Habakuke 1 - MUKANDA USANDU WA ZAMBI 1975

¹ Liji lia Zambi lize alimwene kuli profeta Habakuke.

² Yehova ndo mwiji muka munguteta ungukwase mba yena kushi kwivwa? Ndo mwiji muka munguteta ngwami, Upupilo! alioze yena kushi kulamwina?

³ Kuchi te wakungumwesa chipi? Kuchi te meso jami akutala ku lamba wika? Kwonwona ni upupilo yili kumeso jami; kulitachika ni kuhamika yinasoloka.

⁴ Chocho shimbi yakokoloka ni upatwilo wa kulita kuushi kumoneka. Mumu yingulungulu kanaseleka akwa ululi; kashika kakuhengesa upatwilo.

⁵ Tala hakachi ka mavungu umone; komoka ni kulishimwoka. Mumu ngunalingi milimo yimwe ha matangwa je ena kuchi kufuliela chipwe makwambulwilayo.

⁶ Mumu ngunavundula A-Kaletea vungu lisasu lia kulipupula kakwenda ndusu utohe wa hashi akapunde mazuwo hi nijo ko.

⁷ Kole ni mwongo, akwa kuchikimisa atu; upatwilo wo ni ulemu wo unasoloka muli ayo ene.

⁸ Tuvwalu two kanatambuka kuhiana yangwi; kanatenuka kuhiana tungunga a ha chingoloshi; akwa tuvwalu kanahange ni kulengumuka. Ewa akwa tuvwalu kusuku anakatuka; kanahumuka ngwe pupa kakutambuka kwenyeka.

⁹ E eswe upupilo anejila; mwongo wo unaatetekela. Kakukunga funge ngwe masekeseke.

¹⁰ Kakulelesa mianangana, kakuhehesa akwa kuyula. Yihunda yeswe ya kukolesa kakuyiseha mumu kakutambika mavu nikuyitambula.

¹¹ Mba kakupalika ngwe fuji, kakuhiana; akwa uhie hatenga tachi jo zambi yo.

¹² Yehova Zambi yami! Mwe Musandu wami! Hi uli wa mutolo ko? Kashika kutuchi kufwa. Yehova hiunaatongola akapwe kastigu; yena lwe Luliwe, hiunaakolesa atufumbe.

¹³ Meso je apema naye, kahashile kumona yipi; kwahashile kutala uhenge. Kuchi te wakutala malunga a mafwefwe? Kuchi te wakuhola muze chingulungulu mamina mutu yoze wamuhiana ni ululi?

¹⁴ Mumu wakupwisa atu ngwe yishi a mu kalunga-lwiji, ngwe tushitu a kukalala waze keshi ni mukwa kwayula.

¹⁵ Kakwalowa eswe ni kazambu, kakwambulumunamo ni wanda wenyi. Kakwakunga ni tambi lienyi chocho kakuwahilila ni kulikwiza.

¹⁶ Kashika kakushihila yitapo wanda wenyi, nikwochela insensu tambi lienyi mumu kwenako azukila yuma yipema ni kulia chenyi chinawaha.

¹⁷ Kashika azukule te wanda wenyi matangwa eswe nikushiha mavungu ndo ku miaka ni keke ka?