Ezekiel 7 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Ni yena mwana mutu, Mwene Yehova kanambe ku chifuchi cha Izalele ngwenyi, Songo! Lie songo hiliaheta ha mbango jiwana ja chifuchi.

³ Songo hilianuheta, mba mungusola utenu wami hali yenu. Mungunupatwila nikulita ni ndako jenu. Mungunwaha kastigu ya yitanga yenu yeswe ya lwaji.

⁴ Liso liami kulichi kanuvwila vumbi, chichi kanuvwila keke, alioze mungunwaha kastigu ya kulita ni ndako jenu shimbu yitanga yenu ya lwaji yichili hakachi kenu. Mba munukanyingika yami nguli Yehova.

⁵ Mwene Yehova kanambe ngwenyi, Lamba ha lamba! Kulineza!

⁶ Songo hiliaheta, songo hiliaheta; hilianukasumukina. Talenu, lineza!

⁷ Kuji-ni-tomo lienu hilianuheta, enu nwatwama mu chifuchi. Mwaka hiweza; tangwa hiliakundama; tangwa lia chimbangwinya, kulichi kapwa tangwa lia kulikwiza ha milundu.

⁸ Haliapwila ni shimbu liakuhi munguzukula ufwatulo wami hali yenu, ni kuhwisa utenu wami kulimika ni yenu, ni kunupatwila nikulita ni ndako jenu. Mungunwaha kastigu mumu ha yitanga yenu yeswe ya lwaji.

⁹ Mumu liso liami kulichi kanuvwila vumbi; chichi kanuvwila keke. Mungunwaha kastigu ya kulita ni ndako jenu shimbu yitanga yenu ya lwaji yichili hakachi kenu. Mba munukanyingika yami nguli Yehova, mukwa kulamba.

¹⁰ Talenu lie tangwa! Talenu, lineza! Kuji-ni-tomo lienu hilieza. Mbwechi hiyatemuna yitemo; kulengumuka hichasoka.

¹¹ Upupilo hiwalumuka mbwechi ya ungulungulu. Niumwe malisalaho, chipwe kulumbama cho, chipwe upite wo, chipwe ulemu hakachi ko.

¹² Mwaka hiweza, tangwa linakundama. Mukwa kulanda kanda alikwiza; mukwa kulanjisa kanda alinyenga, mumu ufwatulo unashate mbunga yo yeswe.

¹³ Mumu shimbu achili ni mwono mukwa kulanjisa kechi kahiluklla ku chize hanalanjisa. Mumu usolwelo watwala ku mbunga yo yeswe; niumwe mahilukako; niumwe malitakamisa mu uhenge wa mwono wenyi.

¹⁴ Hasunga chitavwi, halulika yuma yeswe, alioze niumwe kayile ku jita mumu ufwatulo wami washata mbunga yo yeswe.

¹⁵ Haze katana uliko; muchima chilungo ni kapunga. Yoze uli mu yambu mafwa ni katana; yoze uli mu chihunda manonga ni kapunga ni chilungo.

¹⁶ Nyi amwe akwa kwomboka mapwa ni mwono, hindu makapwa ha milundu, ngwe membe a mu yikulo, eswe nikutwa mikuma, mutu mweswe ha mukunda wa uhenge wenyi.

¹⁷ Moko eswe hahonga; makungunwa eswe hazeya ngwe meya.

¹⁸ Kakuzala chikeleyi; mwongo waafuka; sonyi jili ha meso eswe; eswe halitewula mitwe.

¹⁹ Kakumbilambila prata yo mu matapalo; oru yapwa ngwe chuma cha luchisa. Prata yo ni oru yo kuyichi kahasa kwapulula ha tangwa lia ufwatulo wa Yehova. Kahashile kuchiza zala nayo, hanji kukuchisa nayo majimo jo. Mumu yapwile chitalingiso cha uhenge wo.

²⁰ Yuma yo ya uhenya ayitengele ya kulilengela nayo; alingile nayo tuponya two a lwaji ni yuma yo ya kuvwisa kupiha, kashika munguyipwisa yuma ya luchisa kuli ayo.

²¹ Munguyikunjika mu moko ja tundaka, upite wa kupunda. Munguyikunjika kuli yingulungulu a hashi ngwe upite wa jita mba mayijilula.

²² Mungukuchiza meso jami kuli ayo hanga akajilule muma mwami mulemu. Yingumba makanjila nikujilulamo.

²³ Lingenu lie lenge mumu chifuchi chazala ni milonga ya manyinga, ni chihunda chazala ni upupilo.

²⁴ Waze ahiana kupiha hakachi ka mavungu mungwaneha akazuke mazuwo jo. Mungukasulisa tachi jo ja kulengumuka, ni yihela yo yisandu mayijilula.

²⁵ Muze kulifwita hicheza, mba mafupa uhwimino alioze wakuhi.

²⁶ Lamba linakaula lamba. Saki jinakaula saki. Kanafupu usolwelo kuli profeta alioze ye shimbi hiyatoka kuli sasendote, ni chiyulo hichatoka kuli makulwana.

²⁷ Mwanangana kanalishimwoka; mulemu kanatwama chimbwoto; moko ja akwa chifuchi anahongo ni mwongo. Nikulita ni ndako jo mungukalinga kuli ayo. Nikulita ni upatwilo wo mungwapatwila, mba kumakanyingika yami nguli Yehova.