Galashia 2 - MUKANDA USANDU WA ZAMBI 1975

¹ Mba kulutwe lia kumi lia miaka ni miaka yiwana, nakandukile cheka nawa ku Yerusaleme hamwe ni Mbarnavwe, ni Titu nawa wayile hamwe ni yami.

² Nakandukile nikulita ni usolwelo; nikusela kumeso jo sango lipema lize nakwambujola hakachi ka akwa mavungu, alioze ukawetu kumeso ja waze a lufuma, kuchina hanji nguzomboke, hanji nazombokele chizombokela.

³ Alioze chipwe Titu, yoze wapwile hamwe ni yami, iye Ka-Ngresia, kamushinjilile kupwa ngalami.

⁴ Alioze mumu hali mandumbu a kwonga aanjishile ku tenga, eno anjilile ku tenga mukutala ngwe ngendeshi utuswilo uze tuli nawo muli Kristu Yesu, hanga akatutwale ku undungo;

⁵ o kutwaatayijile, ngwe kulizeyesa, ka, chipwe ha ola yimuwika; hanga umwenemwene wa sango lipema ukatwame hamwe ni yenu.

⁶ Alioze kuli waze afumanyine kupwa chimwe (cheswacho apwile kunyima, chamokomoko kuli yami: Zambi keshi katonde), waze a lufuma kanguwezele nichimwe.

⁷ Alioze Shinaho, muze amwene ngwe angukunjikile sango lipema lia akwa ulima, chizechene ngwe kuli Petulu lize lia akwa ungalami;

⁸ (mumu yoze walingile muli Petulu ha upostolo wa akwa ungalami, wapwile nikulinga muli yami ha apostolo wa akwa mavungu);

⁹ muze anyingikine vumbi lize anguhele, Tiangu ni Sefwa ni Yoano, waze apwile manguji mu chikungulwila, ahanyine kuli yami ni Mbarnavwe moko ja chindume a kulikunda, hanga yetu tukaye kuli akwa mavungu, o akaye kuli akwa ungalami.

¹⁰ Chino wika, ngwo, Tukewuluke yiswale; chuma chino chene ni yami nawa nasele mbunge yami kulinga.

¹¹ Muze Petulu ahetele ku Andiakia, nalimikine nenyi, meso ni meso mumu iye wahile.

¹² Mumu shimbu amwe a kuli Tiangu kanda aheta, iye walile hamwe ni akwa mavungu; alioze muze o ahetele, wakatukile nikulihandununa, se wevwile woma wa akwa ungalami.

¹³ A-Yunda akwo alingile ni ulembekese chizechene hamwe nenyi; chocho chipwe Mbarnavwe wahungumukine ku ulembekese wo.

¹⁴ Alioze muze namwene ngwe kendele nikululika, nikulita ni umwenemwene wa sango lipema, nambile kuli Petulu kumeso ja eswe ngwami, Kachi yena, uli Ka-Yunda, wakwenda ngwe akwa mavungu, hi ngwe Ka-Yunda ko, kuchi te wakushinjika akwa mavungu akende ngwe A-Yunda?

¹⁵ Yetu se tuli A-Yunda ku chisemewa, hi yivulumunyi ko a ku mavungu,

¹⁶ hindu nikunyingika ngwetu, Mutu keshi kumusambisa ku yitanga ya shimbi, alioze ha kufuliela Yesu Kristu, chipwe yetu twafulielele Kristu Yesu, hanga akatusambise kuufulielo kuli Kristu; hi ku yitanga ya shimbi ko: mumu ku yitanga ya shimbi kechi kasambisa niumwe.

¹⁷ Alioze kachi shimbu twafupile atusambise muli Kristu, chipwe yetwene atuwanyine yivulumunyi, Kristu kanapu kavumbi ka shili, nyi? Ka, pundu.

¹⁸ Mumu kachi mungutunga cheka nawa yuma yize nonwene, kachi mungulipwisa chitanguke.

¹⁹ Mumu yami ku shimbi nafwile ku shimbi, hanga ngupwe ni mwono kuli Zambi.

²⁰ Hananguhachila ha kulusu hamwe ni Kristu; hi yami ko nawa nguli ni mwono, alioze Kristu yoze katwama muli yami; ni mwono uze nguli nawo mu mujimba, nguli nawo mu Ufulielo uze wa kuli mwe Mwana Zambi, yoze wanguzangile, yoze waliechele hali yami.

²¹ Chishi kupwisa vumbi lia Zambi liamokomoko: mumu kachi ululi muupwa mumu ha shimbi, kachi kufwa cha Kristu chamokomoko.