Hebreu 4 - MUKANDA USANDU WA ZAMBI 1975

¹ Twivwenu woma kashika, kuchina hanji, se hanatuhichikila chilakenyo cha kunjila mu uhwimino wenyi, umwe wa kuli yenu mamumona ngwe kanachihono.

² Mumu yetu hanatwambulwila sango lipema, chizechene ngwe ayo nawa; aiioze liji lia sango kuliaafumbukile se kalichingile ni Ufulielo muli waze evwile.

³ Mumu yetu hitunafuliela, tunanjila mu uhwimino uze; nikulita ngwe hanambe iye ngwenyi, Ngwe nalishingile mu utenu wami, ngwami, Kechi kanjila mu uhwimino wami: chipwe yitanga hiyinahu chize ku kusela cha fundamentu ya hashi.

⁴ Mumu hanambe muma mumwe ha kutwala ku tangwa liamuchishimbiali ngwe chino, ngwenyi, Ni Zambi wahwimine ha tangwa liamuchishimbiali ku yitanga yenyi yeswe.

⁵ Ni muno cheka nawa ngwenyi, Kechi kanjila mu uhwimino wami.

⁶ Se kashika chinasala kuli amwe anjilemo, ni waze aambulwilile sango lipema kushi, kanjilile mumu ha uhulia.

⁷ Cheka nawa kanavuluka limwe tangwa ngwo, Musono, ku kanwa lia David ngwenyi, Kulutwe lia shimbu linene Chichize, ngwe hanachambe ngwo, Musono, nyi munwivwa liji lienyi, kanda nukalisa mbunge jenu.

⁸ Mumu kachi Yoshua waahetesele ku uhwimino, kachi kahanjikile kulutwe ha kutwala ku tangwa likwo.

⁹ Kuunasala kashika uhwimino wa Sambata hali atu ja Zambi.

¹⁰ Mumu yoze hananjila mu uhwimino, hanahwimi nawa ku yitanga yenyi, chizechene ngwe Zambi wahwimine ku yitanga yenyi.

¹¹ Tulipupwisenu kashika kunjila mu uhwimino uze, hanga niumwe kechi kalimbuka ni cheseko chimuwika cha uhulia.

¹² Mumu liji lia Zambi mwono likwete, kuliakulinga ni tachi, linambuka kuhiana mukwale, nikutuwa ndo ku kuhandununa cha alma ni spiritu, ni ku makonekeno ni usongosongo, kuliakusa chinyingi ha manyonga ni kukana cha mu mbunge.

¹³ Ni chuma chize kuchishi kumoneka kuli iye chakuhi nichimwe; aiioze yuma yeswe yapwa ya uselesele, ya kufukuka kumeso ja yoze mutukamulumbunwina yuma yeswe.

¹⁴ Kashika se sasendote mukwa lutwe munene tuli nenyi, yoze hanapalika ndusu mu malilu, Yesu mwe Mwana Zambi, tulalaminyenu ku kutayiza chetu.

¹⁵ Mumu sasendote mukwa lutwe kutushi nenyi yoze keshi kuhasa kwivwa keke ha kukokoloka chetu; aiioze yoze hanamweseka ha yuma yeswe chizechene ngwe yetu, hindu shili, ka.

¹⁶ Tukundamenu kashika ni hamu ku ngunja ya vumbi, hanga tukatambule keke, tukawane vumbi lia kutukwasa ha mwaka wa chikala.