni kwonga. Hindu Yunda kakwenda ni Zambi, kakulalaminya kuli mwe Musandu.