Hagai 1 - MUKANDA USANDU WA ZAMBI 1975

¹ Ha mwaka wamuchiali wa mwanangana Dariu, ha kakweji wamuchisambano ni tangwa litangu lia kakweji liji lia Yehova liejile mu kanwa lia profeta Hagaia kuli Zorobabele mwana Salatiele nguvulu wa Yunda, ni kuli sasendote mukwa lutwe Yoshua mwana Jehozadake ngwenyi,

² Yehova-wa-Tujita kanambe ngwenyi, Wano atu kanambe ngwo, Matangwa a kutungulula zuwo lia Yehova kanda achiheta.

³ Henaho liji lia Yehova yiliza kuli profeta Hagaia ngwenyi,

⁴ Kumanyi matangwa hanahete a kutwama mu mazuwo jenu a kululika kanawa ni mitondo shimbu zuwo lino Unatwama lia kupuzula?

⁵ Kashika Yehova-wa-Tujita kanambe ngwenyi, Nyongenu ha majila jenu!

⁶ Hinwalima chinji, alioze hinwacha chikepe. Nunali, alioze kunwakuchile. Nunanu alioze pwila kuyahwile. Nwazala, alioze eswe chishika nunevu. Ni yoze wakulingila fweto, kakulingila fweto akayise mu njeke yikwete yituwa.

⁷ Yehova-wa-Tujita kanambe ngwenyi, Nyongenu majila jenu!

⁸ Kandukenu ku milundu, nukasake mitondo, nukatunge lie zuwo hanga ngukawahilile nalio, uhenya wami usoloke. Chocho kanambe Yehova.

⁹ Nwataliletalile chinji, alioze chapwile chikehe, ni muze nwachinehene ku zuwo nachifujile—opu! Yehova-wa-Tujita kanahula ngwenyi, Kuchi te? Mumu ha zuwo liami lize Unatwama lia kupuzula shimbu yenu nunahondangana mutu mweswe ni zuwo Henyi mwene.

¹⁰ Kashika malilu helu lienu kanuhele mume, ni mavu hanumina mbuto.

¹¹ Hinasanyika changa ha chifuchi, ni ha milundu, ni ha mbuto, ni ha vinyu yaha, ni ha maji, ni ha yuma yize mavu akwima, ni hali atu, ni hali yimuna, ni ha milimo yo yeswe.

¹² Henaho Zorobabele mwana Salatiele, ni Yoshua mwana Jehozadake mwe sasendote mukwa lutwe, ni masalila eswe ja atu ononokene ku liji lia Yehova Zambi yo, ni maliji ja profeta Hagaia, chize Yehova Zambi yo hamutuma; mba e atu evwilile woma Yehova.

¹³ Mba Hagaia mwe kanganda ka Yehova yambulula kuli atu lusango wa Yehova ngwenyi, Yehova kanambe ngwenyi, Kunguli hamwe ni yenu.

¹⁴ Mba Yehova yashinjila Spiritu ya Zorobabele mwana Salatiele, nguvulu wa Yunda, ni Spiritu ya sasendote mukwa lutwe Yoshua mwana Jehozadake, ni Spiritu ya masalila eswe ja atu. Yeza; yahondangana milimo ku zuwo lia Yehova-wa-Tujita, Zambi yo,

¹⁵ ha tangwa makumi aali ni liamuchiwana lia kakweji wamuchisambano.