Galashia 4 - MUKANDA USANDU WA ZAMBI 1975

¹ Alioze ngwami, Ha shimbu lize lieswe swana mapwa kanuke, keshi kulipalikila nichimwe ni ndungo, chipwe kanapu mwenewa eswe;

² alioze kushi lia tufufuchi ni tuselo ali, ndo ku mwaka uze aselele tato.

³ Chocho ni yetu nawa, muze twapwile twanuke, twapwile mu undungo kushi lia yikuma yamokomoko ya hano hashi.

⁴ Alioze muze miaka yacha Zambi watumine Mwanenyi wa kusemuka kuli pwo, wa kusemuka kushi lia shimbi

⁵ hanga akakule waze apwile kushi lia shimbi, akatupwise ana jenyi.

⁶ Mba se nuli ana, Zambi hanatumu Spiritu ya Mwanenyi mu mbunge jetu, kanatambika ngwenyi, Ta-ta, Tata.

⁷ Chocho hi uli ndungo ko nawa, alioze uli mwana; nyi kachi mwana, swana nawa ku upale wa Zambi.

⁸ Alioze ha miaka yize se kunwanyingikine Zambi, nwapwile mu undungo kuli waze ku chisemewa hi mazambi ko.

⁹ Alioze haliapwila se nunanyingika Zambi, hanji Shinaho Zambi kananunyingika, ngwe kuchi nunatewulukila cheka nawa ku yikuma yamokomoko ya ulelu ni ya uswale, nukalitenge ndungo jayo nawa, nyi?

¹⁰ Nwakufunga matangwa, ni tukweji, ni yiwanyino, ni miaka.

¹¹ Ngunanuvwila woma, kuchina hanji nakilikichile chamokomoko hali yenu.

¹² Ngunaliumbu kuli yenu, mandumbu, pwenu ngwe yami, mumu yami nawa ngunapu ngwe yenu, kunwangulingile chipi nichimwe.

¹³ Alioze nunanyingika chapwile mumu ha kukokoloka cha musunya nambujolele kuli yenu sango lipema hatangu:

¹⁴ chize chapwile chuma chikalu kuli yenu mu musunya wami kunwachilelesele, chipwe kunwalitunyinecho; alioze nwangutambwile ngwe mungelo wa Zambi, ngwe Kristu Yesu.

¹⁵ Chilihi kuwaha chenu? Mumu nakunushindakenya ngwami, Kachi nwahasa, kachi nwatombongwene meso jenu nukangweho.

¹⁶ Mba hinalumuka mukwa kole yenu ha kunwambulwila umwenemwene, nyi?

¹⁷ Kakusongojola alioze hi ha chuma chipema ko; kanazange kunuyikila haze hanga nukasongojoke kali ayo.

¹⁸ Chinawaha kusongojoka ha chuma chipema heswaho, hi ha kupwako yami ko.

¹⁹ Ana jami akepe, hali yenu nakwivwa yikola ya kusema cheka nawa ndo Kristu matengewa muli yenu;

²⁰ Ngunazange kupwa hamwe ni yenu haliapwila, ni kuhipula liji liami, mumu ngunayambashana ha kutwala kuli yenu.

²¹ Ngwambulwilenu, yenu, nwakuzanga kupwa kushi lia shimbi, shimbi kunushi kuyivwa, nyi?

²² Mumu chinasonewa ngwo, Apalahama wapwile ni ana aali a malunga: umwe wa kuli ndungo wa pwo, ni mukwo wa kuli pwo mwenya chifuchi.

²³ Alioze yoze wa kuli ndungo wa pwo, wasemukine nikulita ni musunya; alioze yoze wa kuli pwo mwenya chifuchi, wasemukine ku chilakenyo.

²⁴ Yino yuma yinapu chishima: mumu wano usendo waali; umwe wa ku mulundu wa Sinai, kakusema ana ku undungo, iye Hekare.

²⁵ Achi, yono Hekare kanapu mulundu wa Sinai, mu Arabia, kanalite ni Yerusaleme yize ya haliapwila; mumu yili mu undungo hamwe ni ana jenyi.

²⁶ Alioze Yerusaleme yize ya kwilu hi ndungo ko, iye mama wa yetu eswe.

²⁷ Mumu chinasonewa ngwo, Wahilila, yena mumba, kushi kusema, Kalumioka, ukololoke, yena kushi kufumbajala. Mumu ana ja twamishi anji kuhiana, yoze uli ni mukwo-lunga akehe.

²⁸ Achi, yetu, mandumbu, chizechene ngwe Izake, tuli ana a chilakenyo.

²⁹ Alioze chizechene ngwe ha miaka yize, yoze wasemukine nikulita ni musunya wahungumionene yoze wasemukine nikulita ni Spiritu, chocho nawa haliapwila.

³⁰ Alioze chika chinambe chisoneko? Ngwo, Mbila haze ndungo wa pwo ni mwanenyi: mumu mwana wa ndungo kechi kahinga hamwe ni mwana wa pwo mwenya chifuchi.

³¹ Chocho mandumbu, hi tuli ana ja ndungo ko, alioze a pwo mwenya chifuchi.