Ezra 1 - MUKANDA USANDU WA ZAMBI 1975

¹ Ha mwaka utangu wa Siru mwanangana wa Persia, hanga liji lia Yehova ku kanwa lia Jeremia likamanunuke, Yehova yasangumuna mbunge ya Siru mwanangana wa Persia akasanyike mutambi ndusu mu wanangana wenyi weswe. Yausoneka nawa ngwenyi,

² Siru mwanangana wa Persia ngwenyi, Yehova Zambi ya mwilu hangwaha mawanangana eswe a hashi. Mba iye hangwaha shimbi kumutungila zuwo mu Yerusaleme mu chifuchi cha Yunda.

³ Mweswawo uliko hakachi ka yenu eswe atu jenyi, Zambi yenyi apwe hamwe nenyi akanduke ku Yerusaleme mu Yunda, atunge zuwo lia Yehova Zambi ya Izalele mu Yerusaleme (iye mwe Zambi lume).

⁴ Mba mweswawo masala kweswako atunga, enyembo jenyi amukwase ni prata, ni oru, ni upite, ni yimuna, helu lia mulambu wa mbunge ha zuwo lia Zambi lize lili mu Yerusaleme.

⁵ Henaho akwa lutwe mu minyachi ya atato a Yunda ni Mbenjamine yakatuka, ni asasendote, ni A-Levi, waze eswe Zambi hasangumuna mbunge jo akaye akatunge zuwo lia Yehova lili mu Yerusaleme.

⁶ Ni eswe a kwajingilika yatakamisa moko jo ni yikwachilo ya prata, ni oru, ni upite, ni yimuna, ni yikumba yilemu, helu lia milambu ya mbunge.

⁷ Chikwo nawa mwanangana Siru yatuhwisa yikwachilo ya mu zuwo lia Yehova yize Nabukanezore hachiza ku Yerusaleme nikuyisa mu zuwo lia mazambi jenyi.

⁸ Yenayo Sira mwanangana wa Persia yachiza nawa ku kwoko lia Miteredate, mukwa kufunga upite, ni kuyalwila kuli Sheshabazare mukwa lutwe wa Yunda.

⁹ Kwalula chayo chino: makumi atatu a mbasia ja oru, ni kanunu ka mbasia ja prata, ni makumi aali a poko ni poko livwa;

¹⁰ makumi atatu a misenge ya oru, ni kulakaji awana a misenge ni misenge kumi, ya prata yamuchiali, ni kanunu ka yikwachilo yikwo.

¹¹ Yikwachilo yeswe ya oru ni prata yapwile tununu atano ni kulakaji awana. Yino yeswe Sheshabazare yambata muze akwa unjize akatukile ku Babilonia nikuya ku Yerusaleme.