Filemu 1 - MUKANDA USANDU WA ZAMBI 1975

¹ Yami Paulu, funge ya Kristu Yesu, ni ndumbwetu Timoteu, Kuli Fwilimu, tunamuzange chikolo, mukwa milimo-ni-mukwetu,

² ni kuli pangietu Apia, ni Arkipu, swalale-ni-mukwetu, ni ku chikungulwila chize chili mu zuwo lie:

³ Vumbi kuli yenu ni sambukila ya kuli Zambi Tata yetu ni Mwene Yesu Kristu.

⁴ Nakusakwila kuli Zambi yami, nikukuvulwoka matangwa eswe mu yilemba yami;

⁵ nikwivwa lufuma wa zango lie, ni Ufulielo uze uli nawo kuli Mwene Yesu, ni kuli asandu eswe;

⁶ hanga kuliendela cha Ufulielo we chikalinge mukutayiza yuma yeswe yipema yize tuli nayo muli Kristu.

⁷ Mumu uwahililo wunji ni kulembejeka nguli nacho mumu ha zango lie ndumbwami, mumu wakuhuzulula mbunge ja asandu.

⁸ Kashika, hamu lieswe nguli nalio muli Kristu kukwamba chize chinalite.

⁹ Hindu mumu ha zango Shinaho ngunaliumbu, se ngunapu Paulu mwe mukulwana, ni haliapwila funge nawa ya Yesu Kristu.

¹⁰ Ngunaliumbu kuli yena hali mwanami, Onesimu, mwenawo hingunamuseme mu makana jami;

¹¹ yoze ha miaka ya kunyima kakufumbwileko, aiioze haliapwila kanafumbula kuli yena ni kuli yami.

¹² Namutumine cheka nawa kuli yena, iye mwene, te mbunge yami.

¹³ Nazangile kachi asale hamwe ni yami, hanga akakusalakane ha kunguvumbika mu makana ja sango lipema.

¹⁴ Alioze chazangile kulinga nichimwe shina yena mutá; hanga chitanga che chipema kuchichi kapwa cha kuzangisa, aiioze ha upale wa yena mwene.

¹⁵ Mumu hanji ha chikuma chino wahandunukine kuli yena ha shimbu, hanga ukamuzuke ndo ku miaka ya mutolo;

¹⁶ hi ngwe ndungo ko nawa, aiioze wahiana ndungo, ndumbwetu wa zango, kuli yami kuhiana, aiioze kuli yena kuhiana chikolo, ni mu musunya ni muli Mwene.

¹⁷ Kashika kachi unangumono ngwe sepa, mutambule ngwe yami mwene.

¹⁸ Alioze kachi hanakulingi chipi, hanji ali ni kongo kuli yena, Usoneke mu mukanda wami.

¹⁹ Yami Paulu, ngunachisoneka ni kwoko lia yami mwene, kumungukachifweta: alioze, helu lia chino cheswe, chambile kuli yena ngwe chipwe mwono we uli nawo, kongo kuli yami.

²⁰ Ewa, ndumbu, nguwahilile muli Mwene hali yena; hwimisa kama mbunge yami muli Kristu.

²¹ Se ukolelo nguli nawo ha kwononoka che, ngunasoneka kuli yena, nikunyingika ngwami, Mukalinga kuhiana chize ngunambe.

²² Chikwo nawa ukangululikile zuwo, mumu ngunatalatala akanguhane kuli yenu mumu ha yilemba yenu.

²³ Epafwa, funge-ni-mukwetu muli Kristu Yesu, kanakumeneka,

²⁴ hamwe ni Marku, ni Aristako, ni Ndima ni Luka, akwa milimo-ni-akwetu.

²⁵ Vumbi lia Mwene wetu Yesu Kristu likapwe hamwe ni Spiritu ye. Amene.