Hebreu 5 - MUKANDA USANDU WA ZAMBI 1975

¹ Mumu sasendote mukwa lutwe mweswe wa kusakula hakachi ka atu, mamusela hali atu ha yuma ya kutwala kuli Zambi, hanga akalambule, ni yawana, ni yitapo ha milonga:

² yoze mahasa kupwa ni uhumikizo hali akwa kwalajala ni akwa kupianguka, se iye mwene nawa mukwa kukokoloka.

³ Mba ha mukunda wa chuma chino chamutamba, chizechene ngwe hali atu, chocho nawa hali iye mwene, kulambula ha milonga.

⁴ Niumwe malianjila ulemu uno hali iye mwene, shina muze mamutambika kuli Zambi, chizechene ngwe Arone nawa.

⁵ Chocho Kristu nawa kalichichimiekene mwene kupwa sasendote mukwa lutwe, aiioze yoze wambile kuli iye ngwenyi, Mwanami yena, tangwa lino hingunakuseme:

⁶ nikulita ngwe anambe nawa mu chihanda chikwo ngwenyi, Yena uli sasendote ndo ku miaka ya mutolo, nikulita ni ngango ya Melekizeteke.

⁷ Mwenawo ha matangwa ja musunya wenyi hashi, se walambwile yilemba ni kuliumba hamwe ni kuteta cha ngolo ni masoji kuli yoze te wahasa kumulamwina ku kufwa; apanjikile kuli iye mumu ha uwayilo wenyi.

⁸ Chipwe wapwile Mwana, hindu walilongesele kwononoka ku yuma yize evwilile lamba.

⁹ Mba se hanamupwisa mungunu iye kapwa mwe Kaputu ka ulamwino wa mutolo kuli waze eswe akumwononokena.

¹⁰ Kanamutambika kuli Zambi ngwenyi, Sasendote mukwa lutwe nikulita ni ngango ya Melekizeteke.

¹¹ Ha kutwala kuli iye yikuma yinji tuli nayo ya kwamba, yikalu kuyilumbununa, se hinwapwa tujika matwi.

¹² Mumu muze te ha mukunda wa miaka Chanutamba kupwa alongeshi, chinatambe umwe kunulongesa uputukilo wa maliji a Zambi; hinwapwa waze chaatamba kutambula yamwa, hi kulia cha tachi ko.

¹³ Mumu mweswe matambula yamwa, kalongolokele mu liji lia ululi; mumu iye mwana-kemba.

¹⁴ Alioze kulia cha tachi kuchapwa hali waze hakola, waze mumu ha mukunda wa kulijilila, mana jo akwete a kulifumba, akase chinyingi hakachi ka chize chipema ni chipi.