Habakuke 3 - MUKANDA USANDU WA ZAMBI 1975

¹ Kulemba cha profeta Habakuke, nikulita ni laka lia Shigionote.

² Yehova, hinevwa lufuma we; ngunavwila woma chitanga che! Yehova, huzulula milimo ye hakachi ka miaka. Hakachi ka miaka uyisolole. Hakachi ka ufwatulo iwuluka keke.

³ Zambi yakatuka ku Temane, mwe Musandu yakatuka ku mulundu wa Parane. Uhenya wenyi watakile malilu, ni hashi liazalile ni uhaliso wenyi.(Litulike)

⁴ Uhenya wenyi wapwile ngwe pangu; misayo yahenyene ku kwoko lienyi; kwenako watakile ndundo jenyi.

⁵ Kulutwe lienyi kwayile chilungo; misongo ya kulukumuka yamukawile kunyima.

⁶ Yamana; yeseka hashi; yatala; yasakumuna mavungu. Mba milundu ya mutolo yiyimwangana; mindundena ya miaka yahuwa. Majila jenyi apwile ngwe ku shakulu.

⁷ Namwene mbalaka ja Kushane ni kupinda chajo. Mahina ja chifuchi cha Mindiane achikimine.

⁸ Yehova, ufwatulo we wapwile wa kulimika ni njiji? Utenu we walimikine ni njiji? Hanji matoto je a kulimika ni kalunga-lwiji muze wendele hali tuvwalu twe ni ha temba lie lia kukumba?

⁹ Wafukwile uta we. Chize walishingile ku minyachi chakolele. (Litulike) Wapulile njiji hashi.

¹⁰ Milundu yakumwene, yevwile woma. Meya a tachi apukumukine; kalunga-lwiji watetele nikuzundula moko jenyi kwilu.

¹¹ Tangwa ni kakweji yamana lume muma mwo ha kumona kuhenya cha mivu ye chize yiyenda; ha kulejima cha kunga lie lia kupeyima.

¹² Yiutangunukina hashi ni ufwatulo, nikuliata mavungu ni utenu.

¹³ Yiutuhuka kulamwina atu je; kulamwina yoze wamuzujilile maji. Yiufwenya mutwe wa chingulungulu, nikumufukula chize ku shina lia kulu ndo ku kota. (Litulike)

¹⁴ Yiutuwa mitwe ya tujita twenyi ni mivu ye, waze te ejile ngwe chijimbi akangumwange. Te kanawahilila ngwe malia yiswale ku tenga.

¹⁵ Yiuliata kalunga-lwiji ni tuvwalu twe, che kupukumuka cha mikanya ya ndundo.

¹⁶ Ngunevu, mba mujimba wami unachikima; mivumbo yami yinachikima ha lundunjila wacho. Yifwaha yami yinapolo; molu jami anazeketa mushi liami. Mungutwaminyina kúlú tangwa lia lamba muliza hali akwa kunjila mu chifuchi chetu.

¹⁷ Chipwe mukuyu kuuchi kutemuna; chipwe miuva kuyishi mihuko; chipwe mihuko ya mitondo ya olevwe muyihona; chipwe minda kuyishi kupwa ni kulia; chipwe pembe ni panga masutuka ku limba ni ngombe akuhi mu matanga,

¹⁸ hindu munguwahilila muli Yehova; mungulikwiza muli Zambi ya ulamwino wami.

¹⁹ Yehova Mwene iye tachi jami. Kakupwisa molu jami ngwe molu a kai. Kakungwendesa ha milundu yami. Kuli njimba wa lutwe: ha yisaji yami ya kusa.