Ezra 9 - MUKANDA USANDU WA ZAMBI 1975

¹ Muze halinga yino yuma, alemu ejile kuli yami ngwo, A-Izalele, ni asasendote ni A-Levi kalihandunwine ni akwa yifuchi; kanalingi nikulita ni yizelwokeso yo, chipwe ya A-Kanana, ni A-Hete, ni A-Perize, ni A-Yepushe, ni A-Amone, ni A-Moape, ni A-Engitu, ni A-Amore.

² Mumu hambata ana jo a mapwo, hali ene ni hali ana jo. Chocho munyachi usandu hiunalifutula ni akwa yifuchi. Ni e alemu ni akwa kuyula hatetekela mu mulonga uno.

³ Muze nevwile chino chuma nasonyene chikuto chami ni hina liami lia ngungu, nasuchile kambu jami ni wevu wami ni kutwama ni kulishimwoka.

⁴ Henaho waze eswe achikimine ha maliji a Zambi ya Izalele akungulukilile kuli yami mumu ha mulonga wa akwa unjize. Ami natwamine nikulishimwoka ndo ku ola ya mulambu wa ngoloshi.

⁵ Ha ola ya mulambu wa ngoloshi nakatukile ku kulilelesa chami, ni chikuto ni hina ya kusonya. Nazondamine ha makungunwa jami nikwolola moko jami kuli Yehova Zambi yami.

⁶ Yingwamba ngwami, Zambi yami, ngunevu kú, ni mutwe yipu! Sonyi ngunevu kuhetula meso jami kuli yena Zambi yami. Mumu uhenge wetu hiwalumbama helu lia mitwe yetu, ni uhie wetu hiwaliwezela ndo ku malelwa.

⁷ Chize ku matangwa ja tulamba hitwahia pundu ndo musono; mba ha uhenge wetu, yetu ni mianangana jetu, ni asasendote jetu, hanatukunjika ku moko ja mianangana ja yifuchi ku katana, ni ku ufunge, ni kutupupa, ni kutuhepwisa chize chapwa musono

⁸ Haliapwila ha kamwe kashimbu hatwaha vumbi kuli Yehova Zambi yetu akatwehe amwe masalila akwomboka, akatwehe ngwe lumbambo muma mwenyi musandu, hanga Zambi yetu akatupangulwise meso jetu, akatwehe kuhuzuluka hakehe mu undungo wetu.

⁹ Mumu tuli ndungo, hindu Zambi katwehukile mu undungo wetu, alioze hatwaha utu wa zango kumeso ja mianangana a Persia atwehe kuhuzuluka tukatunge zuwo lia Zambi yetu, tukatunge nawa haze hanalienyeka tukapwe ni chipanga-cha-mawe mu Yunda ni mu Yerusaleme.

¹⁰ Alioze haliapwila, Zambi yetu, yika mutwamba ha chuma chino? Mumu hitwehuka shimbi je,

¹¹ jize watumine kuli tuvumbi twe aprofeta ngwe, Chifuchi chize nunayi kutambula, chifuchi cha luchisa mumu ha luchisa wa atu a yifuchi, ni yizelwokeso yo yize hiyachizalisa ni luchisa, chize ku songo limwe ndo ku songo likwo.

¹² Kashika kanda nuhana anenu a mapwo kuli ana jo a malunga, kanda nutambula ana jo a mapwo hali anenu a malunga. Kanda nufupa sambukila yo chipwe kuwaha cho nilimwe tangwa, hanga nukatakame, nukalie yipema ya chifuchi nukachihichike chihinga kuli ana jenu ndo ku miaka.

¹³ Lamba lino Zambi yetu hatwaha liakeha ha unene wa unhenge wetu, se hiwatuhichika atu amwe a piliwiji. Mba helu lia yino yuma yeswe hiyatupwila mumu ha yitanga yetu yipi ni uhie wetu unene,

¹⁴ mba mututangula shimbi je cheka nawa, ni kulinunga ni atu aze akulinga yuma yino ya luchisa? Te kuchi kutenuka ni yetu ni kutujimisa ndo kukwasalile niumwe, chipwe umwe yoze wa kwomboka?

¹⁵ Yehova, Zambi ya Izalele! Uli mukwa ululi! mumu hitwasala ngwe atu a piliwiji a kwomboka—chize twapwa kumeso je musono. Tala, tuli kumeso je ni uhie wetu, mumu niumwe mahasa kumana kumeso je mumu ha chino chuma.