Ezekiel 9 - MUKANDA USANDU WA ZAMBI 1975

¹ Aye yatambika mu matwi jami ni liji linene ngwenyi, Enu akwa kushiha a chihunda, kundamenu, mweswe ni katana kenyi wa kwonwona nenyi mu kwoko.

² Chocho malunga asambano yakatuka ku sali lia chikolo cha ku tunda chize chatalikisa ku Norte. Mweswe kali ni katana mu kwoko lienyi wa kuhana nenyi. Kwejile hamuwika no umwe lunga kanazala mahina a linyu, kali ni chipakumuna cha mukwa kusonyeka mu zalilo yenyi. O yanjila; yamanyina ku chilumbilo cha unengu ku lumbu.

³ Achi uhenya wa Zambi ya Izalele te hiwakatuka ku akerupimi kuze wakutwama, yiuya ku chikolo cha zuwo. Aye yasanyika mutu yoze wa mazalo a linyu, kali ni chipakumuna cha mukwa kusonyeka mu zalilo yenyi.

⁴ Yehova yamba kuli iye ngwenyi, Palika mu chihunda, mwe mu Yerusaleme, ukase mufunda ha mahuma ja malunga aze akutwa mikuma ni kulishimwoka ha mukunda wa yuma ya lwaji akulingamo.

⁵ Kuli akwo yamba, mwe mu matwi jami, ngwenyi, Palikenu ndusu mu chihunda nikumukaula, nukalambe. Liso lienu kulichi kaavwila vumbi; kanda nwalweza keke.

⁶ Shihenu pundu makulwana ja malunga, ni akweze, ni ana-mapwo, ni twanuke, ni mapwo, alioze kanda nusunga niumwe yoze uli ni mufunda. Putukenu ku zuwo liami lisandu. Chocho yaputuka te ni makulwana waze apwile kulutwe lia zuwo.

⁷ Yamba kuli ayo ngwenyi, Chisenu lie zuwo; Zalisenu yize ni afu; yénu! Chocho yaya, yalamba mu chihunda.

⁸ Shimbu machilamba, ni yami nasalile ukawami, yingufulamana hashi nikuteta ngwami, Mwene Yehova! Muonwona waze eswe anasala mu Izalele ha kuzukula ufwatulo ha Yerusaleme?

⁹ Aye yamba kuli yami ngwenyi, Uhie wa munyachi wa Izalele ni wa Yunda unene Wahiana. Chifuchi chazala ni manyinga ni chihunda chazala ni uhenge, mumu kakwamba ngwo, Yehova hanakatuka mu chifuchi; Yehova kamweneko.

¹⁰ Ni yami, liso liami kulichi kaavwila vumbi, chichi kaavwila keke, alioze mungwahilwisa fweto yo ha mitwe yo.

¹¹ Henaho mutu yoze wa mazalo a linyu ni chipakumuna cha mukwa kusonyeka mu zalilo yenyi yaneha nawa liji ngwenyi, Hinalinga chize wangutumanga.