Ezekiel 48 - MUKANDA USANDU WA ZAMBI 1975

¹ Majina ja minyachi wano: Putu ku njiza ya ku Norte, chize ku kalunga-lwiji mu jila ya Hetelone ku unjililo wa Hamate ndo ku Haza-Ena (yili sali lia Norte lia njiza ya Ndamaseku hatalanganyi ni Hamate), chize ku sali lia Chivumbuko ndo ku sali lia Chitokelo, chihanda chimuwika, cha Ndane.

² Kulikaula ni chifuchi cha Ndane, chize ku Chivumbuko ndo ku Chitokelo, chihanda chimuwika, cha Ashe.

³ Kulikaula ni chifuchi cha Ashe, chize ku Chivumbuko ndo ku Chitokelo, chihanda chimuwika, cha Napatali.

⁴ Kulikaula ni chifuchi cha Napatali, chize ku Chivumbuko ndo ku Chitokelo, chihanda chimuwika, cha Manase.

⁵ Kulikaula ni chifuchi cha Manase, chize ku Chivumbuko ndo ku Chitokelo, chihanda chimuwika, cha Eframe.

⁶ Kulikaula ni chifuchi cha Eframe, chize ku Chivumbuko ndo ku Chitokelo, chihanda chimuwika, cha Rupene.

⁷ Kulikaula ni chifuchi cha Rupene, chize ku Chivumbuko ndo ku Chitokelo, chihanda chimuwika, cha Yunda.

⁸ Kulikaula ni chifuchi cha Yunda, chize ku Chivumbuko ndo ku Chitokelo, mukupwa mulambu uze munusela, wa makumi aali a tununu ni tununu atano a mbungu ha utohe, mba ha usuhe wakulita ni usuhe wa chihanda cha munyachi umuwika, chize ku Chivumbuko ndo ku Chitokelo, ni lie zuwo lisandu hakachi kawo.

⁹ Mulambu uze munukasela Yehova muupwa wa makumi aali a tununu ni tununu atano a mbungu ha usuhe, ni kumi lia tununu ha utohe.

¹⁰ Hali wano asasendote munusela mulambu usandu, sali lia ku Norte makumi aali a tununu ni tununu atano ha usuhe; ku Chitokelo kumi lia tununu ha utohe; ni ku Chivumbuko kumi lia tununu ha utohe; ni ku Sule makumi aali a tununu ni tununu atano ha usuhe. Zuwo lisandu lia Yehova mulikapwa he hakachi kawo.

¹¹ Chino muchikapwa cha asasendote asandu, ana ja Zadoke waze afungile shimbi jami, kapiangukile muze A-Izalele apiangukile, ngwe A-Levi alingile.

¹² Muchikapwa nicho mulambu umwe walipalikila ni mulambu usandu. Uno muukapwa mulambu usandu Wahiana, wakulihata ni njiza ya A-Levi.

¹³ A-Levi makapwa ni chihanda cho cha makumi aali a tununu ni tununu atano ha usuhe, ni kumi lia tununu ha utohe, cha kulihata ni chifuchi cha asasendote. Usuhe weswe muukapwa wa makumi aali a tununu ni tununu atano, ni utohe wa kumi lia tununu.

¹⁴ Kechi kalanjisa chipwe kusumbakenya nichimwe chihanda chako. Kechi kahasa kuhana chihanda chino chilemu cha chifuchi, mumu chisandu kuli Yehova.

¹⁵ Chize chalisalaho, tununu atano ha utohe ni makumi aali a tununu ni tununu atano ha usuhe, muchipwa cha milimo ya akwa chihunda, cha mazuwo ni cha musenge. He hakachi kacho muhapwa che chihunda.

¹⁶ Cheseko chacho chino: sali lia ku Norte tununu awana ni kulakaji atano, ni sali lia ku Sule tununu awana ni kulakaji atano, ni sali lia ku Chivumbuko tununu awana ni kulakaji atano, ni sali lia ku Chitokelo tununu awana ni kulakaji atano.

¹⁷ Chihunda muchikapwa ni musenge wamokomoko; sali lia Norte kulakaji aali ni makumi atano, sali lia Sule kulakaji aali ni makumi atano, sali lia Chivumbuko kulakaji aali ni makumi atano, sali lia Chitokelo kulakaji aali ni makumi atano.

