Galashia 1 - MUKANDA USANDU WA ZAMBI 1975

¹ Yami Paulu, postolo (hi wa kuli atu ko, hanji ku tachi ja mutu, alioze wa kuli Yesu Kristu, ni Zambi mwe Tata, yoze wamuhindwishile hakachi ka afu);

² ni mandumbu waze eswe ali hamwe ni yami, Ku yikungulwila ya mu Ngalashia:

³ Vumbi kuli yenu ni sambukila ya kuli Zambi mwe Tata, ni Mwene wetu Yesu Kristu,

⁴ yoze waliechele ha milonga yetu, hanga akatupulule ku mwakono upi, nikulita ni upale wa Zambi kanda Tata yetu.

⁵ Uhenya ukapwe kuli iye ndo ku miaka yeswe ya mutolo. Amene.

⁶ Ngunakomoka kumona nikawashi Chichize nunatutuluka kuli yoze wanutambikile mu vumbi lia Kristu, nikuya ku sango lipema lieka;

⁷ lize hi sango lipema likwo ko; alioze kwali amwe, waze akunupikala nikuzanga kuhengesa sango lipema lia Kristu.

⁸ Alioze kachi yetu, chipwe mungelo wa mwilu, manwambulwila sango lipema likwo, lialipwila ni lize twanwambulwilile, ngwetu, Akashingiwe.

⁹ Chizechene ngwe hitwamba kulu, chocho ngunambe haliapwila cheka nawa ngwami, Kachi umwe manwambulwila sango lipema likwo lialipwila ni lize twanwambulwilile, ngwetu, Akashingiwe.

¹⁰ Mumu haliapwila ngunafupu shina kuwahila atu nyi, shina kuwahila Zambi? Shina ngunafupu kupemena kuli atu, nyi? Kachi nguchili nikupemena kuli atu, kachi hi nguli ndungo ya Kristu ko.

¹¹ Mumu ngunanunyingikisa, mandumbu, ha kutwala ku sango lipema lize nambujolele ngwami, Hi lia kulita ni atu ko.

¹² Mumu chipwe kuli atu chalitambwile, chipwe kangulongeselelio, alioze nalitambwile mu usolwelo kuli Yesu Kristu.

¹³ Mumu hinunevu ha kwenda chami cha kunyima mu Uyunda, ngwe chize kuhiana chikolo nahungumionene chikungulwila cha Zambi, nikuchenyeka.

¹⁴ Nasenyene kulutwe mu Uyunda kuhiana anji a kuli mulietu hakachi ka akwa vungu liami, ni kulinga ni mbunge yeswe kuhiana ha ndongo ja akaka.

¹⁵ Alioze muze chapemenene Zambi, yoze wanguhandunwine chize ku jimo lia mama, wangutambikile mu vumbi lienyi,

¹⁶ mukusolola Mwanenyi muli yami, hanga ngukamwambujole hakachi ka akwa mavungu; haze hene chahanjikile ni atu a musunya ni manyinga,

¹⁷ chipwe chakandukile ku Yerusaleme kuli waze aliangile kupwa apostolo alioze nayile ku Arabia; ni cheka nawa nahilukile ku Ndamaseku.

¹⁸ Kulutwe lia miaka yitatu nakandukile ku Yerusaleme mukunyingika Petulu, natwamine hamwe nenyi kumi lia matangwa ni matangwa atano.

¹⁹ Alioze akwo a kuli apostolo chamwene niamwe shina Tiangu mwanakwo wa Mwene.

²⁰ Achi, ha kutwala ku yuma yize ngunasoneka kuli yenu, kumeso ja Zambi, chahanjikile mahuza.

²¹ Kulutwe lia chino, nayile ku yifuchi ya kujingilika Seria ni Selishia.

²² Alioze yikungulwila ya mu Yundeya muli Kristu kangunyingikine ku meso;

²³ chino wika evwile ngwo, Yoze watuhungumionene kunyima, haliapwila kakwambujola sango lipema lia Ufulielo uze wawenyekene kunyima.

²⁴ O achichimiekene Zambi muli yami.