Ezekiel 6 - MUKANDA USANDU WA ZAMBI 1975

¹ Liji lia Yehova yiliza kuli yami ngwenyi,

² Mwana mutu, talikisa meso je ku milundu ya Izalele ukaprofeteze kulimika hayo ngwe,

³ Enu milundu ya Izalele, panjikenu liji lia Mwene Yehova! Mwene Yehova kanambe ku milundu ni mindundena, ku mishitu ni yikulo ngwenyi, Talenu, yami mwene mungukanukokela katana; mungukonwona manangamo jenu.

⁴ Yilumbilo yenu muyipwa ya hululu; yilumbilo yenu ya insensu makayimakuna; mba mungununguna e afu kumeso ja mahamba jenu.

⁵ Mungukapombesa mijimba ya afu ja A-Izalele kumeso ja mahamba jo. Mungukamwanga yifwaha yenu kweswe kwa kujingilika yilumbilo yenu.

⁶ Kweswako nwatwama, yihunda yenu muyikapwa ya kwenyeka, ni manangamo jenu makaapuzula. Chocho yilumbilo yenu muyikapwa ya kwenyeka, ya kupuzula; mahamba jenu makapwa a kumakuna ni a kwonwona; yilumbilo yenu ya insensu makayishiha, ni yitanga yenu makayijimuna.

⁷ Waze makaashiha makalimbuka hakachi kenu, mba munukanyingika yami nguli Yehova.

⁸ Hindu mungukahichika amwe hakachi kenu a mwono. Muze munukapwa hakachi ka mavungu, amwe waze kafwile ni katana, ni yenu hinwamwangana ndusu mu yifuchi,

⁹ mba waze kafwile makangwiwuluka hakachi ka mavungu kuze haatwala funge, chize hanangumakuna ni mbunge jo ja ukoi jize hijinangukatuka, ni meso jo aze hanaatalikisa ni ukoi ku mahamba jo. Ene meza kulivwila kupiha kumeso jo ene mumu ha yipi yize halinga ni yuma yo ya lwaji.

¹⁰ Makanyingika yami nguli Yehova; chaomishine mokomoko chuma chino chikalu mungukaalinga.

¹¹ Mwene Yehova kanambe ngwenyi, Sakwila ni koshi, linyehune, ukambe ngwe, Mama yami! Mumu ha yuma yeswe yipi ya lwaji ya munyachi wa A-Izalele. Mumu kumakafwa ni katana, ni kapunga, ni chilungo.

¹² Yoze uli kusuku makafwa ni chilungo. Yoze uli hakamwihi makafwa ni katana; ni yoze malisalaho, kafwile ni yino, mba makafwa ni kapunga. Chocho mungukahwisa ufwatulo wami hali ayo.

¹³ Munukanyingika yami nguli Yehova muze afu jo, aze haashiha, makapombapomba hakachi ka mahamba jo kwa kujingilika yilumbilo yo, ni ha mundundena weswe usuku, ni ha mbulwa milundu, ni mushi lia mutondo weswe wa wisu, ni mushi lia mutondo weswe wa carvalho wa mafwo, kweswako hatambula insensu ya lupembo mupema ku mahamba jo eswe.

¹⁴ Mungukolola kwoko liami kulimika no, ni kupwisa chifuchi cho cha kwenyeka, cha hululu, ndusu mu yihunda yo yeswe chize ku puya ya Ribila. Mba makanyingika yami nguli Yehova.