Ezekiel 8 - MUKANDA USANDU WA ZAMBI 1975

¹ Ha mwaka wamuchisambano, ni kakweji wamuchisambano, ni tangwa liamuchitano lia kakweji, shimbu ngunatwama mu zuwo liami ni makulwana ja A-Yunda kanatwama kumeso jami, kwenako kwoko lia Mwene Yehova yilingukwata.

² Yingumona chimwe kusoloka ngwe mutu. Chize ku kulifwa cha mashina ja molu jenyi nikutwala kushi kwapwile kahia; chize ku mashina ja molu jenyi nikutwala ku tunda kwapwile kupanguka ngwe unengu wa kulejima.

³ Yazoza kulifwa cha kwoko, yangukwata ku kambu ja mutwe wami, mba Spiritu yanguzundula hakachi ka hashi ni lilu nikungutwala mu usolwelo wa Zambi ku Yerusaleme, kwe ku unjililo wa chikolo cha yize ya muchima chize chatalikisa ku Norte. Kwenako kwatwama chitwamo cha kaponya ka ukwa, yoze wakuvundula ukwa.

⁴ Kumanyi uhenya wa Zambi ya Izalele uliko ngwe usolwelo uze namona ha chana.

⁵ Aye yamba kuli yami ngwenyi, Mwana mutu, talikisa meso je ku Norte. Chocho yingutalikisa meso jami ku Norte, kumanyi sali lia chikolo cha chilumbilo ku Norte, mwe mu unjililo mwatwama kaponya yono wa ukwa.

⁶ Aye yamba kuli yami ngwenyi, Mwana mutu, unamono chize analingi? Unamono yino yuma ya lwaji akwa munyachi wa Izalele analingi kuno akanguhume kusuku ni zuwo liami lisandu? Hindu mumona yuma yikwo yahiana yino ni lwaji.

⁷ Yanguneha ku chikolo cha yize; ha kutala yingumona chituwa mu yishimi.

⁸ Aye yamba kuli yami ngwenyi, Mwana mutu, fula mu yishimi. Ha kufula mu yishimi, kumanyi pito liliko.

⁹ Aye yamba kuli yami ngwenyi, Njila, umone yuma yipi ya lwaji analingimo.

¹⁰ Chocho yingunjila, yingumona, mba ha yishimi ya kujingilika hasoneka milali yeswe ya tushitu a kukalala, ni tushitu api chikolo, ni tuponya eswe a munyachi wa Izalele.

¹¹ Kumeso jo kwamanyine makumi shimbiali a malunga, makulwana a munyachi wa Izalele, ni Jazania mwana Shafana kanamana hakachi ko. Mweswe kali ni kandeho ka kwochelamo insensu mu kwoko lienyi, ni lelwa lia mwishi wa insensu linafwindangana.

¹² Aye yanguhula ngwenyi, Mwana mutu, hiwamona chize makulwana a munyachi wa Izalele analingi mu milima, mutu mweswe mu yipatulo yenyi ya tuponya? Mumu kakwamba ngwo, Yehova katumwene. Yehova hanakatuka mu chifuchi.

¹³ Yamba nawa kuli yami ngwenyi, Mumona nawa yuma yikwo ya lwaji akulinga kuhiana yino.

¹⁴ Mba yanguneha ku unjililo wa chikolo cha zuwo lia Yehova cha ku Norte, kumanyi kwatwamine mapwo nikulilila Tamuze.

¹⁵ Aye yamba kuli yami ngwenyi, Mwana mutu, hiwamona chino? Mumona nawa yuma yahiana yino ni lwaji.

¹⁶ Yanguneha ndo ku yize ya zuwo lia Yehova ya muchima, kumanyi ku chikolo cha tembele ya Yehova hakachi ka senge ni chilumbilo kwamanyine ngwe makumi aali a malunga ni malunga atano. Kanombo manyima jo ku tembele ya Yehova; meso jo kanatalikisa ku Chivumbuko nikuwayila tangwa ku Chivumbuko.

¹⁷ Yamba kuli yami ngwenyi, Mwana mutu, hiwamona chino? Kumanyi chakeha naye kuli akwa munyachi wa Yunda kulinga yuma ya lwaji yize analingi kuno, akawezele nawa kuzalisa chifuchi ni upupilo, ni kungwihia nawa chikwo? Mba kanase mutondo ku mazulu jo!

¹⁸ Kashika mungulinga ni ufwatulo. Liso liami kulichi kwavwila vumbi; chichi kaavwila keke. Chipwe mateta ni tachi mu matwi jami, chichi kaapanjika.