Ezekiel 40 - MUKANDA USANDU WA ZAMBI 1975

¹ Ha mwaka makumi aali ni wamuchitano wa unjize wetu, ha kuputuka mwaka, ha tangwa liamuchikumi lia kakweji, achi ha mwaka kumi ni wamuchiwana chize ku kupupa cha chihunda, he ha tangwa lume, kwoko lia Yehova liapwile hali yami.

² Mu usolwelo wa Zambi liangunehene ku chifuchi cha Izalele ni kungutumbika ha mulundu umwe usuku chikolo, henaho hapwile ngwe kweseka cha chihunda ha sali lia ku Sule.

³ Ha kungutwalako, kumanyi kwapwile umwe lunga, kumutala ngwe kulifwa cha unengu. Kali ni muhipu wa linyu mu kwoko lienyi ni lumbungu wa kweseka nenyi; kanamana mu chikolo.

⁴ Mwe lunga yamba kuli yami ngwenyi, Mwana mutu, tala ni meso je, ivwa ni matwi je, sako mbunge ha yize yeswe mungukulweza, mumu hakuneha kuno hanga ngukulwezecho. Mba cheswe mumona mulumbununa kuli akwa munyachi wa Izalele.

⁵ Kwapwile chipanga-cha-mawe kweswe kwa kujingilika chihela cha tembele. Usuhe wa lumbungu wa kweseka nenyi mu kwoko lia lunga wapwile wa mbandu jisambano. Mbandu yeswe te ya mbandu ni mbanda-kwoko. Chocho yeseka ndama ya chipanga-cha-mawe, lumbungu umuwika; ni usuhe lumbungu umuwika.

⁶ Yanjila mu chikolo cha kutalikisa ku Chivumbuko ni kukandukila ku ndondelo yacho, ni kweseka chikuli cha chikolo, lumbungu umuwika ha ndama yacho,

⁷ ni yipatulo ya ku malumbu, lumbungu umuwika ha usuhe ni lumbungu umuwika ha utohe; ni chipinji hakachi ka yipatulo ya ku malumbu, mbandu jitano, ni chikuli cha chikolo ku senge lia chikolo sali lia muchima, lumbungu umuwika.

⁸ Mba yeseka unjililo wa chikolo, mbandu nake;

⁹ ni yikuli yawo mbandu jiali, ni senge lia chikolo liapwile sali lia muchima.

¹⁰ Kwapwile yipatulo yitatu ya ku malumbu sali ni sali lia chikolo cha ku Chivumbuko; yeswe yitatu ya cheseko chimuwika; manguji ja sali ni sali ja cheseko chimuwika.

¹¹ Mba yeseka usuhe wa unjililo wa chikolo, wapwile wa kumi lia mbandu; ni utohe wa chikolo kumi lia mbandu ni mbandu jitatu.

¹² Kulutwe lia yipatulo ya ku malumbu kwapwile chipinji cha mbandu yimuwika sali lino ni mbandu yimuwika sali lize, ni ye yipatulo yapwile mbandu jisambano sali ni sali.

¹³ Mba yeseka chikolo chize ku fulumba lia chipatulo chimwe cha ku lumbu ndo ku fulumba lia chikwo, utohe wa makumi aali a mbandu ni mbandu jitano chize ku pito ndo ku pito.

¹⁴ Yeseka nawa senge, makumi asambano a mbandu; mba kwa kujingilika unjililo kwapwile ye yize.

¹⁵ Chize kulutwe lia chikolo ku unjililo ndo ku songo lia Senge lia muchima lia chikolo chapwile makumi atano a mbandu.

¹⁶ Chikolo chapwile ni manjanela a kujingilika a kuya nikukehuluka muchima ndo ku manguji jo ja mu yipatulo ya ku malumbu. Senge nawa liapwile ni manjanela kweswe kwa kujingilika muchima. Ha yikuli hapwile mingaji.

¹⁷ Yanguneha ku yize ya haze, kumanyi kwapwile yipatulo, ni hashi te hakwala mawe kwa kujingilika yize; makumi atatu a mazuwo anatalikisa ku mawe a kwala.

¹⁸ Mawe a kwala apalikile ndusu sali lia yikolo nikulita ni usuhe wa yikolo, yono wapwile lwaza wa kwala mawe wa ku mwanda.

¹⁹ Yeseka pinji chize kulutwe lia chikolo cha ku mwanda muchima ndo kulutwe lia haze lia yize ya muchima, kulakaji lia mbandu.

²⁰ Yangutwala ku Norte, kumanyi kwapwile chikolo cha kutalikisa ku Norte, cha mu yize ya haze. Yeseka usuhe wacho ni utohe wacho.

²¹ Yipatulo yacho ya ku malumbu, sali yitatu, sali yitatu, ni manguji jacho, ni senge liacho te ya cheseko chimuwika ni chikolo chitangu. Usuhe wacho wa makumi atano a mbandu, ni utohe wacho wa makumi aali a mbandu ni mbandu jitano.

²² Ni manjanela jacho, ni senge liacho, ni mingaji yacho, yeswe ya cheseko chimuwika ni yize ya chikolo cha kutalikisa ku Chivumbuko. Kwapwile ndondelo shimbiali ja kukandukilako, ni senge liacho liapwile muchima.

²³ Hatalanganyi ni chikolo cha ku Norte kwapwile chikolo cha kuya ku yize ya muchima chimuwika ni sali lia ku Chivumbuko. Yeseka chize ku chikolo ndo ku chikolo, kulakaji lia mbandu.

²⁴ Yangutwala ku sali lia ku Sule, kumanyi kwapwile chikolo cha ku Sule. Yeseka manguji jacho ni senge liacho; chimuwika yili ni yikwo.

