Ezekiel 44 - MUKANDA USANDU WA ZAMBI 1975

¹ Henaho yanguneha nawa ku chikolo cha haze cha zuwo lisandu chize chata likisa ku Chivumbuko. Chapwile cha kwajila.

² Yehova yamba kuli yami ngwenyi, Chajilo chino muchikapwa cha kwajila; kechi kachazulula; niumwe makanjililamo, mumu Yehova mwe Zambi ya Izalele hanjililamo; kashika muchikasala cha kwajila.

³ Mwe mulemu wika, iye mu ulemu wenyi makatwamamo nikulia mbolo kumeso ja Yehova. Makanjilila ku senge lia chikolo; makatuhukila nawa muze mwene.

⁴ Henaho yanguneha ku jila ya chikolo cha ku Norte ndo kulutwe lia tembele. Yingutala, kumanyi, uhenya wa Yehova unazalisa tembele ya Yehova, kashika yingufulamana hashi.

⁵ Yehova yamba kuli yami ngwenyi, Mwana mutu, sako chinyingi, umone ni meso je, wivwe ni matwi je yize yeswe mungukwambulwila ha kutwala ku shimbi jeswe ja tembele ya Yehova ni yiyulo yayo yeswe. Sako chinyingi kanawa unjililo wa zuwo ni utuhukilo wa zuwo lisandu.

⁶ Ukambe kuli akwa munyachi wa Izalele wa uhulia ngwe, Mwene Yehova kanambe ngwenyi, Enu akwa munyachi wa Izalele, yitanga yenu ya lwaji yikahwe.

⁷ Kanda nutayiza tundaka, yilima mu mbunge jo ni mu musunya wo, kunjila mu zuwo liami lisandu ni kuyijilula, muze nwakungulambula kulia chami, maji ni manyinga. Hinwatangula usendo wami ni yitanga yenu yeswe ya lwaji.

⁸ Chikwo nawa kunwafungile yuma yami yisandu, alioze hinwasa tundaka kufunga shimbi jami mu zuwo liami lisandu.

⁹ Kashika Mwene Yehova kanambe ngwenyi, Hakachi ka tundaka waze eswe ali hakachi ka A-Izalele niumwe kandaka, chilima mu mbunge yenyi ni mu musunya wenyi, makanjila mu zuwo liami lisandu.

¹⁰ Alioze A-Levi waze ayile kusuku ni yami nikunguhichika kukaula mahamba muze A-Izalele apiangukile; o makatambula kastigu yo.

¹¹ O makapwa tuvumbi mu zuwo liami lisandu nikulayila yikolo ya tembele ni kuvumbika mu tembele. O makashiha milambu ya kulumba, ni yitapo hali e atu; o makavumbika e atu ni kwalingila.

¹² Se aavumbikile kumeso ja mahamba jo nikwalumuka chitalingiso cha uhenge kuli akwa munyachi wa Izalele, kashika ha kutwala kuli ayo, yami Mwene Yehova hinalishinga ngwami, Kumakatambula kastigu yo.

¹³ Kechi kakundama kuli yami akanguvumbike mu usasendote, chipwe kukundama ku yuma yami yisandu niyimwe, chipwe yuma yize yapwa yisandu yahiana, alioze makapwa ni sonyi jo mumu ha yuma ya lwaji yize alingile.

¹⁴ Hindu mungwasela kufunga ulayilo wa tembele, kulinga uvumbiko wayo weswe ni yuma yize yeswe yiliko ya kulinga.

¹⁵ Alioze asasendote ja A-Levi, ana ja Zadoke, waze afungile ulayilo wa zuwo liami lisandu muze A-Izalele akatukile kuli yami, o makundama kuli yami kunguvumbika, no mangulingila akangulambule e maji ni manyinga. Chocho kanambe Mwene Yehova.

¹⁶ O makanjilanjila mu zuwo liami lisandu nikukundama ku mesa yami kunguvumbika, no makafunga shimbi jami.

¹⁷ Ha kunjila ku yikolo ya yize ya muchima mazala mazalo a linyu, kechi kuzala nichimwe cha wona wa mapanga shimbu machivumbika ku yikolo ya yize ya muchima, ni mwe muchima.

¹⁸ Mazala tupusa twa linyu ha mitwe yo, ni yikalasau ya linyu ha molu jo. Kechi halijichika ni chuma cha kuneha matukuta.

¹⁹ Ha kutuhuka ku yize ya haze kuli atu, mazula mazalo aze akuvumbika no ni kwatulika mu yipatulo yisandu, mba mazala mazalo eka kuchina akajilike atu ni mazalo jo.

²⁰ Kanda atewula mitwe yo, chipwe kwecha kambu jo jisuhe, alioze akakambe kambu jo.

²¹ Niumwe sasendote manwa vinyu ha kunjila mu yize ya muchima.

²² Kechi kambata tuliwa, chipwe pwo wa kulakula, alioze ndo pwo wa chisemuko cha munyachi wa Izalele yoze kanda achilimona ni lunga, hanji tuliwa wa umwe sasendote.

²³ Makalongesa atu jami kuhandununa hakachi ka yuma yisandu ni yuma yeswayo, nikwalweza kusa chinyingi hakachi ka yuma ya luchisa ni yuma yipema.

²⁴ Ha kusopa, o makapwa akwa kupatula, alioze makapatula nikulita ni upatwilo wami. Makafunga shimbi jami ni yiyulo yami mu yiwanyino yami yeswe ya kufunjika. Makafunga masambata jami ni usandu.

²⁵ Kechi kalichisa ha kukundama kuli mufu. Alioze nyi hali tato hanji naye, hali mwana wa lunga hanji wa pwo, hali mwanakwo hanji yayo, hanji ndumbwo kandaya ulo, mahasa kulichisa.

²⁶ Muze hamupemesa nawa, malialwila matangwa shimbiali.

²⁷ Mba ha tangwa lize manjila mu zuwo lisandu, mu yiz ya muchima akavumbike mu zuwo lisandu, malambula mulambu wenyi ha shili. Chocho kanambe Mwene Yehova.

²⁸ O kechi kapwa ni chihinga mumu yami nguli chihinga cho. Kunuchi kwaaha yikumba mu Izalele mumu yami nguli yikumba yo.

²⁹ Makalia milambu ya wunga, ni milambu ha shili, ni milambu ha uhie, ni yuma yeswe ya kutumbikila mu Izalele muyikapwa niyo.

³⁰ Yitangu ya mbuto yitangu ya milali yeswe, ni milali yeswe ya milambu yenu yeswe muyipwa ya mbala ya asasendote. Munukahana nawa kuli asasendote utangu wa wunga wenu wa kuchika mbolo hanga chiwape chikatwame ha munyachi wenu.

³¹ Asasendote kechi kalia nichimwe chize cha kulifwita, chipwe yoze wa kupapulula, apwe kajila apwe kashitu.