Hosea 10 - MUKANDA USANDU WA ZAMBI 1975

¹ Izalele kapwa ngwe mutondo wa uva wa tachi uze wakwima mihuko yawo. Ha kwoka mihuko yenyi yokesa yilumbilo yenyi. Ha kuwaha chifuchi chenyi chocho yapemesa manguji jenyi.

² Mbunge jo ja mafwefwe kashika chaatamba kumbata uhie wo. Yehova makapuzula yilumbilo yo nikwonwona manguji jo.

³ Mumu haliapwila mamba ngwo, Kutushi mwanangana niumwe mumu kutwevwilile woma Yehova, kashika mwanangana atulingile yika?

⁴ Kakuhanjika maliji amokomoko; kakukolesa usendo ni mashingo keshi tachi, kashika upatwilo kuwakusoloka ngwe yiputa ya utende mu mihanga ya mu minda.

⁵ Akwa Samaria kakuchikimina mwana-ngombe wa ku Mbete-Avene. Atu jenyi makamulilila ni asasendote jenyi a mahamba mamuhula mbimbi mumu ha uhenya wenyi uze hiwamukatuka.

⁶ Ewa che chuma chene makachimbata ku Asuria akachitenge mulambu kuli mwanangana wa kulitachika. Makakolesa Eframe sonyi; Izalele makevwa sonyi ha punga yenyi.

⁷ Mwanangana wa Samaria makanonga, ngwe chipa cha mutondo ha lwiji.

⁸ Manangamo a Avene, we mutenga wa Izalele, makaonwona. Mingonga ni mikalale muyikasoka ha yilumbilo, mba makamba ku milundu ngwo, Tufukenu. Makamba ku mindundena ngwo, Holokenu hali yetu.

⁹ Enu A-Izalele, chize ku matangwa a Ngibia hinwavulumuna. Kwenako halikoleza nacho. Jita kuyichi kaawana te mu Ngibia?

¹⁰ Mungukeza kulimika ni wano akwa kupiya nikwalamba kastigu; mba mavungu makakunguluka kulimika no muze makaalamba kastigu ha milonga yo yiali.

¹¹ Eframe wapwile te chimbembe cha ngombe wa kulongesa. Wazangile chikolo kuzungula mbuto kashika chapinjishile kota yenyi yipema. Alioze mungulema Eframe ye kanga. Chatamba Yunda kukoka sharua; chatamba Yakomba kulipupila mavu mwene.

¹² Likuwilenu mbuto ya ululi; helenu mihuko ya utu wa zango; chipenu mavu aze helila; mumu mwaka wa kufupa Yehova hiweza hanga akeze nikununokesa ulamwino.

¹³ Enu hinwalima uhenge; hinwacha upatwilo upi; hinwalia mihuko ya mahuza. Se hinwafuliela matemba jenu a jita ni wunji wa tujita twenu,

¹⁴ kashika Chizungozungo cha jita muchisoloka hakachi ka atu jenu. Yihunda yenu yeswe ya kukolesa mayonwona, chizechene ngwe Shalamane yonwona Mbete-Arabele ha tangwa lia jita. Anaye te aafwenyene hamwe ni ana jo.

¹⁵ Ni yenu, munyachi wa Izalele, chocho manulinga mumu ha ungulungulu wenu unene. Mu kangonga mwe mwanangana wa Izalele mamutetaho ngwi.