Habakuke 2 - MUKANDA USANDU WA ZAMBI 1975

¹ Mungukwata ku ulayilo wami nikumana ha kaposhi kami, nikutala kanawa ngukamone chize mangwamba ni chize mungukumbulula ha kutwala ku kulinyenga chami.

² Mba Yehova yangukumbulula ngwenyi, Soneka usolwelo; lumbununa ha mikanda hanga chipwe mukwa kutanga azomboke.

³ Mumu usolwelo unachitwaminyina mwaka wawo. Kuunatambuka ku songo liawo—kuushi mahuza. Chipwe mumona ngwe unashimbula shimbu hindu twaminyina. Muwiza kupwa; kuuchi kahona.

⁴ Mbunge yenyi yinalifuzu; kuyalulamine muli iye. Alioze mukwa ululi kumenda ku Ufulielo wenyi.

⁵ Chikwo nawa vinyu kuyakuhandukulula. Mukwa kulizata kechi kalinduluka. Solo lienyi Hatoha ngwe Shiole. Kapwa ngwe kufwa; kechi kukuta. Kakulikungila mavungu eswe, ni kutenga atu eswe ngwe ninyenyi.

⁶ Wano eswe kechi kuputuka kumuchoka, nikumulenya nikumuchimbunguna ngwo, Lamba kuli yoze malilumbikila yuma kuyapwile niyenyi; nikwokesa yifungo. Ndo mwiji muka?

⁷ Te akwa mikuli ye kechi kukatuka susumuku? Kechi kukasumuka waze makuchikimisa? Mba yena muopwa upite wa kupunda kuli ayo.

⁸ Mumu yena hiwapupa mavungu anji, kashika waze analisalaho ku mavungu kumakakupupa, mumu ha manyinga ja atu ni upupilo wa hashi, ku yihunda ni waze eswe atwamamo.

⁹ Lamba kuli yoze wakutambula munyachi wenyi ni uhenge, akase chaswa chenyi kwilu akalilamwine ku yipi.

¹⁰ Hiwataka sonyi ha munyachi wa yena mwene ha kusutula mavungu anji. Hiwatokesa mwono we.

¹¹ Mumu liwe mulikatambika mu parede, ni mukambo wa kukwachisa mitondo umukumbulula.

¹² Lamba kuli yoze matungila chihunda ni manyinga; yoze makolesa limbo ni uhenge!

¹³ Yehova-wa-Tujita hanachifunjika, minyachi ahondangane ha kahia wika ni mavungu alikatalise mokomoko.

¹⁴ Mumu hashi muhazala ni chinyingi cha uhenya wa Yehova chizechene ngwe meya akufuka kalunga-lwiji.

¹⁵ Lamba kuli yoze manwisa enyembo jenyi ku musenge wenyi wa ufwatulo, nikumuzengewesa hanga atale sonyi jenyi.

¹⁶ Makuzalisa ni sau, hi uhenya ko. Nwako yena mwene ukapwe ngwe chilima! Musenge wa ku kwoko lia chindume lia Yehova muukuheta mba sonyi mujikafuka uhenya we.

¹⁷ Upupilo uze walingilile Lebano muukulundumukina, kwonwona cha tushitu muchikukolesa woma mumu ha manyinga ja atu ni upupilo wa hashi, ku yihunda ni waze eswe atwamamo.

¹⁸ Hamba kuchi mahasa kukwasa muze tangi yenyi hamweseka, se aye kaponya wa kuzuzulula; longeshi wa mahuza? Mumu chilangaji kanafuliela chuma cha kutanga iye mwene, muze malinga tumama twa mahamba.

¹⁹ Lamba kuli yoze akwamba ku chuma cha mutondo ngwenyi, Laula! Hanji mamba ku liwe kulishi kuhanjika ngwenyi, Katuka! Ayo muyimulongesa chimwe? Kumanyi cha kulamikaho oru ni prata; mwiku wakuhimo niumwe.

²⁰ Alioze Yehova mwali mu tembele yenyi yisandu. Akwa hashi eswe akahole kumeso jenyi.