Galashia 3 - MUKANDA USANDU WA ZAMBI 1975

¹ Yenu A-Ngalashia nunahepuka, iya hananwongo, yenu, kwe kumeso jenu, asolwele pundu Yesu Kristu wa kuliachila ha kulusu?

² Chino wika ngunazange kunyingika kuli yenu ngwami, Nwatambwile Spiritu ku yitanga ya shimbi, nyi, shina ku kwivwa cha Ufulielo?

³ Nunahepuka Chichize, nyi? Se nwaputukile muli Spiritu, munumanununa mu musunya, nyi?

⁴ Nwevwile lamba lipwa haha chamokomoko, nyi? Kachi chamwenemwene hichapwa chamokomoko.

⁵ Yoze kashika wakunwaha Spiritu, nikulinga yipupu hakachi kenu, kakuchihnga ku yitanga ya shimbi nyi, shina ku kwivwa cha ufulielo?

⁶ Chizechene ngwe Apalahama afulielele Zambi, mba amuhelecho ha ululi.

⁷ Kashika nyingikenu waze a ku Ufulielo e ana a Apalahama waze.

⁸ Che chisoneko, nikumona Shimbu-kanda ngwe Zambi makasambisa akwa mavungu ku Ufulielo, chambulwile Shimbu-kanda sango lipema kuli Apalahama, ngwo, Muli yena akwa mavungu eswe kumakawaha.

⁹ Chocho akwa Ufulielo haawahisa hamwe ni Apalahama mwe mukwa ufulielo.

¹⁰ Mumu waze eswe a ku yitanga ya shimbi, kushi lia shingo ali: mumu chinasonewa ngwo, Kashingiwa mweswe keshi kunyongonona mu yuma yize yeswe yinasonewa mu mukanda wa shimbi mukuyilinga.

¹¹ Mba chinasoloka pundu mutu niumwe keshi kumusambisa ku shimbi kumeso ja Zambi; mumu mukwa ululi kumenda ku Ufulielo.

¹² Hindu shimbi hi ya ku Ufulielo ko; alioze yoze wakuyilinga kumapwa ni mwono ku yiyo.

¹³ Kristu hanatukula ku shingo lia shimbi, se a amupwishile shingo hali yetu; mumu chinasonewa ngwo, Kashingiwa mweswe hamuzezeleka ha mutondo.

¹⁴ Hanga uwape wa Apalahama ukeze hali akwa mavungu muli Kristu Yesu; hanga tukatambule chilakenyo cha Spiritu ku Ufulielo.

¹⁵ Mandumbu, ngunahanjika nikulita ni atu ngwami, Chipwe usendo wa atu tuhu, hindu muze haukolesa, niumwe maulelesa, hanji mawezaho.

¹⁶ Achi, ahanjikile yilakenyo kuli Apalahama, ni ku munyachi wenyi. Kambile ngwenyi, Ku minyachi, ngwe kuli anji; alioze ngwe umuwika, ngwenyi, Kuli munyachi we, mwenawo Kristu.

¹⁷ Achi chino ngunambe ngwami, usendo uze aukolesele Shimbu-kanda kuli Zambi, shimbi yino yapwile kulakaji awana a miaka ni makumi atatu a miaka kulutwe, kuyishi kuulelesa, ngwe yikapwise chilakenyo chamokomoko.

¹⁸ Mumu kachi chihinga muchipwa cha ku shimbi, kuchichi kuhasa kupwa cha ku chilakenyo; alioze Zambi hanachihana ni vumbi kuli Apalahama ku chilakenyo.

¹⁹ Mba shimbi yaka? Ayiwezele mumu ha Utanguko, ndo we munyachi muwiza, yoze amuhele chilakenyo; ayikolesele kuli angelo, mu kwoko lia chitakanyishi.

²⁰ Achi, chitakanyishi hi wa kuli umuwika ko; alioze Zambi iye umuwika.

²¹ Shimbi kevwe yinalimika ni yilakenyo ya Zambi, nyi? Ka, pundu: mumu kachi ahanyine shimbi yize muyihasa kupwisa ni mwono, kachi pundu ululi muupwa wa ku shimbi.

²² Alioze yisoneko hiyayika yuma yeswe kushi lia shili, hanga akahane chilakenyo ku Ufulielo kuli Yesu Kristu kuli waze akufuliela.

²³ Alioze shimbu Ufulielo kanda wiza, atufungile kushi lia shimbi, nikutuyikila ku Ufulielo uze himausolola.

²⁴ Chocho shimbi yinapu chifumbe chetu ndo kuli Kristu, hanga akatusambise ku Ufulielo.

²⁵ Alioze haliapwila se Ufulielo hiuneza, kutwatwamine nawa kushi lia chifumbe.

²⁶ Mumu yenu eswe muli Kristu nuli ana a Zambi ku Ufulielo.

²⁷ Mumu eswe a kuli yenu anupapachishile muli Kristu, hinunazala Kristu.

²⁸ Kukushi Ka-Yunda hanji Ka-Ngresia, kukushi ndungo hanji mwenya chifuchi, kukushi lunga hanji pwo; mumu yenu eswe nunapu umuwika muli Kristu Yesu.

²⁹ Nyi kachi nuli a Kristu, kachi nuli munyachi wa Apalahama ni maswana nikulita ni chilakenyo.