Ezra 7 - MUKANDA USANDU WA ZAMBI 1975

¹ Kulutwe lia yino yuma shimbu Artasherke mwanangana wa Persia machiyula, Ezera mwana Seraia, mwana Azaria, mwana Hilekia,

² mwana Shalume, mwana Zadoke, mwana Ahitube,

³ mwana Amaria, mwana Azaria, mwana Meraiote,

⁴ mwana Zerahia, mwana Uzi, mwana Mbuke,

⁵ mwana Abishua, mwana Finehase, mwana Eleazare, mwana Arone sasendote mukwa lutwe:

⁶ yono Ezera yakatuka ku Babilonia, mukwa kusonyeka wa kujama mu milimo ya shimbi ja Mose jize Yehova Zambi ya Izalele wahanyine. Mwanangana yamwaha yeswe echile nikulita ni kwoko lia Yehova Zambi yenyi hali iye.

⁷ Kwayile ku Yerusaleme nawa amwe A-Izalele, ni asasendote, ni A-Levi, ni njimba, ni akwa mapito, ni A-Netinime ha mwaka wamuchishimbiali wa mwanangana Artasherke.

⁸ Aye yeza ku Yerusaleme mu kakweji wamuchitano, mu mwaka wamuchishimbiali wa mwanangana.

⁹ Mumu ha tangwa litangu lia kakweji mutangu yakatuka ku Babilonia, mba ha tangwa litangu lia kakweji wamuchitano yaheta ku Yerusaleme nikulita ni kwoko lipema lia Zambi yenyi hali iye.

¹⁰ Mumu Ezera te hanase mbunge yenyi kufupa shimbi ja Yehova, ni kujilinga, ni kulongesa A-Izalele yiyulo ni upatwilo.

¹¹ Kuli sasendote Ezera mwe mukwa kusonyeka maliji a shimbi ja Yehova, ni yiyulo yenyi kuli A-Izalele, mwanangana Artasherke wahanyine mukanda uno wa kwamba ngwo,

¹² Artasherke mwanangana wa mianangana kuli sasendote Ezera, mwe mukwa kusonyeka shimbi ja Zambi ya mwilu, tunakumeneka.

¹³ Ngunase shimbi ngwami, A-Izalele eswe, ni asasendote jo, ni A-Levi mu yifuchi yami anazange ni mbunge jo ene kuya ku Yerusaleme, aye hamwe ni yena.

¹⁴ Se kanakutumu kuli mwanangana ni tuliamanga twenyi shimbialiukahule chinyingi ha kutwala kuli A-Yunda ni A-Yerusaleme nikulita ni shimbi ja Zambi ye jize jili mu kwoko lie.

¹⁵ Unambata nawa prata ni oru yize mwanangana ni tuliamanga twenyi hahana ni mbunge yipema kuli Zambi ya Izalele yoze uli ni zuwo lienyi mu Yerusaleme,

¹⁶ ni prata ni oru yeswe unawana mu chifuchi cheswe cha Babilonia, hamwe ni milambu ya mbunge ya atu, ni ya asasendote, waze malambula ni mbunge ha zuwo lia Zambi yo lize lili mu Yerusaleme.

¹⁷ Kashika musela mbunge ye kulanda ni mbongo jino kuji a ngombe ni kuji a mapanga ni ana-mapanga hamwe ni milambu yo ya wunga, ni milambu yo ya kunwa, ukayitambule ha chilumbilo cha zuwo lia Zambi yenu lize lili mu Yerusaleme.

¹⁸ Mba prata ni oru yize yasala cheswacho yena ni akwenu munuzanga kulinga nayo hilingenu nikulita ni upale wa Zambi yenu.

¹⁹ Ni yikwachilo yize anakwehe ha milimo ya zuwo lia Zambi ye hana kumeso ja mwe Zambi ya Yerusaleme.

²⁰ Mba cheswacho muchihona nawa ha zuwo lia Zambi ye muzanga kuhana, hichiza mu zuwo lia upite wa mwanangana.

²¹ Ni yami mwene, mwe mwanangana Artasherke, ngunatumu shimbi kuli akwa kufunga upite sali lize lia Lwiji ngwami, Cheswacho sasendote Ezera mukwa kusonyeka shimbi ja Zambi ya mwilu mafupa kuli yenu, mwehenu, ni kuhona ka,

²² ndo ku kulakaji lia *talentu ja prata, ni kulakaji lia njongo ja tiliku, ni kulakaji lia *mbate ja vinyu, ni kulakaji lia *mbate ja maji, ni mungwa chasele cheseko.

²³ Cheswacho matuma mwe Zambi ya mwilu nuchilinge zwa ha zuwo lia Zambi ya mwilu kuchina mukupwa ufwatulo ha yifuchi ya mwanangana ni ana jenyi.

²⁴ Chikwo nawa tunanulweze ngwetu, Ha kutwala kuli asasendote, ni A-Levi, ni njimba, ni akwa mapito, ni A-Netinime, hanji tuvumbi twa zuwo alio lia Zambi, kuchichi kutá kwafwetesa milambu hanji lijimu, hanji mwombo.

²⁵ Ni yena, Ezera, nikulita ni mana a Zambi ye aze uli no, ukatongole akwa kuyula ni ngaji akayule atu eswe ali lize sali lia Lwiji, waze eswe ananyingika shimba ja Zambi ye. Ni yoze kajinyingikine umulongesejo.

²⁶ Ni yoze kechi kutayiza shimbi ja Zambi ye, ni shimbi ja mwanangana amupatwile lume, chipwe kufwa, hanji kumuhuma, hanji kumutambula yikumba yenyi, hanji zuwo lia ususu.

²⁷ Yehova akafumane, mwe Zambi ya tulamba twetu yoze wasele chuma chino mu mbunge ya mwanangana, akawahise zuwo lia Yehova mu Yerusaleme.

²⁸ Iye nawa hahetesa kuli yami utu wa zango lienyi kumeso ja mwanangana ni tuliamanga twenyi, ni kumeso ja akwa ndundo alemu a mwanangana. Angutakamishine nikulita ni kwoko lia Yehova Zambi yami hali yami, mba nachijile kuli A-Izalele amwe akwa lutwe aye ni yami.