Ezekiel 42 - MUKANDA USANDU WA ZAMBI 1975

¹ Yanguneha haze ku yize ya haze kwa kuya ku Norte. Yanguneha ku yipatulo yize yili hatalanganyi ni yize ya tembele ni hatalanganyi ni zuwo lia ku Norte.

² Usuhe wa zuwo lia ku Norte wapwile kulakaji lia mbandu, ni utohe makumi atano.

³ Kwapwile veranda kulihata ni veranda ha ngango jitatu kulutwe lia makumi aali a mbandu jize jatwalile ku yize ya muchima, ja kutalikisa ku mawe a kwala a yize ya haze.

⁴ Mba kulutwe lia yipatulo kwapwile upalikilo wa kuya muchima, utohe wawo wa kumi lia mbandu, ni usuhe wawo wa kulakaji lia mbandu. Mapito jamo apwile sali lia ku Norte.

⁵ Yipatulo ya kwilu yakehele mumu veranda yako yatambwile chihanda chinene cha utohe wayo, yipatulo ya kushi ni ya hakachi te yatambula chihanda chikehe cha zuwo.

⁶ Mumu yapwile mu ngango jitatu, chikwo nawa kuyapwile ni manguji ngwe aze a yize ya haze, kashika yipatulo ya kwilu hayisetula kunyima kuhichika yize ya kushi ni ya hakachi.

⁷ Chipanga cha haze, chize chayile cha kulita ni yipatulo kutalikisa ku yize ya haze hatalanganyi ni yipatulo, chapwile cha makumi atano a mbandu.

⁸ Yipatulo ya ha yize ya haze yapwile ya usuhe wa makumi atano a mbandu, alioze yize yapwile hatalanganyi ni tembele ayo yapwile ya kulakaji lia mbandu.

⁹ Kushi lia yipatulo yino kwapwile unjililo ha sali lia Chivumbuko ha kukatuka ku yize ya haze nikunjilamo,

¹⁰ kuze kwaputuka chipanga cha haze. Ha sali lia ku Sule nawa, hatalanganyi ni yize yikwo ni hatalanganyi ni lie zuwo, kwapwile nawa yipatulo,

¹¹ ni upalikilo kulutwe liayo. Yalita zwa ni yipatulo ya ku Norte; usuhe umuwika, ni utohe umuwika, ni utuhukilo umuwika, ni kweseka cha yikolo.

¹² Kushi lia yipatulo ya ku Sule kwapwile unjililo ha sali lia ku Chivumbuko ha kunjila mu upalikilo. Hatalanganyi kwapwile chipanga cha kuhandununa.

¹³ Aye yamba kuli yami ngwenyi, Yipatulo ya ku Norte ni yipatulo ya ku Sule hatalanganyi ni yize, ayo yapwa yipatulo yisandu kuze asasendote akwa kukundama kuli Yehova malila milambu yisandu yahiana. Mwenamo matulikila milambu yisandu yahiana—mulambu wa wunga, ni mulambu ha shili, ni mulambu ha uhie, mumu yipatulo yize yisandu.

¹⁴ Muze asasendote manjila muma musandu, kechi kukatukamo akaye ku yiza ya haze ndo matulikilamo mazalo jo aze akuvumbika no mumu mazalo aze asandu. Shimbu makundama ku yuma ya atu mazala mazalo eka.

¹⁵ Muze te hamana nikweseka muchima lia chihela cha tembele yangutwala haze ku chikolo chize chatalikisa ku Chivumbuko; yeseka chihela cha tembele cha kujingilika.

¹⁶ Yeseka sali lia ku Chivumbuko ni lumbungu wa kweseka nenyi, kulakaji atano a mbungu nikulita ni lumbungu wa kweseka nenyi.

¹⁷ Mba yalumuka yeseka sali lia ku Norte, kulakaji atano a mbungu nikulita ni lumbungu wa kweseka nenyi.

¹⁸ Mba yalumuka yeseka sali lia ku Sule, kulakaji atano a mbungu nikulita ni lumbungu wa kweseka nenyi.

¹⁹ Mba yalumuka yeseka sali lia ku Chitokelo, kulakaji atano a mbungu nikulita ni lumbungu wa kweseka nenyi.

²⁰ Yeseka ha malumbu awana. Yapwile ni chipanga-cha-mawe kwa kujingilika; sali kulakaji atano, sali kulakaji atano, chikahandunune hakachi ka yuma yisandu ni yuma yeswayo.