Ezekiel 45 - MUKANDA USANDU WA ZAMBI 1975

¹ Ha kulitetela chifuchi ha yihinga, munukasela kuli Yehova chihanda cha chifuchi chikapwe mulambu usandu. Usuhe wacho muukapwa wa makumi aali a tununu ni tununu atano a mbungu, ni utohe wacho wa makumi aali a tununu. Muchikapwa chisandu ndusu mu njiza yacho yeswe.

² Ku chihanda chino mukupwa chihela cha mbango jiwana; usuhe kulakaji atano ni utohe kulakaji atano, chihela cha tembele, ni njiza ya makumi atano a mbandu kweswe kwa kujingilika.

³ Ha chihela chisandu munukeseka chihanda cha makumi aali a tununu ni tununu atano ha usuhe, ni kumi lia tununu ha utohe. Mwenamo mumukatwama lie zuwo lisandu, Hapwa lisandu kuhiana.

⁴ Chino muchikapwa chihela chisandu cha chifuchi. Muchikapwa cha asasendote waze akuvumbika mu zuwo lisandu ni kukundama kuli Yehova amuvumbike. Muchikapwa nawa chihela cha mazuwo jo ni chihela chisandu cha zuwo lisandu.

⁵ Chihanda chikwo cha makumi aali a tununu ni tununu atano ha usuhe ni kumi lia tununu ha utohe muchikapwa cha A-Levi, tuvumbi twa mu zuwo, chikapwe nicho cha mazuwo a kutwamamo.

⁶ Ha kulihata ni chihela cha mulambu usandu munukasela ha chihinga cha chihunda chimwe chihela cha tununu atano ha utohe ni makumi aali a tununu ni tununu atano ha usuhe, chikapwe hali akwa munyachi wa Izalele eswe.

⁷ Cha mwe mulemu muchikapwa sali ni sali lia mulambu usandu ni chihinga cha chihunda, cha kusulangana ni chihela chisandu ni chihinga cha chihunda ha sali lia ku Chitokelo ni sali lia ku Chivumbuko, nikulita ni usuhe wa chihinga cha munyachi umuwika chize ku Chitokelo ndo ku Chivumbuko ku njiza ya chifuchi.

⁸ Chino muchikapwa nichenyi mu Izalele. Mba alemu jami kechi kapinjisa nawa atu jami, alioze makecha akwa munyachi wa Izalele kuzuka chifuchi nikulita ni minyachi yo.

⁹ Mwene Yehova kanambe ngwenyi, Kunahu, enu alemu ja Izalele! Mbilenu upupilo ni upinjiso, nukapatule nikulita ni ululi. Mwene Yehova kanambe ngwenyi, Litwaminenu kufwetesa atu jami chocho.

¹⁰ Munukapwa ni mbalansa ja ululi, ni njongo ya *efa ya ululi, ni njongo ya *mbate ya ululi.

¹¹ *Efa ni *mbate muyikapwa ya cheseko chimuwika. Mbate muyikapwa chihanda cha kumi cha *homere, ni efa nawa chihanda cha kumi cha homere. Ye homere muyikapwa chinyingi cha kuzonga nacho.

¹² Shekele muyikapwa ya makumi aali a ngera; shekele jitano mujikapwa shekele jitano, ni shekele kumi mujikapwa shekele kumi, ni mina yenu muyikapwa ya makumi atano a shekele.

¹³ Mulambu munutambula uno: chihanda cha sambano cha *efa ha *homere yeswe ya tiliku; ni chihanda cha sambano cha efa ha homere yeswe ya sevada.

¹⁴ Chihanda cha kufunjika cha maji muchikapwa chihanda cha kumi cha mbate ku *kore ni kore. Kore, ngwami, kumi lia *mbate, chinalumbunuka homere, mumu kumi lia mbate chapwa homere.

¹⁵ Ni panga umuwika ha chendo cha kulakaji aali, a ku kelo jipema ja Izalele. Uno wapwa mulambu wa wunga, ni milambu ya kulumba, ni milambu ya sambukila yikaakukile. Chocho kanambe Mwene Yehova.

¹⁶ Atu eswe a mu chifuchi makahana mulambu uno kuli mwe mulemu wa mu Izalele.

¹⁷ Mba mulemu aye makamona milambu ya kulumba, ni milambu ya wunga, ni milambu ya kunwa, ha yiwanyino, ni kakweji mwaha ni masambata, yiwanyino yeswe ya kufunjika kuli akwa munyachi wa Izalele. Aye makahana milambu ha shili, ni milambu ya wunga, ni milambu ya kulumba, ni milambu ya sambukila akakukile akwa munyachi wa Izalele.

¹⁸ Mwene Yehova kanambe ngwenyi, Ha kakweji mutangu, ni tangwa litangu lia kakweji, munukanda chimbembe wa kuji keshi chipa nukapemese zuwo lisandu.

¹⁹ Sasendote makatambula amwe manyinga a mulambu ha shili akaakomone ha yikuli ya tembele, ni ha mbango jiwana ja mukomo wa chilumbilo, ni ha yikuli ya chikolo cha yize ya muchima.

²⁰ Munukalinga chimuwika ha tangwa liamuchishimbiali lia kakweji hali mweswawo yoze havulumuna ha kulweza hanji ha kwalajala. Chocho munukakukila tembele.

²¹ Ha kakweji mutangu, ha tangwa kumi ni liamuchiwana lia kakweji, munukalia chiwanyino cha Chizomboka mba ha matangwa shimbiali munukalia mbolo kuyishi futunwiso.

²² Ha tangwa lize mwe mulemu makahana hali iye mwene ni hali atu eswe a chifuchi chimbembe wa kuji akapwe mulambu ha shili.

²³ Mba ha matangwa shimbiali a chiwanyino makahana yimbembe a kuji shimbiali ni kuji a mapanga shimbiali keshi chipa akapwe mulambu wa kulumba kuli Yehova tangwa ha tangwa ha matangwa shimbiali, ni kuji ya pembe akapwe mulambu ha shili.

²⁴ Makahana nawa mulambu wa wunga, *efa yimuwika ha chimbembe mweswe, ni efa yimuwika ha kuji ya panga mweswe. Ha efa ni efa makahana *hine yimuwika ya maji.

²⁵ Ha kakweji wamuchishimbiali ni ha tangwa kumi ni liamuchitano lia kakweji, ni ha matangwa shimbiali a chiwanyino makalulika chizechene ha milambu ha shili, ni milambu ya kulumba, ni milambu ya wunga, ni ha maji.