²⁵ Kwapwile manjanela kwa kuchijingilika ni mu senge liacho nawa amuwika ni akwo. Usuhe wako makumi atano a mbandu, ni utohe wako makumi aali a mbandu ni mbandu jitano.

²⁶ Kwapwile ndondelo shimbiali ja kukandukilako, ni senge liacho liapwile muchima. Kwapwile mingaji ha manguji, ukwo sali lino ukwo sali lize.

²⁷ Kwapwile chikolo ha sali lia ku Sule lia yize ya muchima. Yeseka chize ku chikolo ndo ku chikolo ku Sule, kulakaji lia mbandu.

²⁸ Yanguneha ku yize ya muchima ku chikolo cha ku Sule; yeseka chikolo cha ku Sule, necho chimuwika ni yikwo.

²⁹ Ni yipatulo yacho ya ku malumbu, ni manguji jacho, ni senge liacho, yeswe ni cheseko chimuwika ni yikwo. Kwapwilemo manjanela kwa kuchijingilika ni mu senge liacho. Usuhe wacho wa makumi atano a mbandu, ni utohe wacho wa makumi aali a mbandu ni mbandu jitano.

³⁰ Kwapwile masenge kwa kujingilika, usuhe makumi aali a mbandu ni mbandu jitano, ni utohe mbandu jitano.

³¹ Senge liako liatalikishile ku yize ya haze. Liapwile ni mingaji ha manguji jacho, ni ndondelo jacho ja kukandukilako nake.

³² Yanguneha ku yize ya muchima ha sali lia Chivumbuko; yeseka chikolo chako, chimuwika ni yikwo.

³³ Ni yipatulo yacho ya ku malumbu, ni manguji jacho, ni senge liacho, cheseko chimuwika ni yikwo. Kwapwilemo manjanela kwa kujingilika ni mu senge liacho. Usuhe wacho wa makumi atano a mbandu, ni utohe wacho wa makumi aali a mbandu, ni mbandu jitano.

³⁴ Senge liako Katalikishile ku yize ya haze; liapwile ni mingaji ha manguji jacho, ukwo sali ukwo sali, ni ndondelo jacho ja kukandukilako nake.

³⁵ Yanguneha ku chikolo cha ku Norte; yacheseka; chapwile chimuwika ni yikwo.

³⁶ Ni yipatulo yacho ya ku malumbu, ni manguji jacho, ni senge liacho, cheseko chimuwika ni yikwo. Kwapwilemo manjanela kweswe kwa kujingilika; usuhe wacho wa makumi atano a mbandu, ni utohe wacho wa makumi aali a mbandu ni mbandu jitano.

³⁷ Senge liacho Katalikishile ku yize ya haze; kwapwile mingaji ha manguji jacho, ukwo sali ukwo sali, ni ndondelo ja kukandukilako nake.

³⁸ Kwapwile chipatulo ni chikolo chacho mu senge Ka chikolo muze te makosela mulambu wa kulumba.

³⁹ Mu senge Ka chikolo mwapwile mesa jiali sali, mesa jiali sali, haze mashihila mulambu wa kulumba, ni mulambu ha shili, ni mulambu ha uhie.

⁴⁰ Haze Ka senge ku unjililo wa chikolo cha ku Norte kwapwile mesa jiali; mba sali lize Ka senge Ka chikolo kwapwile mesa jiali.

⁴¹ Sali Ka muchima kwapwile mesa jiwana ni sali Ka haze kwapwile mesa jiwana ku lumbu Ka chikolo, jeswe mesa nake, haze mashihila yitapo.

⁴² Kwapwile nawa mesa jiwana ja mawe a kupula ha mulambu wa kulumba, usuhe wajo mbandu ni chihanda cha ha muchima, ni utohe wajo mbandu ni chihanda cha ha muchima, ni Chizundamo mbandu yimuwika, kuze masela yikungo ya kushiha nayo mulambu wa kulumba ni yitapo.

⁴³ Kwapwile tuzambu twa kukolesa kwa kujingilika muchima, cheseko cho cha usuhe, mbanda-kwoko. Mba ha mesa matulikila yifwo ya milambu.

⁴⁴ Yanguchiza haze, yangutwala mu yize ya muchima. Kumanyi mwapwile yipatulo yiali mu yize ya muchima; chimwe sali Ka chikolo cha ku Norte chinatalikisa ku Sule; chikwo sali lia chikolo cha ku Sule chinatalikisa ku Norte.

⁴⁵ Yamba kuli yami ngwenyi, Chipatulo chino chatalikisa ku Sule, cha asasendote waze akufunga tembele,

⁴⁶ ni chipatulo chatalikisa ku Norte, cha asasendote waze akufunga chilumbilo; o ana ja Zadoke, o wika hakachi ka ana ja Levi mahasa kukundama kuli Yehova nikumuvumbika.

⁴⁷ Yeseka yize; usuhe wayo kulakaji lia mbandu, ni utohe wayo kulakaji lia mbandu, chimuwika sali ni sali; ni chilumbilo, chapwile kulutwe lia tembele.

⁴⁸ Yanguneha ku senge lia tembele; yeseka manguji ja senge, sali mbandu jitano, sali mbandu jitano. Utohe wa chikolo wapwile wa kumi lia mbandu in mbandu jiwana; mba yipanga ya chikolo yapwile ya mbandu jitatu sali ni sali.

⁴⁹ Usuhe wa senge wapwile wa makumi aali a mbandu, ni utohe kumi lia mbandu ni mbandu yimuwika, ni kumi lia makandu atwalileko, kwapwile manguji sali ni sali lia yikuli.