Filipu 4 - MUKANDA USANDU WA ZAMBI 1975

¹ Kashika, mandumbu jami a zango, nakunuvwila usona, uwahililo wami ni chipangula chami, chocho manenu ngú muli Mwene, akwetu a zanga.

² Ngunaliumbu kuli Evotia ni Sentiki, akapwe ni kunyonga chimuwika muli Mwene.

³ Ewa, ngunaliumbu kuli yena nawa, chikwashi-ni-mukwetu ngwami, Kwasa kama wano mapwo, mumu akilikichile hamwe ni yami mu sango lipema, ni Kelemente nawa, ni akwa milimo-ni-akwetu akwo, waze majina jo mwali mu mukanda wa mwono.

⁴ Wahililenu muli Mwene matangwa eswe: cheka nawa mungwamba ngwami, Wahililenu.

⁵ Umbovu wenu ukamoneke kuli atu eswe. Mwene hakamwihi ali.

⁶ Kanda nukalipikala ha nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi.

⁷ Ni sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.

⁸ Ha yize yinasala, mandumbu, yeswayo yamwenemwene, yeswayo kuyishi lwelia, yeswayo ya ululi, yeswayo yitoma, yeswayo yatela kufwila, yewsayo ya lufuma mupema; kachi kuhiana chimwe, kachi uhaliso umwe, nyongenu ha yino yuma.

⁹ Yuma yize anulongesele, yize nwatambwile, yize nwevwile, yize nwamwene muli yami, yino yuma lingenu; ni Zambi ya sambukila makapwa hamwe ni yenu.

¹⁰ Nawahililile chikolo muli Mwene ngwe haliapwila ha kusula, hinunasokolwesa kunyonga chenu hali yami; mumu nwangunyongene wate, alioze nwahonene mwaka upema.

¹¹ Chahanjikile ngwe ngunahono, ka: mumu hingunalilongesa kuyuka ni yuma yeswayo nguli nayo.

¹² Ngunanyingika chize changutamba kulilelesa; ngunanyingika nawa ngwe chize kulumbama: mu majila eswe, ni ha yuma yeswe, ni kukuta ni kwivwa zala nawa, ni kulumbama ni kuhona.

¹³ Kunahasa kulinga yuma yeswe muli yoze wakunguhashisa.

¹⁴ Hindu nwalingile kanawa nwalianyinyine ni luyinda wami.

¹⁵ Ni yenwene nawa nunanyingika, yenu A-Fwilipu, ngwe ha uputukilo wa sango lipema, muze nakatukile ku Masendoniya, chikunpilwila nichimwe kuchalianyinyine ni yami ha kutwala ku kuhana ni kutambula, shina yenu wika;

¹⁶ mumu chipwe mu Tesalonika, nwatumine kashi, kaali, nikungwaha yize nahonene.

¹⁷ Kuchapwile ngwe ngunafupu chawana, alioze ngunafupu chikolo mihuko yize yakulumbama kuli yenu.

¹⁸ Alioze yuma yeswe nguli nayo; nguli nayo ya kulumbama: ngunazala tò, se natambwile kuli Epafwonditu yuma yize nwatumine, lupembo mupema, chitapo cha kupemena chikolo kuli Zambi.

¹⁹ Chocho Zambi yami kumakanwaha yize yeswe munuhona nikulita ni upite wenyi mu uhenya muli Kristu Yesu.

²⁰ Haliapwila uhenya ukapwe kuli Zambi yetu kanda Tata yetu ndo ku miaka yeswe ya mutolo. Amene.

²¹ Menekenu asandu muli Kristu Yesu. Mandumbu waze ali hamwe ni yami kananumeneka.

²² Asandu eswe kananumeneka, ni kuhiana chikolo akwa zuwo lia Sesare.

²³ Vumbi lia Mwene Yesu Kristu likapwe hamwe ni yenu eswe. Amene.