Ezekiel 4 - MUKANDA USANDU WA ZAMBI 1975

¹ Alioze yena mwana mutu, anda ndope Ukayise kumeso je, ukesekeho chihunda, Yerusaleme.

² Esekako tuposhi twa jita, tungako chipanga cha kuseleka, lumbikako mulumba wa kulimika nacho, sako yilombo ya kulimika nacho, sako nawa makina ja kupupa kweswe kwa kujingilika.

³ Anda shapa ya utale Ukayise ngwe chipanga cha utale hakachi ka yena ni chihunda. Talikisako meso je, chikapwe cha kuseleka, ukashinjike jita ya kuseleka. Chino muchipwa chilayi ku munyachi wa Izalele.

⁴ Hipomba ha pachi je ja chimeso, ngukase hali yena uhenge wa munyachi wa Izalele. Nikulita ni matangwa aze mupombelako chocho mukambata uhenge wo.

⁵ Mumu ngunakusela matangwa a kwalula, kulakaji atatu ni makumi livwa a matangwa nikulita ni miaka ya uhenge wo. Chocho mukambata uhenge wa munyachi wa Izalele.

⁶ Muze hiwamana wano mukapomba chisuho chamuchiali ha pachi ja chindume Ukambate uhenge wa munyachi wa Yunda. Ngunakusela makumi awana a matangwa; ha mwaka, tangwa limuwika; ha mwaka, tangwa limuwika.

⁷ Mukatalikisa meso je ku kuseleka cha Yerusaleme, ni kwoko lie lia kufukula, ukaprofeteze kulimika ni chihunda.

⁸ Mba mungukusa mihipu, chocho kuchi kahasa kwalumuka sali limwe ni sali likwo ndo hiwamana matangwa je ja kuseleka.

⁹ Ni yena, anda tiliku ni sevada, ni makunde, ni landa, ni chivwale, ni masangu, Ukayise mu chikwachilo chimuwika ukalinge nayo yandanda. Ndusu matangwa a kwalula aze mupomba ha pachi je, kulakaji atatu ni makumi livwa a matangwa mukayilia.

¹⁰ Kulia chize muolia muchipwa cha kupezalisa, makumi aali a shekele ha tangwa; kamuwika ha tangwa muchilia.

¹¹ Ni meya muonwa makapwa a kuzonga; chihanda chamuchisambano cha hine. Muonwa kamuwika ha tangwa.

¹² Mukachilia ngwe chandanda cha sevada. Mukachocha kumeso jo ha tuji ja atu.

¹³ Yehova yamba ngwenyi, Chocho A-Izalele makalia mbolo yo ya luchisa hakachi ka mavungu kuze mungwahumina.

¹⁴ Yingwamba ngwami, Mwene Yehova! Kanda nguchilichisa. Chize ku ukweze wami ndo haliapwila kanda nguchilia kama yifwo ya kulifwila, hanji ya kupapulula kuli ngongo. Chipwe yifwo ya luchisa kanda yinjila kama mu kanwa liami.

¹⁵ Aye yamba kuli yami ngwenyi, Nyi chocho hinakwaha pinga ja ngombe kusalakana tuji ja atu ha kwochelaho mbolo ye.

¹⁶ Yamba kuli yami nawa ngwenyi, Mwana mutu, mungumakuna mulumbu wa mbolo mu Yerusaleme. Makalia mbolo ha pezu, ni woma. Makanwa meya a kuzonga nikulishimwoka.

¹⁷ Chino munguchilinga hanga akahone mbolo ni meya, akatale umwe kuli mukwo nikulishimwoka, nikupokieka ni uhenge wo.