Hebreu 9 - MUKANDA USANDU WA ZAMBI 1975

¹ Achi, chipwe usendo utangu wapwile ni yiyulo ya uvumbiko, ni muma musandu mwa hano hashi.

² Mumu alulikile mbalaka, yitangu, muze mwapwile ni chikwachilo cha ndeya, ni mesa, ni mbolo ja, kutumbieka; muze anavulukamo ngwo, Muma musandu.

³ Kulutwe lia chikalakala cha hina chamuchiali, kwatwama mbalaka yize anayivuluka, ngwo. Muma musandu mwahiana;

⁴ uli ni chilumbilo cha oru, cha insensu, ni mushete wa usendo wa kufuka ni oru ha malumbu eswe; muze mwapwile ndeho ya oru, yize yapwile ni maná, ni mulumbu wa Arone, uze watemwine, ni mawe ja usendo.

⁵ Helu liawo akerupimi ja uhenya kanazulamina chitwamo cha keke, ha kutwala ku yuma yize kukushi mwaka haliapwila kuhanjika chihanda ni chihanda.

⁶ Achi, yino yuma se ayilulikile chocho, asasendote kakunjilanjila matangwa eswe mu mbalaka yitangu nikulingalinga uvumbiko wo;

⁷ aiioze mu mbalaka yamuchiali sasendote mukwa lutwe ukawenyi, kamuwika ha mwaka, ndo ni manyinga, waze malambula hali iye mwene, ni ha yitela ya atu.

⁸ Spiritu Musandu kanalweze chino ngwenyi, Kanda achisolola jila ya muma musandu mwahiana shimbu te mbalaka yitangu yinamana.

⁹ Chenacho chishima ha mwakono haliapwila; nikulita nacho kakulambula ni yawana ni yitapo, yize kuyahashile kupwisa mungunu mukwa kuwayila ha kutwala ku mbunge.

¹⁰ Se yatwala wika ku yuma ya kulia ni kunwa ni kusana cheka ni cheka, maliji a yiyulo ya musunya, aatwikile ndo mwaka wa kululika yuma yeswe.

¹¹ Alioze Kristu se kapwa sasendote mukwa lutwe wa yuma yipema yize muyizaho, ku mbalaka yinene yahiana ni yingunu yahiana, kayitungile ni moko, te hi ya ku kutanga chino ko,

¹² chipwe ku manyinga ja pembe ni ja ana a ngombe, aiioze ku manyinga jenyi mwene, hananjila kamuwika kunahu muma musandu mwahiana, se hanazuku ukule wa mutolo.

¹³ Mumu kachi manyinga ja pembe ni ja kuji lia ngombe ni uto wa chimbembe wa kusapwila waze hanapu ni luchisa, muyisela ku usandu ha kupemesa cha musunya;

¹⁴ Shinaho chikolo manyinga a Kristu, yoze kuli Spiritu wa mutolo walilambwile keshi kapalia kuli Zambi, mapemesa mbunge jenu ku yitanga ya kufwa hanga nukavumbike Zambi ya mwono?

¹⁵ Ha chikuma chino iye chitakanyishi cha usendo waha, hanga waze hanaatambika akatambule chilakenyo cha chihinga cha mutolo, mumu kufwa hichapwa ha ukule wa Utanguko uze wapwile kushi lia usendo utangu.

¹⁶ Mumu kuze kuli usendo, chatamba nawa kufwa cha mukwa kuukolesa.

¹⁷ Mumu usendo muukola muze hikwapwa kufwa: se keshi kuukolesa nichimwe shimbu yoze wakukolesa achili ni mwono.

¹⁸ Kashika chipwe usendo utangu kaukolesele ndo ni manyinga.

¹⁹ Mumu muze te Mose hahanjika shimbi jeswe kuli atu eswe nikulita ni shimbi, wanjile manyinga ja anangombe ni ja pembe, hamwe ni meya ni wanda uchila ni hisope, wasapwilile ni mukanda ni e atu eswe.

²⁰ Ngwenyi, Wano e manyinga ja usendo uze Zambi hananwambe.

²¹ Ni mbalaka nawa ni yikwachilo yeswe ya uvumbiko wayisapwilile chizechene ni manyinga.

²² Nikulita ni shimbi yuma yeswe, yikepe wika yinasala, kakuyipemesa ni manyinga, ni ukonekeno wakuhi niumwe shina ha kumwanga manyinga.

²³ Chatamba kashika apemese yizulie ya yuma mu malilu ni yino; aiioze yuma ya mwilu yene ni yitapo yipema yahiana.

²⁴ Mumu Kristu kanjililemo muma musandu mwa kutungiwa ni moko, te Chizulie cha muma musandu mwamwenemwene; aiioze mwilu mwene hanga akasoloke haliapwila kumeso ja Zambi hali yetu:

²⁵ kuchapwile ngwe akalilambwole kanji kanji ngwe sasendote mukwa lutwe kakunjilanjila muma musandu mwaka ha mwaka ni manyinga ja mbala.

²⁶ Nyi chocho, chamutamba kwivwa lamba kanji kanji chize ku kusela cha fundamentu ya hashi: aiioze haliapwila kamuwika ha kumanunuka cha miaka hanamusolola hanga akachize shili ha kulihana chitapo iye mwene.

²⁷ Chizechene ngwe hanachitulikila atu eswe kufwa kamuwika, mba kulutwe lia chino upatwilo,

²⁸ chocho Kristu nawa, se hanamulambula kamuwika hanga akambate milonga ya anji, kumakamoneka chisuho chamuchiali, hi ha kutwala ku shili ko, kuli waze akumutalatala ha ulamwino.