Ezekiel 47 - MUKANDA USANDU WA ZAMBI 1975

¹ Yanguneha nawa ku chikolo cha tembele, kumanyi meya anatuhuka kushi lia chikuli cha tembele nikutalikisa ku Chivumbuko (mumu te tembele yinatalikisa ku Chivumbuko). E meya kanakatuka kushi lia chikuli cha tembele ku songo lia ku Sule; te sali lia chilumbilo lia ku Sule.

² Yanguneha haze ku jila ya chikolo cha ku Norte, yangujingisa haze ku chikolo cha haze chize cha kutalikisa ku Chivumbuko. E meya kanatuhukila sali lia ku Sule.

³ Mwe lunga kanayi nikutalikisa ku Chivumbuko ni muhipu mu kwoko lienyi; yeseka kanunu ka mbandu mba yangusongwela ndusu mu meya, meya ndo ku tusendengele.

⁴ Cheka nawa yeseka kanunu mba yangusongwela ndusu mu meya, meya ndo ku makungunwa. Cheka nawa yeseka kanunu mba yangusongwela ndusu mu meya, meya ndo ku zalilo.

⁵ Cheka nawa yeseka kanunu, mba hapwa lwiji, Chahashile kuzauka mumu meya hapwa anji; meya a kusanyikinamo; lwiji mutu kechi kuhasa kuzauka ha mwa.

⁶ Aye yamba kuli yami ngwenyi, Mwana mutu, hiwamona chuma chino nyi? Mba yangutwala ni kunguhilwisa ha mbumbulu ya lwiji.

⁷ Ha kuya yingumona ha mbumbulu ya lwiji mitondo yinji chikolo sali ni sali.

⁸ Aye yamba kuli yami ngwenyi, Meya wano kanende nikutalikisa ku chifuchi cha Chivumbuko, mba mapalumuka ku Arapa. E meya wano atuhukile kuze manjila mu kalunga-lwiji, mba makayemesa meya jamo.

⁹ Kweswako lwiji matalikisa tushitu eswe akulisunga matwama ni mwono. Kumukupwa nawa yishi anji, mumu meya wano kanayiko hanga meya a kalunga-lwiji akayeme, hanga yuma yeswe yikapwe ni mwono kuze lwiji anayi.

¹⁰ Akwa kutela yishi makamanyina ku kalunga-lwiji. Chize ku Engedi ndo ku Eneglame mukupwa chihela cha kwanyikina manda. Yishi jako makapwa a milali yeka ni yeka, ngwe yishi a ku Kalunga-lwiji Munene.

¹¹ Alioze matenga jako ni yitende yako kuyichi kwalumuka yiyema; muyikasala ya mungwa.

¹² Ha mbumbulu, sali ni sali lia lwiji, kumukupwa milali yeswe ya mitondo ya kulia. Mafwo jayo kechi koma, chipwe mihuko* yayo kuyichi kahona, alioze muyikema mihuko ya wisu kakweji ha kakweji, mumu meya jayo anakatuka ku zuwo lisandu. Mihuko yayo muyikapwa ya kulia, ni mafwo jayo makapwa ha kuwuka.

¹³ Mwene Yehova kanambe ngwenyi, Jino je njiza munuhandununa najo che chifuchi ha yihinga hakachi ka kumi lia minyachi ni minyachi yiali ya Izalele. José akapwe ni yihanda yiali.

¹⁴ Munukachiteta ni katonde keshiko. Nalishingile ni tulamba twenu kwaahacho, kashika chifuchi chino muchipwa nichenu cha chihinga.

¹⁵ Njiza ya chifuchi yino: Sali lia ku Norte, chize ku Kalunga-lwiji Munene ndusu ku Hetelone ku unjililo wa Hamate, ndusu ku Zedade,

¹⁶ ni Berota, ni Sibrame (yili ha njiza hakachi ka Ndamaseku ni Hamate) ndo ku Haza-hatikone yize yili ha njiza ya Haurana.

¹⁷ Chocho njiza muyipalika chize ku kalunga-lwiji ndo ku Haza-Ena yize yili ha njiza ya Ndamaseku ku Norte, ni njiza ya Hamate ku Norte. Ye njiza ya ku Norte yenayo.

¹⁸ Sali lia ku Chivumbuko njiza muyikatuka ku Hazare-enone hakachi ka Haurana ni Ndamaseku. Muyilisesa ni Yordau hakachi ka Ngiliate ni chifuchi cha Izalele, ndo ku Kalunga-lwiji wa ku Chivumbuko ndo ku Tamare. Ye njiza ya ku Chivumbuko yenayo.

¹⁹ Ha sali lia ku Sule muyikatuka ku Tama ndo ku meya a Meripa-Kandeshe, mba kulisesa ni lwiji wa Engitu ndo ku Kalunga-lwiji Munene. Ye njiza ya ku Sule yenayo.

²⁰ Ha sali lia ku Chitokelo Kalunga-lwiji Munene mapwa njiza ndo kuze kwalitalangana ni unjililo wa Hamate. Ye njiza ya ku Chitokelo yenayo.

²¹ Chocho munulitetela chifuchi hakachi kenu nikulita ni minyachi ya Izalele.

²² Munuliselacho chihinga kuli yenwene ni kuli yilambala waze hanatungu ni yenu, hanaseme ana hakachi kenu. O makapwa kuli yenu ngwe A-Izalele a chisemuko. Munukaasela chihinga hamwe ni yenu hakachi ka minyachi ya Izalele.

²³ Munukasela mwe chilambala chihinga chenyi mu munyachi uze atwama. Chocho kanambe Mwene Yehova.