¹⁸ Chize chalisalaho ku usuhe wa kulihata ni chihanda chisandu muchikapwa kumi lia tununu ku Chivumbuko, ni kumi lia tununu ku Chitokelo, cha kulihata ni mulambu usandu. Mbuto yako muyikapwa kulia cha akwa milimo ja chihunda.

¹⁹ Akwa milimo a mu chihunda waze anakatuka ku minyachi yeswe ya Izalele o machilima.

²⁰ Mulambu weswe uze munusela muupwa wa makumi aali a tununu ni tununu atano ha usuhe ni makumi aali a tununu ni tununu atano ha utohe—acho mulambu usandu hamwe ni chihinga cha chihunda.

²¹ Chize chalisalaho sali ni sali lia mulambu usandu ni chihela cha chihunda muchipwa cha mbala cha mulemu. Chize ku makumi aali a tununu ni tununu atano a mulambu usando ndo ku njiza ya ku Chivumbuko, ni chize ku makumi aali a tununu ni tununu atano ndo ku njiza ya ku Chitokelo kulikaula ni chihanda cha minyachi muchipwa cha mbala cha mwe mulemu. Mulambu usandu ni zuwo lisandu lia tembele muyipwa hakachi kacho.

²² Chikwo nawa chize ku chihanda cha A-Levi, ni ku chihanda cha chihunda, hakachi ka chize cha mwe mulemu, hakachi ka njiza ya A-Yunda ni njiza ya A-Mbenjamine muchipwa cha mbala cha mwe mulemu.

²³ Ha kutwala ku minyachi yikwo: chize ku Chivumbuko ndo ku Chitokelo, chihanda chimuwika, cha Mbenjamine.

²⁴ Kulikaula ni chifuchi cha Mbenjamine, chize ku Chivumbuko ndo ku Chitokelo, chihanda chimuwika, cha Simeone.

²⁵ Kulikaula ni chifuchi cha Simeone, chize ku Chivumbuko ndo ku Chitokelo, chihanda chimuwika, cha Isaka.

²⁶ Kulikaula ni chifuchi cha Isaka, chize ku Chivumbuko ndo ku Chitokelo, chihanda chimuwika, cha Zapulone.

²⁷ Kulikaula ni chifuchi cha Zapulone, chize ku Chivumbuko ndo ku Chitokelo, chihanda chimuwika, cha Ngate.

²⁸ Kulikaula ni chifuchi cha Ngate ku Sule, njiza muyikapalika chize ku Tama ndo ku meya ja Meripa-Kandeshe, mba ku kuze muyikalisesa ni lwiji wa Engitu ndo ku Kalunga-lwiji Munene.

²⁹ Che chifuchi munukachisela chihinga hakachi ka minyachi ya Izalele chenacho, ni yino yihanda yo, chimwe ha chimwe. Chocho kanambe Mwene Yehova.

³⁰ Yikolo ya chihunda yino: sali lia Norte linapu tununu awana ni kulakaji atano ha kweseka,

³¹ yikolo yitatu sali lia Norte: chikolo cha Rupene, ni chikolo cha Yunda, ni chikolo cha Levi, yikolo ya chihunda te yili ni majina ja minyachi ya Izalele.

³² Sali lia Chivumbuko, linapu lia tununu awana ni kulakaji atano, yikolo yitatu: chikolo cha José, ni chikolo cha Mbenjamine, ni chikolo cha Ndane.

³³ Sali lia Sule, linapu lia tununu awana ni kulakaji atano ha kweseka, yikolo yitatu: chikolo cha Simeone, ni chikolo cha Isaka, ni chikolo cha Zapulone.

³⁴ Sali lia Chitokelo, linapu lia tununu awana ni kulakaji atano, yikolo yitatu: chikolo cha Ngate, ni chikolo cha Ashe, ni chikolo cha Napatali.

³⁵ Muchipwa cha kumi Ha tununu ni tununu nake a mbungu kweswe kwa kujingilika. Jina Iia chihunda chize ku tangwa lize mulipwa Yehova Mwali.