Hebreu 13 - MUKANDA USANDU WA ZAMBI 1975

¹ Kufwila cha mandumbu chikalinduluke.

² Kanda nuvulama kuzumbula ngeji: mumu ha kulinga chocho amwe hanazumbula angelo, kumanyi kachinyingikine.

³ Iwulukenu funge ngwe nunakashiwa hamwe no; waze kanaalingi chipi, ngwe nuli yenwene nawa mu mujimba.

⁴ Umbachiso akaulemese kuli eswe, ni muhela kanda akausela ku luchisa: mumu mapangala ni yitanji Zambi kumakaapatwila.

⁵ Ndako jenu jikapwe kujishi kufwila cha mbongo; pwenu akwa kuyuka ni yuma yize nuli nayo; mumu iye mwene hanambe ngwenyi, Chichi kukuhichika nichimwe, chipwe chichi kakwehuka nichimwe.

⁶ Chocho ni kuhamuka tunambe ngwetu, Mwene iye chikwashi chami; chichi kevwa woma. Atu yika mangulinga?

⁷ Iwulukenu waze apwile tusongo twenu, waze ahanjikile kuli yenu liji lia Zambi; zewulenu songo lia kwenda cho, imbululenu Ufulielo wo.

⁸ Yesu Kristu chimuwika apwa, ni zau, ni musono, ni ndo ku miaka ya mutolo.

⁹ Kanda nuhungumioka ni longeso lieka ni lieka, lize kulialumbunukine; mumu chinawaha mbunge yikakole mu vumbi; hi mu kulia ko, mumu kuchafumbukile kuli waze endelemo.

¹⁰ Chilumbilo tuli nacho, chize waze akuvumbika mbalaka keshi chiyulo cha kulilaho nichimwe.

¹¹ Mumu mijimba ya tushitu waze, manyinga jo maaneha muma musandu ku moko ja sasendote mukwa lutwe, ngwe mulambu ha shili, mayocha haze lia chihunda.

¹² Kashika Yesu nawa, hanga akasele ku usandu atu jenyi ku manyinga jenyi mwene, wevwile lamba haze lia chajilo.

¹³ Kashika tutuhukenu tuye kuli iye haze, ni kumbata luchoko yoze amuchokele nenyi Kristu.

¹⁴ Mumu limbo lia kulinduluka kutushi nalio hano, aiioze twakufupa lize mulizaho.

¹⁵ Kuli iye kashika tulambulenu chitapo cha uhaliso kuli Zambi matangwa eswe, chenacho mihuko ya mivumbo yetu yize yakwalakana jina lienyi.

¹⁶ Alioze kulinga yipema, ni kulianyina, kanda nuvulama; mumu ni yitapo ngwe yino Zambi kakuwahilila chikolo.

¹⁷ Ononokenu kuli waze apwa tusongo twenu, nukazeye kuli ayo: mumu kakulawoka ha mbunge jenu, chizechene ngwe waze makalumbununa kuli Zambi, hanga akalinge chino ni uwahililo, hi ni kutwa mikuma ko, mumu chino kuchichi kanufumbula.

¹⁸ Tulembelenu; mumu tunakunuka mbunge yipema tuli nayo ha yuma yeswe, tunazange kwenda kanawa ha kutwala ku yuma yeswe.

¹⁹ Alioze ngunaliumbu kuli yenu kuhiana chikolo kulinga chino, hanga akanguhilwise kuli yenu nikawashi.

²⁰ Haliapwila Zambi ya sambukila, yoze wachijile cheka nawa hakachi ka afu Mwene wetu Yesu, mwe kafunga munene wa mapanga, ku manyinga ja usendo wa mutolo,

²¹ akanupwise angunu ha yitanga yeswe yipema, mukulinga upale wenyi, akalinge muli yenu chize chakupemena chikolo kumeso jenyi, kuli Yesu Kristu; uhenya ukapwe kuli iye ndo ku miaka yeswe ya mutolo. Amene.

²² Alioze ngunaliumbu kuli yenu mandumbu, lihumikizenu ni liji lia kushinjila: mumu ngunasoneka kuli yenu ni maliji akehe.

²³ Nyingikenu hanatusula ndumbwetu Timoteu; nyi meza nikawashi mungukanumona hamwe nenyi,

²⁴ Menekenu tusongo twenu eswe, ni asandu eswe. Akwa Italia kananumeneka.

²⁵ Vumbi likapwe hamwe ni yenu eswe. Amene.