Ezekiel 43 - MUKANDA USANDU WA ZAMBI 1975

¹ Kulutwe yangutwala ku chikolo, te chikolo chize chatalikisa ku Chivumbuko.

² Kumanyi uhenya wa mwe Zambi ya Izalele unakatuka ku Chivumbuko. Lundunjila wa kwiza chenyi wapwile ngwe lundunjila wa meya anji, ni hashi hahenyene ni uhenya wenyi.

³ Usolwelo namwene wapwile ngwe usolwelo uze namwene muze ejile mukwonwona chihunda, ngwe usolwelo uze namwene nawa ku lwiji Chebare, kashika nafulamanyine hashi.

⁴ Shimbu uhenya wa Yehova muunjila mu tembele ku chikolo cha kutalikisa ku Chivumbuko

⁵ mwe Spiritu yanguzundula, yanguneha mu yize ya muchima; kumanyi uhenya wa Yehova yiuzalisa tembele.

⁶ Shimbu mwe lunga machimana ni yami, yingwivwa umwe muchima lia tembele kanahanjika ni yami.

⁷ Yamba kuli yami ngwenyi, Mwana mutu, muno mwapwa muma mwa ngunja yami, muma mwa yiliato yami, muno mungukatwama hakachi ka atu ja A-Izalele ndo ku miaka yeswe. Akwa munyachi wa Izalele kechi kachisa nawa jina liami, chipwe ayo, chipwe mianangana jo, hanji ku ukoi wo, hanji ku mijimba ya mianangana jo ha manangamo,

⁸ hanji ha kusa chikolo cho ku chikolo chami, ni yikuli yo ku yikuli yami, ni yishimi wika hakachi ka ayo ni yami. Hanachishi jina liami lisandu ni yuma yo ya lwaji halinga, kashika yami nawa hinaalalisa ni utenu wami.

⁹ Haliapwila ambile mahamba jo, ni mijimba ya mianangana jo afu kusuku ni yami, mba mungukatwama hakachi ko ndo ku miaka yeswe.

¹⁰ Ni yena mwana mutu, lumbununa kuli akwa munyachi wa Izalele ye tembele, ni kupwa chayo, ni chize hanayeseka hanga akevwe sonyi ha mukunda wa uhenge wo.

¹¹ Nyi kachi mevwa sonyi ha yize yeswe halinga, hisoneka ye tembele, ni chize hanayilulika, ni utuhukilo wayo, ni unjililo wayo, ni chize yapwa yeswe; ukaanyingikise maliji jayo eswe, ni shimbi jayo jeswe, ukayisoneke kwe kumeso jo hanga akatale kanawa, akalinge shimbi jayo jeswe ni maliji jayo eswe.

¹² Ye shimbi ya tembele yino: chihela cheswe cha kujingilika helu lia mbulwa mulundu chikapwe chisandu chahiana. Nyingikenu, yino ye shimbi ya tembele.

¹³ Yeseko ya chilumbilo yino, nikulita ni mbandu (mbandu yimuwika yinalumbunuka mbandu ni mbanda-kwoko): chimanyino chacho mbandu yimuwika, utohe wacho mbandu yimuwika, chili ni chipangula cha mbanda-kwoko kujingilika mukomo.

¹⁴ Chizundamo cha chilumbilo, chino: chize ku chimanyino hashi ndo ku mukomo wa ku mwanda, mbandu jiali, ni utohe wacho mbandu yimuwika. Chize ku mukomo ukepe ndo ku mukomo unene, mbandu jiwana, ni utohe wa mbandu yimuwika.

¹⁵ Lie jiko lia chilumbilo, mbandu jiwana, mba chize ku jiko lia chilumbilo kutalikisa kwilu mbinga jiwana.

¹⁶ Jiko lia chilumbilo mulipwa lia mbango jiwana; usuhe walio kumi lia mbandu ni mbandu jiali, ni utohe walio kumi lia mbandu ni mbandu jiali.

¹⁷ Ni mukomo wacho muupwa wa mbango jiwana, usuhe wacho kumi lia mbandu ni mbandu jiwana, ni utohe wacho kumi lia mbandu ni mbandu jiwana, ni mukomo wacho wa kujingilika wa chihanda cha ha muchima cha mbandu, ni chimanyino chacho cha mbandu yimuwika kwa kujingilika. Ndondelo ja chilumbilo mujitalikisa ku Chivumbuko.

¹⁸ Aye yamba kuli yami ngwenyi, Mwana mutu, Mwene Yehova kanambe ngwenyi, Shimbi ja chilumbilo jino: Ha tangwa lize machimika akalumbwileho milambu ya kulumba ni kusapwilaho manyinga,

¹⁹ munukahana kuli asasendote a Levi a ku munyachi wa Zadoke, waze akukundama kuli yami mukunguvumbika, kuji ya ngombe akapwe mulambu ha shili. Chocho kanambe Mwene Yehova.

²⁰ Munukanda amwe a manyinga jenyi nukaakomone ha mbinga jiwana ja chilumbilo ni ha mbango jiwana ja mukomo ni ha chipangula cha kujingilika. Chocho munukapemesa chilumbilo ni kuchikukila.

²¹ Mba munukanda kuji ya ngombe wa mulambu ha shili, nukamwoche kuma kwa kutongola kwatwala ku zuwo lisandu, alioze haze lia chihela chisandu.

²² Ha tangwa liamuchiali munukalambula kuji ya pembe keshi chipa akapwe mulambu ha shili, che chilumbilo chikapeme chize achipemesene ni kuji ya ngombe.

²³ Muze hinwamana kuchipemesa munukalambula kuji ya ngombe keshi chipa, ni kuji ya panga wa ku chendo keshi chipa.

²⁴ Munukaakunjika kumeso ja Yehova, mba asasendote makaalakumwinaho mungwa ni kwalumba mulambu wa kulumba kuli Yehova.

²⁵ Ha matangwa shimbiali munukaneha tangwa ha tangwa pembe wa mulambu ha shili, ni kuji ya ngombe ni kuji ya panga wa ku chendo keshi chipa nawa.

²⁶ Matangwa shimbiali makakukila chilumbilo ni kuchipemesa; chocho makachitumbikila.

²⁷ Muze hamana matangwa wano, mba chize ku tangwa liamuchinake kulutwe asasendote makalambwila ha chilumbilo milambu yenu ya kulumba, ni milambu yenu ya sambukila; mba mungukanutambula. Chocho kanambe Mwene Yehova.