Hebreu 11 - MUKANDA USANDU WA ZAMBI 1975

¹ Achi, Ufulielo che kulisela chinyingi cha yuma yize anayitalatala, che kukumika ha yuma yize kuyishi kumoneka.

² Mumu makulwana azukile nawo Shindakenyo yipema.

³ Ku Ufulielo chatulumbunuka ngwe atesele miaka ku liji lia Zambi, chocho chize chakumoneka kachitangile ku yuma yize yakusoloka.

⁴ Ku Ufulielo Abele walambwile kuli Zambi chitapo chilemu chahiana Kene, ku chize wazukile Shindakenyo ya kupwa mukwa ululi, Zambi se kanashindakenya ha yawana yenyi; ku uze, iye se wafwile, hindu achili nikuhanjika.

⁵ Ku Ufulielo atutulwilile Enoke hanga kechi kamona kufwa; mba kamuwanyineko, mumu Zambi wamututulwilile; mumu shimbu kanda amututulwila, amushindakenyene ngwo, Kanapemena kuli Zambi.

⁶ Alioze mutu keshi kuhasa kupemena kuli Zambi shina ni Ufulielo; mumu yoze meza kuli Zambi chamutamba kufuliela ngwo, Iye hwali, iye mukwa kwononona waze akumufupa.

⁷ Ku Ufulielo Noe wa kufumba kuli Zambi ha kutwala ku yuma yize kanda yichimoneka, se wevwile woma wa Zambi, walulikile ulungu akalamwine akwa zuwo lienyi; chochene wahishile akwa hashi, amupwishile swana ya ululi uze wakulita ni Ufulielo.

⁸ Ku Ufulielo Apalahama, muze amutambikile, wononokene kukatuka mukuya kuma kuze matambula ha chihinga; mba wakatukile, chipwe kanyingikine kuze maya.

⁹ Ku Ufulielo watwamine ngwe chilambala mu chifuchi cha chilakenyo, ngwe mu chifuchi cha mbala, nikutwama mu mbalaka hamwe ni Izake ni Yakomba, maswana hamwe nenyi a chilakenyo chimuwika:

¹⁰ mumu wataliletalile limbo lize likwete fundamentu, lize chilangaji, tungi yalio Zambi.

¹¹ Ku Ufulielo chipwe Sara mwene watambwile tachi ja kuseseka ufumba muze te hapalika mwaka, se wamunyongene wamwenemwene yoze walakenyene:

¹² kashika nawa kwakatukile kuli umuwika, iye ngwe mufu, anji ngwe matongonoshi a mwilu, ngwe masekeseke aze ali ku sesa lia Kalunga-lwiji, keshi kuhasa kwaalula.

¹³ Wano eswe afwile nikulita ni Ufulielo, katambwile yilakenyo, aiioze ayimwene kusuku; ayisambililile; atayijile ngwo, Tuli ngeji ni njize hano hashi.

¹⁴ Mumu waze akwamba yuma ngwe yino, kakuchisolola kanafupu chifuchi cha ayo ene.

¹⁵ Nyi kachi chamwenemwene ewulukile chifuchi kuze akatukile, kachi apwile ni mwaka wa kuhilukilako;

¹⁶ aiioze haliapwila kakuzanga chifuchi chimwe chahiana, te chize cha mwilu: kashika Zambi keshi kwavwila sonyi, akamuvuluke ngwo, Zambi yetu; mumu hanaalulikila limbo.

¹⁷ Ku Ufulielo Apalahama, muze amwesekele, walambwile Izake, ni yoze watambwile yilakenyo kushi walambwile mwanenyi wa wika,

¹⁸ yoze ha kutwala kuli iye achambile ngwo, Muli Izake makatambika munyachi we:

¹⁹ se kanashinginyeka ngwenyi, Zambi kanahase kumuhindwisa, chipwe hahachi ka afu, muze mwene nawa ngwe mu Chizulie wamutambwile.

²⁰ Ku Ufulielo Izake wawahishile Yakomba ni Esau, ha kutwala ku yuma yize muyizaho.

²¹ Ku Ufulielo Yakomba, muze himafwa, wawahishile mweswe wa kuli ana ja José a malunga; Wawayilile nikujamina ha mulumbu wenyi.

²² Ku Ufulielo José, muze akundamine ku songo lia mwono wenyi, wavulukile kukatuka cha ana a Izalele; nikuhana shimbi ha kutwala ku yifwaha yenyi.

²³ Ku Ufulielo, muze te Mose hasemuka, amuswekele kuli yisemi jenyi tukweji atatu, mumu amumwene mwana wa vumbi, o kevwileko woma ku chiyulo cha mwanangana.

²⁴ Ku Ufulielo Mose, muze te hakola, katayijileko akamuvuluke ngwo, Mwana wa mwana Falau wa pwo.

²⁵ Watongwele Shinaho kwivwa lamba hamwe ni atu a Zambi, katongwele kuwaha cha shili ha shimbu likepe.

²⁶ Se kananyongo ngwenyi, Luchoko yoze achokele nenyi Kristu, hapwa upite kuhiana yikumba ya Engitu: mumu wahulikilile meso ku kwononona.

²⁷ Ku Ufulielo wehukile Engitu, kuchapwile ngwe wevwile woma wa ufwatulo wa mwanangana: mumu wanyongonwene ndusu ngwe kanamono yoze keshi kumoneka.

²⁸ Ku Ufulielo wafungile Chizomboka, ni kusapwila cha manyinga, hanga chenyeki cha atangu a kusemuka kechi kaakwata.

²⁹ Ku Ufulielo apalikile ndusu mu Kalunga-lwiji Muchila ngwe hashi homu: chize A-Engitu ha kweseka kuchilinga atokele.

³⁰ Ku Ufulielo yipanga ya Yeriku yapuzukile, muze te hayijinguluka matangwa shimbiali.

³¹ Ku Ufulielo Rahape, chikoi, katokeleko hamwe ni waze kononokeneko, se watambwile ngendeshi ni sambukila.

³² Mba kuchi mungwamba nawa? Mumu mwaka muunguhwila, kachi mungwambulula ha kutwala kuli Ngideone, ni Mbarake, ni Samasone, ni Jefeta, ni David, ni Samuele, ni aprofeta:

³³ waze ku Ufulielo akanganyine mawanangana, alingile ululi, azukile yilakenyo, ajikile makanwa ja ndumba,

³⁴ ajimine tachi ja kahia, apulukile ku lutwilo wa katana, ku ulelu alikolezele, ayile ni kutakama mu jita, achinyishine yizavu ya yilambala.

³⁵ Mapwo atambwile afu jo ku Uhindukilo: akwo aapinjishile ndo ku kufwa, se katayijile akaapulule, hanga akazuke Uhindukilo wahiana.

³⁶ Akwo aesekele ni kwakekuna ni kwalamba ni shikote, ewa, ndo ku malenge ni mazuwo ja ususu;

³⁷ aashile mawe, aaselalile mukachi, aazezele, aashihile ni katana; endanganyine mu malambu ja mapanga, mu malambu ja pembe, akwa kuhona, aapinjishile, aalingile chipi,

³⁸ (akwa hashi kaatelele), achamanganyine mu puya ni ha milundu, ni mu yivwenge, ni mu mena a hashi.

³⁹ Wano eswe, se azukile Shindakenyo ku Ufulielo, katambwile che chilakenyo.

⁴⁰ Zambi se wamwene Shimbu-kanda chuma chimwe chipema chahiana ha kutwala kuli yetu, hanga kechi kaapwisa angunu shina ni yetu.