Filipu 3 - MUKANDA USANDU WA ZAMBI 1975

¹ Ha yize yinasala, mandumbu jami, wahililenu muli Mwene. Kusoneka yuma yimuwika kuli yenu, chamwenemwene kuchishi kunguvwisa yikatalo, alioze hali yenu muchinufunga kawape.

² Keyelenu tuwa, keyelenu akwa milimo api, keyelenu akwa kuliteta.

³ Mumu yetu tuli akwa ungalami, yetu twakulingila Zambi muli Spiritu, twakulisamba muli Kristu Yesu, kutushi kufuliela musunya.

⁴ Chipwe yami mwene ngunahase kufuliela musunya: kachi umwe mukwo manyonga ngwenyi, Munguhasa kufuliela musunya, Shinaho yami.

⁵ Angupwishile ngalami ha tangwa liamuchinake, wa ku munyachi wa Izalele, wa ku vungu lia Mbenjamine, Ka-Hepreu hakachi ka A-Hepreu, ha kutwala ku shimbi, Ka-Fwariseu.

⁶ Ha kutwala ku kulinga ni mbunge yeswe nahungumionene chikungulwila; ha kutwala ku ululi uze uli mu shimbi, te chishi chitela.

⁷ Alioze yuma yize yapwile kuli yami ngwe kufumbuka, yino nanyongene kupwa kutokesa mumu hali Kristu.

⁸ Ewa, chamwenemwene nakunyonga nawa yuma yeswe kupwa ngwe kufulwa ha ulemu wa yinyingi ya Kristu Yesu, Mwene wami; hali iye natokesele yuma yeswe, nakuyinyonga yiswaswa lume, hanga ngukazuke Kristu,

⁹ hanga akanguwane muli iye, hi ni ululi wa yami mwene ko, uze wa ku shimbi, alioze uze wa ku Ufulielo kuli Kristu, ululi uze wa kuli Zambi ku Ufulielo,

¹⁰ hanga ngukamunyingike, ni tachi ja Uhindukilo wenyi, ni kulikunda cha lamba lienyi, nikulifwa ni kufwa chenyi;

¹¹ kachi ngukahete kama ku Uhindukilo hakachi ka afu.

¹² Kuchapwile ngwe hingunazuku kulu, hanji hingunapu mungunu, ka; alioze nakukaula, kachi nawa ngukazuke chuma chize ha chiyo anguzukile nawa kuli Kristu Yesu.

¹³ Mandumbu jami, chishi kulishinginyeka ngwe hingunawane, alioze chuma chimuwika nakulinga, Hakuvulama yuma yize yili kunyima, nakuzoza ku yuma yize yili kulutwe.

¹⁴ Nakuhanga nikuhetula meso ku songo ha kwononona cha kutambika cha kwilu cha Zambi muli Kristu Yesu.

¹⁵ Kashika waze hakachi ketu tuli angunu, tupwe nikunyonga chocho; nyi kachi ha chuma chimwe munupwa ni kunyonga cheka, chino nawa Zambi kumachisolola kuli yenu.

¹⁶ Chino wika, kuze hitunahete, ku cheseko chenacho twendenu.

¹⁷ Mandumbu, pwenu hamuwika akwa kungwimbulula, senu chinyingi waze akwenda chocho, chizechene ngwe yetu tuli cheseko chenu.

¹⁸ Mumu anji kakwenda, hali ayo hingunanwambulwila kanji, ni haliapwila ngunanwambulwila nikulila, kanapu akwa kole ja kulusu ya Kristu:

¹⁹ songo lio, kwonwona; zambi yo, jimo; ni uhenya wo, sonyi jo; kakunyonga yuma ya hashi.

²⁰ Mumu chifuchi chetu chili mwilu; mu muze twakutalatala Chilamwina, mwe Mwene Yesu Kristu.

²¹ Mwenawo kumakalumuna mujimba wetu wa ulelu hanga ukalifwe ni mujimba wa uhenya wenyi, nikulita ni kulinga chize kanahase nacho kuzeyesa chipwe yuma yeswe kuli iye mwene.