Ezekiel 41 - MUKANDA USANDU WA ZAMBI 1975

¹ Yanguneha ku tembele, yeseka manguji, sali limwe mbandu jisambano, sali likwo mbandu jisambano, che kutoha cha yikuli.

² Utohe wa unjililo wapwile wa kumi lia mbandu; sali ni sali lia unjililo yipanga ya mbandu jitano. Yeseka usuhe wa tembele, makumi awana a mbandu, ni utohe makumi aali a mbandu.

³ Yanjila muchima, yeseka manguji a ku unjililo, te mbandu jiali; utohe wa unjililo mbandu jitatu; ni yipanga ya unjililo mbandu shimbiali.

⁴ Yeseka chipatulo kuze-kanda lia tembele, usuhe wacho makumi aali a mbandu, ni utohe wacho makumi aali a mbandu. Yamba kuli yami ngwenyi, Chino, mwe muma musandu mwahiana.

⁵ Yeseka yishimi ya tembele, ndama yayo mbandu jisambano; ni utohe wa yipatulo ya ku malumbu, mbandu jiwana, kwa kujingilika tembele.

⁶ Yipatulo ya ku malumbu yapwile mu ngango jitatu yimwe helu lia yikwo; ha ngango makumi atatu, ha ngango makumi atatu. Yanjilile mu yishimi ya zuwo ha yipatulo ya ku malumbu yikakolelemo, kanda yikwata ku yishimi ya zuwo.

⁷ Yipatulo ya ku malumbu yaya nikutoha kwa kujingilika ha ngango ni ngango kwilu, nikulita ni kutoha cha umanyino, ngango ni ngango kwilu. Ku lumbu lia tembele kwakandukile ndondelo, kashika mutu makandukila chize ku ngango ya kushi ndo ku ngango ya kwilu ndusu mu ngango ya hakachi.

⁸ Yingumona nawa tembele yili ni veranda ya kujingilika. Fundamentu ya yipatulo ya ku malumbu yapwile ni cheseko cha lumbungu wa muwundu wa mbandu jisambano jisuku.

⁹ Ndama ya yishimi ya haze lia yipatulo ya ku malumbu yapwile ya mbandu jitano, mba chihanda chize chalisalaho chapwile cha yipatulo ya ku malumbu ya zuwo.

¹⁰ Hakachi ka yipatulo hapwile utohe wa makumi aali a mbandu kweswe kwa kujingilika zuwo.

¹¹ Yikolo ya yipatulo ya ku malumbu yatalikishile ha chihanda cha veranda cha washi; chikolo chimwe ku Norte, chikolo chikwo ku Sule. Utohe wa chihanda chize cha washi wapwile wa mbandu jitano sali ni sali.

¹² Zuwo lize liatalikishile ku yize ya tembele ha sali lia Chitokelo liapwile ni utohe wa makumi shimbiali a mbandu. Ndama ya yishimi ya kujingilika zuwo yapwile ya mbandu jitano; usuhe walio makumi livwa a mbandu.

¹³ Mba yeseka tembele, kulakaji lia mbandu ha usuhe; ni yize ni zuwo ni yishimi yalio kulakaji lia mbandu.

¹⁴ Chikwo nawa utohe wa kulutwe lia tembele ku Chivumbuko ni yize yako, kulakaji lia mbandu.

¹⁵ Mba yeseka usuhe wa zuwo lia kutalikisa ku yize ha sali lia Chitokelo hamwe ni veranda jako sali ni sali, kulakaji lia mbandu. Muchima lia tembele, ni chipatulo cha muchima, ni senge lia haze,

¹⁶ ni yikuli, ni manjanela ja kunjisa, ni veranda ja kujingilika ngango jitatu ja mazuwo ku yikuli, yeswe ya kufuka ni matabua kwa kujingilika chize hashi ndo ku manjanela (manjanela te a kufuka),

¹⁷ ndo ku chipinji helu lia chikolo, chipwe ku chipatulo cha muchima, ni haze. Yishimi yeswe ya kujingilika mu chipatulo cha muchima ni cha haze yapwile ya kulifwa

¹⁸ cha akerupimi ni mingaji ya kwola; te mungaji hakachi ka akerupimi aali. Kerupimi mweswe kali ni mahuma aali:

¹⁹ kutalikisa ku mungaji sali limwe meso ja mutu, ni kutalikisa ku mungaji sali likwo meso ja mwevu wa ndumba. Apwile a kwola ha tembele yeswe kwa kujingilika.

²⁰ Chize hashi ndo helu lia chikolo akerupimi ni mingaji yapwile ya kwola ha yishimi.

²¹ Yikuli ya tembele yapwile ya mbango jiwana; mba kulutwe lia muma musandu kwapwile chuma cha kulifwa ni

²² chilumbilo cha mutondo. Chizundamo chacho mbandu jitatu, usuhe wacho mbandu jiali, ni utohe wacho mbandu jiali. Mbango jacho, ni umanyino wacho, ni malumbu jacho yapwile ya mutondo. Mwe mutu yamba kuli yami ngwenyi, Yino ye mesa yili kumeso ja Yehova.

²³ Ye tembele ni muma musandu te yili ni mapito aali aali.

²⁴ Mapito te kali ni yihanda yiali; pito yiali, pito yiali ya kuya ni kwiza.

²⁵ Ha mapito a tembele hapwile akerupimi ni mingaji ya kwola yize yene yapwile ya kwola ha yishimi. Kwapwile manguji a ndama kulutwe lia senge haze.

²⁶ Kwapwile nawa manjanela a kunjisa ni mingaji sali ni sali ha malumbu ja senge. Chocho yapwile yipatulo ya ku malumbu ya zuwo, ni mikambo ya ndama.