Galashia 6 - MUKANDA USANDU WA ZAMBI 1975

¹ Mandumbu, kachi mutu makwachika ni kapalia, yenu nuli akwa Spiritu, nukahilwise umwe ngwe yono ni mbunge ya kushimbika; nikukanyama yena mwene, kuchina ni yena nawa makuzeza.

² Limbachilenu yilemu umwe hali mukwo, ni chocho munumanununa shimbi ya Kristu.

³ Mumu kachi mutu malishinginyeka kupwa chimwe, muze iye hi chimwe ko, mahonga iye mwene.

⁴ Alioze mutu ni mutu akeseke chitanga chenyi mwene, chocho makapwa ni kulisamba chenyi ha kutwala kuli iye mwene wika, hi ha kutwala ku yuma ya mbala ko.

⁵ Mumu mweswe kumambata chiteli chenyi mwene.

⁶ Alioze yoze anamufumbu ni liji, akalianyine ni chifumbe ni yuma yeswe yipema.

⁷ Kanda nulionga; Zambi keshi kulenvewa: mumu cheswacho mutu makuwa, chenacho kumakacha nawa.

⁸ Yoze makuwa ku musunya wenyi mwene, ku musunya kumakacha kupola; alioze yoze makuwa kuli Spiritu, kuli Spiritu makacha mwono wa mutolo.

⁹ Mba kanda tulezumuka ha kulinga kanawa; mumu ha mwaka wacho kumutukacha nyi kutuchi kakokoloka.

¹⁰ Chocho kevwe, shimbu tuchili ni mwaka, tulingenu yipema kuli atu eswe, ni kuli akwa zuwo lia Ufulielo kuhiana chikolo.

¹¹ Talenu sona jipwapwa haha ngunasoneka kuli yenu ni kwoko lia yami mwene.

¹² Waze eswe akuzanga kulenga ni musunya, kakunushinjika akanupwise ngalami; chino wika, hanga kechi kamona yihungumiona mumu ha kulusu ya Kristu.

¹³ Mumu chipwe waze matambula ungalami ayo ene keshi kufunga shimbi; alioze kanazange akanupwise ngalami, hanga akalisambe mu musunya wenu.

¹⁴ Alioze kanda chikapwa kama kuli yami kulisamba shina mu kulusu ya Mwene Yesu Kristu, ku yenayo hanashihi yuma ya hashi kuli yami, ni yami hanangushihi ku yuma ya hashi.

¹⁵ Mumu muli Kristu, chipwe ungalami kuushi ulemu chipwe ulima, ka, alioze chitanga chaha.

¹⁶ Ni waze eswe akwenda nikulita ni cheseko chino, sambukila yikapwe hali ayo, ni keke, ni hali akwa Izalele ja Zambi.

¹⁷ Chize ku haliapwila niumwe kanda akangupinjisa, mumu ngunambata ha mujimba wami yimbambili ya Mwene Yesu.

¹⁸ Vumbi lia Mwene wetu Yesu Kristu likapwe hamwe ni maspiritu jenu, mandumbu. Amene.