Ezra 8 - MUKANDA USANDU WA ZAMBI 1975

¹ Wano e akwa lutwe mu minyachi ya atato, ni yino ye yisemuko ya waze akatukile ku Babilonia ni yami ha miaka ya mwanangana Artasherke.

² Kuli ana ja Finehase, Ngeshome; kuli ana ja Itama, Daniel; kuli ana ja David, Hatuse.

³ Munyachi wa Shekania: kuli ana ja Paroshe, Zekaria, mba hamwe nenyi alwile ku yisemuko ya malunga kulakaji ni makumi atano.

⁴ Kuli ana ja Pahata-moape, Elionai, mwana Zerahia, ni kulakaji aali a malunga hamwe nenyi.

⁵ Kuli ana ja Shekania, mwe mwana wa Jahaziele ni kulakaji atatu a malunga hamwe nenyi.

⁶ Kuli ana ja Adine, Ebede mwana Jonatas, ni makumi atano a malunga hamwe nenyi.

⁷ Kuli ana ja Elame, Jesaia mwana Atalia, ni makumi shimbiali a malunga hamwe nenyi.

⁸ Kuli ana ja Shefatia, Zebadia mwana Mikele, ni makumi nake a malunga hamwe nenyi.

⁹ Kuli ana ja Joabe, Obadia mwana Jehiele, ni kulakaji aali ni kumi ni nake a malunga hamwe nenyi.

¹⁰ Kuli ana ja Shelomite, mwe mwana wa Josefia ni kulakaji ni makumi asambano a malunga hamwe nenyi.

¹¹ Kuli ana ja Bebai, Zekaria mwana Bebai, ni makumi aali a malunga ni malunga nake hamwe nenyi.

¹² Kuli ana ja Azegate, Johanane mwana Hakatane, ni kulakaji a malunga ni malunga kumi hamwe nenyi.

¹³ Ha kusula ana ja Adonikame, majina jo wano: Elifelete, ni Jehiele, ni Shemaia, ni makumi asambano a malunga hamwe no.

¹⁴ Kuli ana ja Bikavaia, Utai ni Zabude, ni makumi shimbiali a malunga hamwe no.

¹⁵ Naakungulwilile ku Lwiji yoze unayi ku Ahava, mba twatwamineko matangwa atatu. Natalile e atu, ni asasendote, alioze chawanyine niamwe ana ja Levi.

¹⁶ Kashika natumine kusaka Elieza, ni Ariele, ni Shemaia, ni Elenatane, ni Jaribe, ni Elenatane, ni Natane, ni Zekaria, ni Meshulame, eswe akwa lutwe. Nasakile nawa Joaribe ni Elenatane, o te alongeshi.

¹⁷ Naatumine kuli Ido, mukwa lutwe ku Kasifia, akambe kuli Ido ni usoko wenyi A-Netinime ku Kasifia akatunehene akwa kuvumbika mu zuwo lia Zambi yetu.

¹⁸ Mba nikulita ni kwoko lipema lia Zambi hali yetu yatunenena umwe lunga wa mana wa kuli ana ja Mahile, mwana Levi, mwana Izalele; ni Sherebia hamwe ni ana jenyi a malunga ni usoko wenyi, kumi ni nake;

¹⁹ ni Hashabia, ni hamwe nenyi Jesaia wa kuli ana ja Merari ni usoko wenyi ni ana jo a malunga, makumi aali;

²⁰ ni A-Netinime waze David ni alemu akwo te akunjikile ku uvumbiko wa A-Levi, kulakaji aali ni makumi aali. A-Netinime eswe a kutongola ku majina jo.

²¹ Mba ku Lwiji Ahava nasele shimbu lia kulitwamina kulia tukalilelese kumeso ja Zambi yetu tukafupe kuli iye atwehe jila yinalulama, hali yetu, ni ana jetu, ni upite wetu weswe.

²² Mumu sonyi nevwile kwita kuli mwanangana mbunga ya maswalale ni tuvwalu kutufunga kuli akwa kole mu jila, se hitwamba kuli mwanangana ngwetu, Kwoko lia Zambi lili hali waze eswe akumufupa kwalinga chipema; alioze tachi jenyi ni Utenu wenyi kuyakulimika ni waze eswe akumwehuka.

²³ Kashika twalitwaminyine kulia nikulemba kuli Zambi yetu ha chuma chino, mba watupanjikile.

²⁴ Mba nahandunwine kumi ni aali akwa lutwe hakachi ka asasendote: Sherebia ni Hashabia, ni kumi lia asasendote ni akwo hamwe no.

²⁵ Napezalishile kuli ayo prata ni oru ni yikwachilo, milambu ha zuwo lia Zambi yetu yize mwanangana, ni tuliamanga, ni alemu jenyi, ni A-Izalele eswe apwileko ahanyine.

²⁶ Napezalishile mu moko jo kulakaji asambano a *talentu ja prata ni makumi atano a talentu; ni yikwachilo ya prata, kulakaji umuwika wa *talentu, ni kulakaji umuwika wa *talentu ja oru,

²⁷ ni makumi aali a misenge ya oru ya kanunu ka ndarike, ni yikwachilo yiali ya unengu upema wa kulejima, ulemu ngwe oru.

²⁸ Yingwamba kuli ayo ngwami, Yenu nuli asandu kuli Yehova, ni yino yikwachilo neyo yisandu; ni prata ni oru mulambu wa mbunge kuli Yehova Zambi ya tulamba twenu.

²⁹ Lenu nukayifunge ndo munukayipezalisa kumeso ja asasendote alutwe ni A-Levi, ni alemu a minyachi ya atata mu Izalele ku Yerusaleme mu yipatulo ya zuwo lia Yehova.

³⁰ Chocho asasendote ni A-Levi yatambula pezu ya prata, ni oru, ni yikwachilo, akayinehe ku Yerusaleme ku zuwo lia Zambi yetu.

³¹ Mba yitukatuka ku Lwiji Ahava ha tangwa kumi ni liamuchiali lia kakweji mutangu tukaye ku Yerusaleme. Ni kwoko lia Zambi yetu liapwile hali yetu, yatupulula kuli akwa kole ni akwa kujikinyina mu jila.

³² Yituheta ku Yerusaleme, hitutwamako matangwa atatu.

³³ Mba ha tangwa liamuchiwana twapezalishile prata, ni oru, ni yikwachilo mu zuwo lia Zambi yetu nikuyikunjika kuli Meremote mwana Uriya mwe sasendote. Kwapwile hamwe nenyi Eleazare mwana Finehase, ni hamwe no Jozabade mwana Yeshua, ni Noadia mwana Binui, A-Levi.

³⁴ Yeswe ayisele chinyingi ha kwalula ni ha kupezalisa. Ni pezu yeswe ayisonekene haze hene.

³⁵ Akwa unjize waze akatukile ku chifuchi cha mbala alambwile milambu ya kulumba kuli Zambi ya Izalele; kumi lia kuji a ngombe ni kuji aali hali A-Izalele eswe; makumi livwa a kuji a mapanga ni kuji asambano; makumi shimbiali a ana-mapanga ni anamapanga shimbiali; ni kumi lia kuji a pembe ni kuji aali mulambu ha shili. Chino cheswe chapwile mulambu wa kulumba kuli Yehova.

³⁶ Mba akunjikile mikanda ya chiyulo cha mwanangana kuli akwa kuyula a mwanangana ni anguvulu sali lize lia Lwiji; mba o akwashile atu ni lie zuwo lia Zambi.