Ezekiel 46 - MUKANDA USANDU WA ZAMBI 1975

¹ Mwene Yehova kanambe ngwenyi, Chikolo cha yize ya muchima chize chatalikisa ku Chivumbuko muchipwa cha kwajila ha matangwa asambano a milimo, alioze ha tangwa lia Sambata machazulula ni ha tangwa lia kakweji mwaha machazulula.

² Mwe mulemu makanjilila ku senge lia chikolo cha haze, makamana kwe ku nguji lia chikolo. Asasendote makalambula mulambu wenyi wa kulumba, ni milambu yenyi ya sambukila, mba iye makawayila ku chikuli cha chikolo. Mba makatuhuka alioze kechi kajila chajilo ndo ngoloshi.

³ Akwa chifuchi makawayila ku unjililo wa chikolo chize kumeso ja Yehova ha masambata ni ha kakweji mwaha.

⁴ Mulambu wa kulumba uze mwe mulemu makalambula kuli Yehova ha tangwa lia Sambata muukapwa wa anamapanga asambano keshi chipa, ni kuji ya panga umuwika keshi chipa.

⁵ Mulambu wa wunga wa mwe kuji ya panga muukapwa wa *efa yimuwika, ni mulambu wa wunga wa ana-mapanga muukapwa weswe makahasa hamwe ni *hine yimuwika ya maji ha efa ni efa.

⁶ Ha tangwa lia kakweji mwaha makalambula chimbembe wa kuji keshi chipa, ni ana-mapanga asambano hamwe ni kuji ya panga, eswe keshi chipa.

⁷ Ha mulambu wa wunga makahana *efa yimuwika ni mwe kuji ya ngombe, ni efa yimuwika ni mwe kuji ya panga, hamwe ni ana-mapanga weswe makahasa, hamwe ni *hine ya maji ha efa ni efa.

⁸ Muze mwe mulemu makanjila, makanjilila ku senge lia chikolo, mba makatuhukila jila yize yene.

⁹ Muze akwa chifuchi meza kumeso ja Yehova ha yiwanyino ya kufunjika, yoze manjilila ku chikolo cha ku Norte kuwayila, makatuhukila ku chikolo cha ku Sule; ni yoze makanjilila ku chikolo cha ku Sule makatuhukila ku chikolo cha ku Norte. Niumwe makahilukila ku chikolo chize anjilila, alioze mweswe makatuhukila ndusu kumeso jenyi.

¹⁰ Muze makanjila mwe mulemu makanjila no, ni muze makatuhuka iye makatuhuka.

¹¹ Ku Yiwanyino ni miaka ya kufunjika mulambu wa wunga hamwe ni chimbembe wa kuji muukapwa wa *efa yimuwika, ni hamwe ni kuji ya panga *efa yimuwika. Hamwe ni ana-mapanga makahana wunga weswe mahasa, hamwe ni *hine ya maji ha efa ni efa.

¹² Muze mwe mulemu makahana mulambu wa mbunge upwe wa kulumba, hanji milambu ya sambukila ngwe mulambu wa mbunge kuli Yehova, chikolo chatalikisa ku Chivumbuko, makamwazulwilacho; mba makalambula mulambu wenyi wa kulumba hanji milambu yenyi ya sambukila chizechene ngwe kakuchihnga ha tangwa lia Sambata; mba makatuhuka, ni muze iye hatuhuka makajila chajilo.

¹³ Makahana mwana-panga wa mwaka umuwika keshi chipa akapwe mulambu wa kulumba kuli Yehova tangwa ha tangwa. Tangwa ha tangwa ha chimene mamuhana.

¹⁴ Makahana mulambu wa wunga hamwe nenyi tangwa ha tangwa; chihanda cha sambano cha *efa, ni chihanda cha yitatu cha *hine ya maji kuwulisa wunga ukapwe mulambu wa wunga kuli Yehova. Ye shimbi ya mulambu wa kulumba wa matangwa eswe yenayo.

¹⁵ Chocho makahana mwana-panga, ni wunga, ni maji tangwa ha tangwa ha chimene ha mulambu wa kulumba wa matangwa eswe.

¹⁶ Mwene Yehova kanambe ngwenyi, Nyi mwe mulemu makahana kuli umwe mwanenyi chawana cha ku chihinga chenyi, hichapwa nicho, upite wo wa kuhinga.

¹⁷ Alioze nyi makahana chawana cha ku chihinga chenyi kuli umwe ngamba yenyi, muchikapwa nichenyi ndo ku mwaka wa kutusuka, mba muchikahiluka kuli mwe mulemu. Ana jenyi wika mahasa kuzuka chawana cha ku chihinga chenyi.

¹⁸ Mulemu kechi katambula chihinga cha umwe mutu ni kumuchiza ku upite wenyi. Makahingisa ana jenyi a malunga ku upite wenyi mwene, chocho niumwe wa atu jami mamutambula upite wenyi.

¹⁹ Mba yanguneha ku unjililo uze uli ku lumbu lia chikolo ku mukala wa yipatulo yisandu ya ku Norte ya asasendote, kwenako namwene kuma kumwe kwe ku songo liayo lia ku Chitokelo.

²⁰ Aye yamba kuli yami ngwenyi, Kuno kwene asasendote makateleka mulambu wa uhie ni mulambu ha shili, ni kuno nawa makocha mulambu wa wunga, mumu kechi kayineha mu yize ya haze akajilike e atu.

²¹ Mba yanguneha ku yize ya haze, yangutwala ku mbango jiwana ja yize. Mu mbango yeswe ya yize mwapwile kayize nawa—

²² mu mbango jiwana ja yize mwapwile tuyize nawa twa makumi awana a mbandu ha usuhe ni makumi atatu a mbandu ha utohe. Tweswe tuwana twa cheseko chimuwika.

²³ Muchima, mwa kujingilika tuyize tuwana, kamwe ha kamwe, mwapwile mukala wa mawe ni majiko a kutunga kushi lia mikala ya kujingilika.

²⁴ Henaho yamba kuli yami ngwenyi, E mazuwo a kutetekela wano; kuno akwa kuvumbika mu tembele makateleka yitapo ya atu.