Hebreu 10 - MUKANDA USANDU WA ZAMBI 1975

¹ Mumu shimbi se yili ni Chizulie cha yuma yipema yize muyizaho, hi we mujimba wene ko wa yuma, kuyahashile nilimwe tangwa ni yitapo yimuwika tangwa ha tangwa, yize akulambula mwaka ha mwaka, kupwisa angunu waze akukundama.

² Nyi chocho, kachi kalitwaminyine kuyilambula, nyi? Mumu akwa kuwayila se haapemesa kamuwika keshi kupwa nawa ni uhiso wa milonga.

³ Alioze mu yitapo yize kuchili kwiwulula cha milonga mwaka ha mwaka.

⁴ Mumu manyinga ja ngombe ni ja pembe kechi kuhasa kuchiza milonga.

⁵ Kashika muze yeza hano hashi, yamba ngwenyi, Chitapo ni mulambu yena kwayipalile, alioze wangululikilile mujimba.

⁶ Mu milambu ya muwundu ya kulumba, ni yitapo ha shili yena kwawahilililemo.

⁷ Hohene nambile ngwami, Talenu, Zambi nguneza. (Mu chivungo cha mukanda chinasonewa hali yami) mukulinga upale we. Zambi.

⁸ Helu, muze yamba ngwenyi, Yitapo ni milambu, ni milambu ya kulumba, ni yitapo ha shili yena kwayipalile, chipwe kwawahilililemo (yize akuyilambula nikulita ni shimbi),

⁹ mba wambile ngwenyi, Mba, hinguneza mukulinga upale we. Machiza yitangu, hanga akakolese yamuchiali.

¹⁰ Mu upale uno wene hanatusela ku usandu ku kulambula cha mujimba wa Yesu Kristu kamuwika kunahu.

¹¹ Chikwo nawa sasendote mweswe kakumana tangwa ha tangwa nikuvumbika, nikulambwola kanji kanji yitapo yimuwika, yenayo kuyishi kuhasa kuchiza milonga nilimwe tangwa.

¹² Alioze iye muze te hatambula chitapo chimuwika ha milonga, Watwamine ndo ku miaka ya mutolo ku kwoko lia chindume lia Zambi.

¹³ Kanalawoka chize ku mwaka uze ndo mapwisa akwa kole jenyi chitwamo cha yiliato yenyi.

¹⁴ Mumu ku mulambu umuwika hanapwisa angunu ndo ku miaka ya mutolo waze hanaasela ku usandu.

¹⁵ Ni Spiritu Musandu nawa kanatushindakenya; mumu muze te hamba ngwenyi,

¹⁶ Mwene kanambe ngwenyi, Uno usendo uze mungukakwata no kulutwe lia matangwa aze: Mungukasa shimbi jami ha mbunge jo, ni ha kunyonga cho nawa mungukajisoneka.

¹⁷ Milonga yo ni ungulungulu wo chichi kayiwuluka nawa ndo ku miaka ya mutolo.

¹⁸ Alioze kuze kwatwama ukonekeno wa yino, mulambu ha shili wakuhi nawa niumwe.

¹⁹ Kashika, mandumbu, se hamu tuli nalio mukunjila muma musandu mwahiana ku manyinga a Yesu,

²⁰ ku jila yize hanatuputukilayo, jila yaha, ya mwono, ku chikalakala cha hina, chenacho musunya wenyi;

²¹ se tuli ni sasendote munene helu lia zuwo lia Zambi;

²² tukundamenu ni mbunge yamwenemwene, ni kusela chinyingi liakulu cha Ufulielo: se hasapwila mbunge jetu jipema ku shimbi jipi: se hasanyisa mijimba yetu ni meya apema.

²³ Tulalaminyenu ku kutayiza cha kutalatala chetu, nikulihiza ka; mumu yoze walakenyene iye mukwa jika.

²⁴ Tulitalenu umwe kuli mukwo ni mukwo mukukasumuna ku zango ni yitanga yipema.

²⁵ Kanda twehuka kulikungulula cha yetwene, ngwe ndako ya amwe, aiioze nikulishinjila, ni kuhiana chikolo shimbu munumona lie tangwa linakundama.

²⁶ Mumu kachi mutuvulumuna ni mbunge yeswe muze te hitunatambula yinyingi ya umwenemwene, chitapo ha milonga kuchishiko nawa;

²⁷ aiioze kutatatata cha upatwilo chikota ni woma, ni kuyila cha kahia chize muchikalesa akwa kulimika.

²⁸ Mumu mutu yoze hanalitunu shimbi ya Mose, mafwa, ha Shindakenyo ya yela aali hanji atatu, keshi kumuvwila keke.

²⁹ Kuchi nunanyongo? Yoze hanaliate mwe Mwana Zambi, hanajilula manyinga a usendo aze amuselele no ku usandu, hanasaula mwe Spiritu ya vumbi, lamba lika Mamutela?

³⁰ Mumu kutunamunyingika yoze wambile ngwenyi, Kukala nichami, yami kumungukafwetesa, chocho anambe Mwene; cheka nawa ngwenyi, Mwene kumakapatwila atu jenyi.

³¹ Kuholokela mu moko ja Zambi ya mwono, chuma cha kukolesa woma.

³² Alioze iwulukenu matangwa a kunyima, muze te hinwapanguluka, nwanyongonwene ha kulinjika chinji cha lamba;

³³ kanda shimbu anumwesene kuchoka ni kuhungumiona, kanda shimbu nwalianganyine ni waze evwile yino yuma.

³⁴ Mumu nwevwile keke hali funge, nwatambwile ni uwahililo kupunda cha yikumba yenu, te nunanyingika nuli nayo yikumba yahiana ya kulinduluka.

³⁵ Kanda nukambila kashika hamu lienu, lienalio kukundulula chinene likwete.

³⁶ Mumu Chanutamba kunyongonona, nulinge upale wa Zambi, nukatambule che chilakenyo.

³⁷ Mumu hindu kashimbu kakepekepe ni yoze meza kumakeza, kechi kashimbula.

³⁸ Alioze mukwa ululi kumenda ku ufulielo; mba kachi masosolokela kunyima, yami chichi kuwaha nichimwe muli iye.

³⁹ Alioze yetu hi tuli akwa kusosolokela kunyima ko ku kwonwona; aiioze tuli akwa kufuliela ha ulamwino wa mwono.