Hebreu 8 - MUKANDA USANDU WA ZAMBI 1975

¹ Achi, ha yuma yino tunambe, chikuma chahiana chino ngwetu, sasendote mukwa lutwe ngwe yono tuli nenyi, yoze hanatwama ku kwoko lia chindume lia ngunja ya Ulamba mu malilu,

² kavumbi ka muma musandu, ni ka mbalaka yamwenemwene yize Mwene watungile, hi atu ko.

³ Mumu sasendote mukwa lutwe mweswe mamusela mukulambula yawana ni yitapo: kashika chatamba yono nawa kupwa ni chimwe cha kulambula.

⁴ Mumu kachi mapwa hano hashi, kachi keshi kupwa sasendote nichimwe, se kwali waze akulambula yawana nikulita ni shimbi.

⁵ (Waze akulingila chilweza ni Chizulie cha yuma ya mwilu, ngwe Zambi watumbile Mose, muze aputukile kutunga mbalaka: mumu kanambe ngwenyi, Tala ukatunge yuma yeswe nikulita ni cheseko chize hanakulweze ha mulundu.)

⁶ Alioze haliapwila hanazuku uvumbiko wahiana, se iye chitakanyishi nawa cha usendo Wahiana, uze hanaukolesa ha yilakenyo yipema yahiana.

⁷ Mumu kachi usendo utangu kuwapwile ni chitela, kachi kafupile haze manjishila usendo wamuchiali.

⁸ Mumu nikutuma, kanambe kuli ayo ngwenyi, Matangwa meza, chocho anambe Mwene ngwenyi, muze mungukakwata usendo waha ni akwa zuwo lia Izalele, ni akwa zuwo lia Yunda.

⁹ Kuushi kulita ni usendo uze nakwachile ni tulamba twenu ha tangwa lize naakwachile ku kwoko mukwatwala haze lia chifuchi cha Engitu; mumu kanyongonwene mu usendo wami, kashika naahumbwile, chocho anambe Mwene ngwenyi,

¹⁰ Mumu uno we usendo mungukakwata ni akwa zuwo lia Izalele kulutwe lia matangwa aze, chocho anambe Mwene ngwenyi, Mungukasa shimbi jami mu kunyonga cho, ni ha mbunge jo nawa mungukajisoneka: mungukapwa kuli ayo Zambi, o kumakapwa kuli yami atu jami.

¹¹ O kechi kalongesa mweswe mwenyembo wenyi, ni mweswe mwanakwo ngwenyi, Nyingika Mwene: mumu eswe kumakangunyingika, chize kuli mukepe ndo kuli munene wa kuli ayo.

¹² Mumu kumungwavwila keke ha uhenge wo, ni milonga yo chichi kayiwuluka nawa ndo ku miaka ya mutolo.

¹³ Se kanambe ngwenyi, Usendo waha, iye hanapwisa usendo utangu ukulu: aiioze uze unakutuka nikukukwoka unambe kuhwa.