Ezra 3 - MUKANDA USANDU WA ZAMBI 1975

¹ Ha kuheta kakweji wamuchishimbiali A-Izalele te mu yihunda atwama, atu akungulukile ngwe mutu umuwika ku Yerusaleme.

² Henaho kwakatukile Yeshua mwana Jozadake ni asasendote ni akwo, ni Zorobabele mwana Salatiele ni usoko wenyi. Yatunga chilumbilo cha Zambi ya Izalele akalambwileho milambu ya kulumba ngwe chinasonewa mu shimbi ja Mose mwe mutu wa Zambi.

³ Yatwamisa chilumbilo ha umanyino wacho, mumu evwilile woma akwa yifuchi. Yalambwilaho milambu ya kulumba kuli Yehova, milambu ya kulumba chimene ni chingoloshi.

⁴ Yafunga nawa chiwanyino cha yisakila, ngwe chinasonewa; yalambula milambu ya kulumba ya tangwa ha tangwa nikulita ni shimbi, ngwe aaselelecho cha tangwa ha tangwa.

⁵ Mba kulutwe milambu ya kulumba ya matangwa eswe, ni milambu ya kakweji mwaha, ni ya yiwanyino yeswe ya Yehova, ya kufunjika, yize aaselele, ni ya mweswe wahanyine ni mbunge yenyi mulambu wa mbunge kuli Yehova.

⁶ Chize ku tangwa litangu lia kakweji wamuchishimbiali yaputuka kulambula kuli Yehova milambu ya kulumba. Alioze kanda asa fundamentu ya zuwo lia Yehova.

⁷ Yahana nawa mbongo kuli akwa kululika mawe, ni kuli akarpinteru; ni kulia ni kunwa ni maji kuli A-Sendone ni A-Teru akachize mitondo ya sedru ku Lebano nikuyineha ku kalungalwiji ku Yopa, nikulita ni shimbi yize Siru mwanangana wa Persia waahele.

⁸ Ha mwaka wamuchiali wa kwiza cho ku zuwo lia Zambi ku Yerusaleme, ha kakweji wamuchiali aputukile Zorobabele mwana Salatiele ni Yeshua mwana Jozadake ni usoko wo asasendote ni A-Levi, ni waze eswe akatukile ku ufunge heza ku Yerusaleme. Yatongola A-Levi, waze hanahete ku makumi aali a miaka akalayile milimo ya mu zuwo lia Yehova.

⁹ Henaho kwamanyine Yeshua ni ana jenyi a malunga ni usoko wenyi, ni Kamiele ni ana jenyi a malunga, ana ja A-Yunda a malunga, eswe hamuwika, akalayile akwa milimo mu zuwo lia Zambi; ni ana ja Henadade a malunga hamwe ni ana jo a malunga ni usoko wo A-Levi.

¹⁰ Muze akwa kutunga asele fundamentu ya tembele ya Yehova aselele asasendote mu uzalo wo ni yitavwi, ni A-Levi ana ja Asafwe ni sembalu, akachichimieke Yehova nikulita ni yiyulo ya David mwanangana wa Izalele.

¹¹ Yemba umwe kuli mukwo ni mukwo uhaliso ni kusakwila kuli Yehova ngwo, Mumu iye mupema, Mumu utu wa zango lienyi kuli Izalele wa mutolo. Mba muze hahalisa Yehova atu eswe yakololoka ni liji linene mumu fundamentu ya zuwo lia Yehova hayisa.

¹² Alioze anji a kuli asasendote, ni A-Levi, ni akwa lutwe mu minyachi yaatato, makulwana aze hamona zuwo litangu, muze hasa fundamentu ya zuwo lino kumeso jo yalila mbimbi. Alioze anji akololokele ni kulikwiza.

¹³ Chocho atu kahashile kusa chinyingi hakachi ka zungo lia kulikwiza ni zungo lia kulila cha atu, mumu atu akololokele ni liji linene ni zungo liacho alivwile kusuku.