Ezekiel 5 - MUKANDA USANDU WA ZAMBI 1975

¹ Ni yena mwana mutu, anda katana wa kuhela umutenge tewula ukayipalikise ku mutwe we ni wevu we. Mba mutambula mbalansa ya kupezalisa nayo, ukahandunune kambu.

² Chihanda chamuchitatu muwocha ha jiko hakachi ka chihunda muze matangwa a kuseleka hahwa; chihanda chikwo chamuchitatu muwanda nikuchilambalamba ni katana kweswe kwa kujingilika chihunda; chihanda chikwo chamuchitatu mumwangina mu fuji, mba mungutomona katana kujihanga.

³ Hakachi kajo muwanda jimwe jikehe ujikashile mu lupula wa hina lie.

⁴ Ku jino nawa muchiza jimwe ujimbile mu jiko, ujoche mu kahia. Kwenako mukukatuka kahia ha munyachi weswe wa Izalele.

⁵ Mwene Yehova kanambe ngwenyi, Yino ye Yerusaleme; nayisele hakachi ka mavungu, ni kuyijingilika ni yifuchi.

⁶ Alioze hakolema shimbi jami ni ungulungulu kuhiana mavungu; hakolema yiyulo yami kuhiana yifuchi yeswe ya kuyijingilika ha kulituna shimbi jami, katayile kwenda nikulita ni yiyulo yami.

⁷ Kashika Mwene Yehova kanambe ngwenyi, Mumu nunalitachika kuhiana mavungu a kunujingilika, kunwendele mu yiyulo yami, chipwe kufunga shimbi jami, chipwe kulinga nikulita ni shimbi ja mavungu aze akunujingilika,

⁸ kashika Mwene Yehova kanambe ngwenyi, Ngunalimika ni yenu, yami mwene, mba mungulinga upatwilo hakachi kenu kumeso ja mavungu.

⁹ Ha mukunda wa yitanga yenu ya lwaji mungulinga ni yenu chize kanda nguchilinga, ni chichi kalinga chuma chipwa haha nawa nilimwe tangwa.

¹⁰ Kashika malunga malia ana jo a malunga hakachi kenu; ni ana a malunga malia atato, mba mungulinga upatwilo hali yenu, ni waze malisalaho mungukanumwangina ku fuji jeswe.

¹¹ Kashika Mwene Yehova kanambe ngwenyi, Ni mwono wami, se yenu hinwachisa zuwo liami lisandu ni yuma yenu yeswe ya kuvwisa kupiha, ni yuma yenu yeswe ya lwaji, kashika mungukanutepulula. Liso liami kulichi kanuvwila vumbi, chichi kanuvwila keke.

¹² Chihanda chamuchitatu cha yenu muchifwa ni chilungo ni kunonga ni kapunga hakachi kenu; chihanda chamuchitatu muchifwa ni katana kwa kunujingilika; chihanda chamuchitatu mungumwangina ku fuji jeswe ni kutomona katana kunuhanga.

¹³ Chocho utenu wami muukahwa, mungukazukula ufwatulo wami hali ayo nikuliyukisa, mba makanyingika ngwo, Yehova hanahanjika ni ukwa wenyi, muze mungukazukula ufwatulo wami hali ayo.

¹⁴ Chikwo nawa mungukanupwisa a kwenyeka; makanuchoka ku mavungu a kunujingilika ni kumeso ja akwa kupalika eswe.

¹⁵ Chocho munukapwa luchoko, munukalenyewa; munukapwa a kutoweza kanda chuma cha lwaji kuli akwa mavungu a kunujingilika muze mungukalinga upatwilo wami hali yenu ni utenu ni ufwatulo hamwe ni kastigu ya ufwatulo—yami Yehova hinahanjika—

¹⁶ muze mungukanukonga mivu yami ya kapunga wa kushiha, ni mivu ya kwonwona yize mungukakonga kunwonwona, muze mungukanukokela kapunga mukwo ni mukwo, ni kumakuna mulumbu wenu wa mbolo.

¹⁷ Mungukanutuma kapunga ni tushitu asasu kulimika ni yenu; o kumakanutambula ana jenu. Yilungo ni manyinga muyikapalika muli yenu; mungukanukokela katana. Yami Yehova hinahanjika.