Ezra 5 - MUKANDA USANDU WA ZAMBI 1975

¹ Mba aprofeta Hagaia ni Zekaria mwana Ido yaprofeteza kuli A-Yunda aze apwile mu Yunda ni mu Yerusaleme. Yaprofeteza kuli ayo mu jina lia Zambi ya Izalele.

² Mba Zorobabele mwana Salatiele ni Yeshua mwana Jozadake yakatuka, yaputuka kutunga zuwo lia Zambi lize lili mu Yerusaleme; ni aprofeta a Zambi apwile hamwe no nikwakwasa.

³ Ha matangwa aze kwejile kuli ayo Tatenaia mukwa kuyula sali lize lia Lwiji, ni Shetare-bozena ni masepa jo. Yamba kuli ayo ngwo, Iya wanuhele chiyulo kutunga zuwo lino nikumanuna chipanga chino cha mawe?

⁴ Mba yaahula nawa ngwo, Majina ja akwa kutunga neya neya?

⁵ Alioze liso lia Zambi lio liatalile makulwana ja A-Yunda. Kaamanyishine ndo chikuma chino muchiheta kuli Dariu akahilwise mukanda wa kukumbululacho.

⁶ Mukanda uze Tatenaia mukwa kuyula sali lize lia Lwiji ni Shetare-bozena ni masepa jenyi akwa kuyula sali lize lia Lwiji atumine kuli mwanangana Dariu;

⁷ mumu yatuma mukanda kuli iye nikwanba ngwo, Kuli mwanangana Dariu, tunanumeneka.

⁸ Tunanulweze ngwetu, Twayile ku chifuchi cha Yunda, ku zuwo lia mwe Zambi munune. Kanalitungu ni mawe anene nikusa mitondo ha mawe, mba milimo yino yinende ni tachi ni kuwaha mu moko jo.

⁹ Twahulile makulwana aze ngwetu, Iya wanuhele chiyulo cha kutunga zuwo lino ni kumanununa chipanga chino cha mawe?

¹⁰ Twaahulile majina jo nawa hanga tukanulweze ni kusoneka majina ja malunga akwa lutwe.

¹¹ Yatukumbulula ngwo, Etu tuli tuvumbi twa Zambi ya mwilu ni hashi. Tunatungu zuwo lino alitungile miaka kushi, te umwe mwanangana munene wa Izalele walitungile ni kulimanununa.

¹² Alioze kulutwe tulamba twetu ehile Zambi ya mwilu, aye yatenuka, yaakunjika ku moko ja Nabukanezore mwanangana wa Babilonia, mwe Ka-Kaletea, aye yonwona zuwo lino; yambata e atu, yaatwala ku Babilonia.

¹³ Alioze ha mwaka utangu wa Siru mwanangana wa Babilonia, mwe mwanangana Siru wasele shimbi atunge zuwo lino lia Zambi.

¹⁴ Chikwo nawa yikwachilo ya oru ni prata ya mu zuwo lia Zambi, yize te Nabukanezore hachiza mu tembele mu Yerusaleme nikuyitwala ku tembele mu Babilonia, Siru wayichijile mu tembele ya Babilonia wayikunjikile kuli umwe jina lienyi Sheshabazare nikumupwisa mukwa kuyula.

¹⁵ Yamba kuli iye nawa ngwenyi, Tambula yikwachilo yino uye Ukayise mu tembele mu Yerusaleme atunge nawa zuwo lia Zambi homa halio.

¹⁶ Kashika mwe Sheshabazare yeza, hanase fundamentu ya zuwo lia Zambi mu Yerusaleme; mba chize ku matangwa aze ndo haliapwile machitunga hindu kuliahwile.

¹⁷ Kashika nyi chanupemena mwanangana, afupe mu zuwo lia upite aku ku Babilonia nyi chamwenemwene mwanangana Siru wasele shimbi kutunga zuwo lino lia Zambi ku Yerusaleme, atusonekene cheswacho chanupemena ha chikuma chino.