Ezra 6 - MUKANDA USANDU WA ZAMBI 1975

¹ Kashika Dariu yasa shimbi, yafupa mu zuwo lia mikanda ya sango mu Babilonia kuze kakusweka upite.

² Alioze yawana ku Akemeta, mu zuwo lia mwanangana, mu chifuchi cha Media, mukanda umwe ni maliji wano asonewenemo mu Sango:

³ Ha mwaka utangu wa mwanangana Siru, mwanangana Siru wasele shimbi ngwenyi, Ha kutwala ku zuwo lia Zambi ku Yerusaleme—atunge lie zuwo kuze mashihila yitapo. Ase fundamentu ya tachi. Chizundamo chalio makumi asambano a mbandu, ni kutoha chalio makumi asambano a mbandu.

⁴ Alitunge ni mikala yitatu ya mawe anene ni mukala umuwika wa mitondo yaha. Ndando yalio ayichize ku upite wa zuwo lia mwanangana.

⁵ Chikwo nawa yikwachilo ya oru ni prata ya mu zuwo lia Zambi, yize Nabukanezore wachijile mu tembele ya Yerusaleme nikuyineha ku Babilonia, ayihilwise ayitwale cheka nawa ku tembele ya Yerusaleme; nukayise mu zuwo lia Zambi, chikwachilo cheswe kuma kwacho.

⁶ Kashika ena Tatenaia mukwa kuyula sali lize lia Lwiji, ni yena Shetare-bozena ni masepa je akwa kuyula sali lize lia Lwiji, katukenuko,

⁷ nweche milimo ya zuwo alio lia Zambi. Echenu mwe mukwa kuyula A-Yunda ni makulwana jo atunge zuwo alio lia Zambi homa halio.

⁸ Chikwo nawa shimbi ngunase ha kutwala ku chize munulinga kukwasa wano makulwana ja A-Yunda ha kutunga zuwo alio lia Zambi. Ku upite wa mwanangana, ngwami, ku milambu ya lize sali lia Lwiji nukahane kuli wano malunga, ni kuhona ka, hanga kechi kakwikiwa.

⁹ Yimbembe a ngombe, ni kuji a mapanga, ni anamapanga, akapwe milambu ya kulumba kuli Zambi ya mwilu; ni tiliku, ni mungwa, ni vinyu, ni maji, nikulita ni liji lia asasendote a ku Yerusaleme aaheyo tangwa ha tangwa, ni kuhona ka;

¹⁰ hanga akalambule yitapo ya lupembo mupema kuli Zambi ya mwilu, akalembele mwono wa mwanangana ni anenyi a malunga.

¹¹ Ngunase nawa shimbi, ngwami, Mweswawo malumuna liji lino, akachize mukambo ku zuwo lienyi, akamuzundule nikumuhachilaho. Atenge nawa zuwo lienyi retrete ha mulonga wenyi.

¹² Mba mwe Zambi yoze hatungisako jina lienyi akapupe mianangana eswe ni atu eswe waze molola moko jo kwalumuna shimbi yino, hanji kwonwona zuwo alio lia Zambi lili ku Yerusaleme. Yami Dariu hinasa shimbi yino. Chikalingiwe, ni kuhona ka.

¹³ Kashika Tatenaia mukwa kuyula lize sali lia Lwiji, ni Shetare-bozena ni masepa jo, se mwanangana Dariu hatuma, yachilinga; kahonene nichimwe.

¹⁴ Ni makulwana ja A-Yunda yatunga nikusenya kulutwe mumu ha kuprofeteza cha profeta Hagaia ni Zekaria mwana Ido. Yatunga, yamanununa nikulita ni shimbi ya Zambi ya Izalele, nikulita ni chiyulo cha Siru, ni Dariu, ni Artasherke, mwanangana wa Persia.

¹⁵ Amanunwine zuwo lino ha tangwa liamuchitatu lia kakweji wa Adare mu mwaka wamuchisambano wa kuyula cha mwanangana Dariu.

¹⁶ A-Izalele, ni asasendote, ni A-Levi, ni akwo a ku unjize afungile ni chiseke chiwanyino cha kutumbikila ku usandu zuwo lino lia Zambi.

¹⁷ Yalambula ha kutumbikila ku usandu cha zuwo lino lia Zambi kulakaji lia kuji a ngombe, ni kulakaji aali a kuji a mapanga, ni kulakaji awana a ana-mapanga. Mulambu ha shili hali A-Izalele eswe, ashihile kumi lia kuji a pembe, ni kuji a pembe aali nikulita ni kwalula cha minyachi ya Izalele.

¹⁸ Yasela nawa asasendote mu ngango jo, ni A-Levi mu mikana yo, ha uvumbiko wa Zambi mu Yerusaleme, ngwe chinasonewa mu mukanda wa Mose.

¹⁹ Atu ja ku unjize afungile Chizomboka ha tangwa kumi ni wana lia kakweji mutangu.

²⁰ Mumu asasendote ni A-Levi hanalipemesa hamuwika; eswe apemene. Ashihile chitapo cha Chizomboka hali atu eswe a ku unjize, ni hali asasendote ni akwo, ni hali ene.

²¹ Ni A-Izalele waze akatukile ku unjize, ni waze eswe hanalipalakenya no nikulihandununa ku luchisa wa mavungu a mu chifuchi akafupe Yehova Zambi ya Izalele, o yachilia.

²² Yafunga nawa chiwanyino cha mbolo kuyishi futunwiso matangwa shimbiali ni uwahililo. Mumu Yehova hanaahe uwahililo; hatewulwila mbunge ya mwanangana wa Asuria kuli ayo akatakamise moko jo mu milimo ya zuwo lia Zambi, mwe Zambi ya Izalele.