Ezra 4 - MUKANDA USANDU WA ZAMBI 1975

¹ Achi muze akwa kole ja A-Yunda ni A-Mbenjamine evwile ngwo, Atu ja ku unjize kanatungila tembele Yehova Zambi ya Izalele,

² o yeza kuli Zorobabele ni kuli akwa lutwe a minyachi ya atato ngwo, Tutayizenu kutunga hamwe ni yenu; mumu ni yetu nawa tunafupu Zambi yenu chimuwika ni yenu. Ni yetu nawa twakumulambula yitapo chize ku matangwa a Ezare-Hadone mwanangana wa Asuria yoze watunehene kuno.

³ Alioze Zorobabele ni Yeshua ni akwo akwa lutwe mu minyachi ya atato mu Izalele yamba kuli ayo ngwo, Enu kunushi nichimwe ni yetu kutungila zuwo Zambi yetu. Yetwene ukawetu mututungila Yehova Zambi ya Izalele ngwe Siru mwanangana wa Persia hatutuma.

⁴ Mba enya chifuchi ahongesele moko ja A-Yunda nikwahungumiona ha kutunga.

⁵ Yafweta akwa mana kulimika no kufuwisa chize A-Izalele apalile kulinga, matangwa eswe a Siru mwanangana wa Persia ndusu ndo ku matangwa a kuyula Dariu mwanangana wa Persia.

⁶ Mba ha kuputuka kuyula Ahashueru o yasoneka mukanda kusuma waze atwamine mu Yunda ni Yerusaleme.

⁷ Ha matangwa a Artasherke kwasonekene Bishalame, ni Miteredate, ni Tabiele, ni akwo masepa jo kuli Artasherke mwanangana wa Persia. Maletra apwile a limi lia Seria, ni maliji nawa mu limi lia Seria.

⁸ Rehume mwe kaliamanga ni Shimishaia mukwa kusonyeka yasoneka mukanda kuli mwanangana Artasherke wa kulimika ni A-Yerusaleme maliji ano.

⁹ Yausoneka kaliamanga Rehume, ni Shimishaia mukwa kusonyeka, ni masepa jo akwo: ngaji, ni nguvulu, ni tupitau, ni A-Persia, ni A-Ereke, ni A-Babilonia, ni A-Shushane e A-Elame aze,

¹⁰ ni mavungu akwo waze mwe munene mulemu Asenapare yaneha nikwasela mu Samaria ni mu chifuchi cha kujingilika mu sali lia Lwiji.

¹¹ Maliji a mu mukanda atumine kuli mwanangana Artasherke ngwo, Tuvumbi twenu malunga a mu sali lia Lwiji tunanumeneka.

¹² Chatamba mwanangana kunyingika, waze A-Yunda akatukile kuli yenu ejile kuno kuli yetu ku Yerusaleme haputuka kutunga chihunda chize cha uhulia ni ungulungulu. Kanamane yipanga-ya-mawe; kanakolesa nawa fundamentu.

¹³ Chatamba yenu mwanangana kunyingika ngwetu, Nyi matunga chihunda chino ni kumanununa yipanga-ya-mawe kechi kufweta milambu, chipwe lijimu, chipwe mwombo, mba ha kusula mahonesa mianangana.

¹⁴ Kashika, se yetu tunali mungwa wa ku palasiu kutwahashile kwatayiza kusaula mwanangana. Kashika tunatumu kwambulwila mwanangana,

¹⁵ akafupe mu mukanda wa Sango ja akakenu, mba munuwana mu mukanda wa sango ngwo, Chihunda chino cha uhulia; chakupinjisa mianangana ni anguvulu mba chipwe kushi avundwilemo utwahe. Ha chikuma chino apupile chihunda chino.

¹⁶ Tunambulwila mwanangana ngwetu, Nyi matunga chihunda chino ni kumanununa yipanga-ya-mawe kunuchi kupwa ni chihanda sali lino lia Lwiji.

¹⁷ Mba mwanangana yatuma kumbululo kuli kaliamanga Rehume ni mukwa kusonyeka Shimishaia ni kuli akwo masepa jo atwama mu Samaria ni mu chifuchi cheswe sali lize lia Lwiji ngwenyi, Tunanumeneka.

¹⁸ Mukanda nwatutumine hangutangilawo ndusu.

¹⁹ Nahanyine shimbi, mba hafupa, hawana ngwo, Chipwe kushi akwa chihunda chino akatukilile mianangana, ni chikwo nawa uhulia ni utwahe auwanyinemo.

²⁰ Kwapwile nawa mianangana a ndundo mu Yerusaleme akwa kuyula chifuchi cheswe lize sali lia Lwiji nikutambula milambu, ni lijimu, ni mwombo.

²¹ Kashika senu shimbi nukamanyise wano malunga, kanda atunga chihunda chino ndo mungwaaha nawa shimbi.

²² Nukanyame kanawa; kanda nuheha ni chuma chino kuchina hanji chipi muchiliwezela nikuhonesa mianangana.

²³ Ha kutanga mukanda wa mwanangana Artasherke kuli Rehume ni mukwa kusonyeka Shimishaia ni masepa jo, yaya fuji ku Yerusaleme kuli A-Yunda; yaamanyisa ni tachi ni chiyulo.

²⁴ Henaho kwaholele milimo ya zuwo lia Zambi ku Yerusaleme. Yaholele ndo ku mwaka wamuchiali wa Dariu mwanangana wa Persia.