Galashia 5 - MUKANDA USANDU WA ZAMBI 1975

¹ Manenu ngú kashika mu utuswilo uze Kristu hanatutusula nawo, kanda nukakwachika cheka nawa ni kanga ya undungo.

² Talenu, yami Paulu, ngunambe kuli yenu ngwami, Kachi munutambula ungalami, Kristu kechi kunufumbula nichimwe.

³ Ewa, ngunashindakenya cheka nawa kuli mweswe matambula ungalami, ngwami, Kumapwa mukwa kongo mukulinga shimbi yeswe.

⁴ Hinwaliteta kuli Kristu, yenu nunazange akanusambise ni shimbi; hinwakatuka ku vumbi.

⁵ Mumu yetu ku tachi ja Spiritu ku Ufulielo tunatwaminyina kutalatala cha ululi.

⁶ Mumu muli Kristu, chipwe ungalami kuushi ni ulemu, chipwe ulima, ka; alioze Ufulielo uze unalingi ku zango.

⁷ Nwazombokele kanawa; iya wanukwikile kwononoka ku umwenemwene?

⁸ Kukununa chino kuchakatukile kuli yoze wakunutambika.

⁹ Futunwiso yikepe muyifutunwisa mwaha weswe.

¹⁰ Ngunalikolela kuli yenu muli Mwene, ngwami, Kunuchi kapwa ni kunyonga chikwo nichimwe: ni yoze wakunupikala kumakambata uhiso wenyi, apwe mweswawo.

¹¹ Alioze yami, mandumbu, kachi nguchili nikwambujola ungalami, kuchi te nguchili nikumona yihungumiona? Kachi chocho kevwe, chitalingiso cha kulusu ya Kristu chinahu.

¹² Ngunazange kachi waze akunupinjisa akaliteteho.

¹³ Mumu anutambikile, mandumbu, nukatusuke; chino wika, kanda nukalumuna kutusuka chenu kaliongelo ka kulingila musunya, alioze ku zango lilingilenu umwe ni mukwo.

¹⁴ Mumu shimbi yeswe yinamanunuka mu liji limuwika, ngwo, Ukazange mwenyembo we ngwe unalizange yena mwene.

¹⁵ Alioze kachi munulisuma nikuliwumbula umwe ni mukwo, kanyamenu kuchina munuluka.

¹⁶ Alioze ngwami, Endenu muli Spiritu, mba kunuchi kamanununa usolo wa musunya.

¹⁷ Mumu musunya kuwakulimika ni Spiritu, ni Spiritu kakulimika ni musunya; mumu yino yuma kuyakulimika chimwe ni chikwo, kunukwika ku yuma yize nunazange kulinga.

¹⁸ Mumu kachi Spiritu manusongwela, hi nuli kushi lia shimbi ko.

¹⁹ Achi, yitanga ya musunya yinasoloka, yenayo yino: ni utanji, ni luchisa, hi upangala,

²⁰ ni kukombelela mahamba, ni kupanda, ni kole, ni vunda, ni ukwa, ni ufwatulo, ni kulipula, ni kulimanangana, ni kulihandununa,

²¹ ni lufwachinda, ni ungalwe, ni kuzengewa, ni kuhungumuka ni yipi, ni yuma ya kulifwa ni yino; ha kutwala ku yiyo, ngunanwambulwila Shimbu-kanda, chizechene ngwe nanwambulwilile kulu, ngwami, Waze akulingalinga yuma ngwe yino kechi kahinga wanangana wa Zambi.

²² Alioze mihuko ya Spiritu, zango, ni uwahililo, ni sambukila, ni kulihumikiza, ni utu, ni upeme, ni kushishika,

²³ ni kushimbika, ni kusúla; kulimika ni yuma ngwe yino shimbi yakuhi niyimwe.

²⁴ Alioze atu a Kristu, hanahachila ha kulusu musunya ni kusasaminya chawo ni usolo wawo.

²⁵ Kachi tuli ni mwono muli Spiritu twendenu nawa muli Spiritu.

²⁶ Kanda tuzanga uhenya wamokomoko, kanda tulihia umwe ni mukwo, kanda tupwa ni lufwachinda umwe kuli mukwo.