Hebreu 3 - MUKANDA USANDU WA ZAMBI 1975

¹ Kashika, mandumbu asandu, akwa! kulianyina ha kutambika cha mwilu, Zewulenu mwe Postolo kanda mwe Sasendote mukwa lutwe wa kutayiza chetu, iye Yesu.

² Mwenawo wapwile mukwa jika kuli yoze wamuselecho, chizechene ngwe Mose nawa wapwile mukwa jika mu zuwo lienyi lieswe.

³ Mumu hanamunyongo kupwa mukwa kutela uhenya wunji Wahiana Mose, nikulita ngwe yoze watungile zuwo, uhenya wenyi Wahiana uhenya wa lie zuwo.

⁴ Mumu zuwo lieswe lili ni yoze walitungile; aiioze yoze watungile yuma yeswe iye Zambi.

⁵ Ni Mose chamwenemwene wapwile mukwa jika mu zuwo lienyi lieswe, ngwe kavumbi, akapwe Shindakenyo ya yuma yize mayihanjika kulutwe lia miaka yize.

⁶ Alioze Kristu ngwe mwe Mwana helu lia zuwo lienyi; yetu tuli zuwo lienyi nyi chamwenemwene mutulalaminya ku hamu lietu ni kulisamba cha kutalatala chetu cha ngú, ndo ku songo.

⁷ Kashika chizechene ngwe Spiritu Musandu kanambe ngwenyi, Musono nyi munwivwa liji lienyi,

⁸ kanda nukalisa mbunge jenu ngwe ha che kwihia, ha tangwa lia kweseka mu puya,

⁹ muze tulamba twenu angwihile ha ku-ngweseka, amwene yitanga yami makumi awana a miaka.

¹⁰ Kashika napihililile ha chisemuko chino, nambile ngwami, Kakupianguka matangwa eswe mu mbunge jo; o kanyingikine majila jami.

¹¹ Ngwe nalishingile mu utenu wami ngwami, Kechi kanjila mu uhwimino wami.

¹² Kanyamenu, mandumbu, kuchina hanji muyipwa muli umwe hakachi kenu mbunge ya ungulungulu ya kuhona Ufulielo, ha kukatuka kuli Zambi ya mwono.

¹³ Alioze lishinjilenu umwe ni mukwo ni mukwo tangwa ha tangwa, shimbu lieswe analivuluka ngwo, Musono, hanga niumwe wa kuli yenu kechi kakala ku kwonga cha shili.

¹⁴ Mumu hitwapwa akwa kulianyina ni Kristu, kachi chamwenemwene mutulalaminya ku uputukilo wa ukolelo wetu wa ngú ndo ku songo.

¹⁵ Shimbu unachambe ngwo, Musono, nyi munwivwa liji lienyi, kanda nukalisa mbunge jenu ngwe ha che kwihia.

¹⁶ Mumu aya muze evwile, ehile? Hi waze eswe ko atuhukile mu Engitu ku kwoko lia Mose, nyi?

¹⁷ Mba hali aya wapihililile makumi awana a miaka? Hi hali waze avulumwine ko, nyi? Waze mijimba yo yalimbukile mu puya, nyi?

¹⁸ Kuli aya walishingile ngwenyi, Kechi kanjila mu uhwimino wami, shina kuli waze kononokeneko?

¹⁹ Mba tunamono kahashile kunjilamo mumu kafulieleleko.