Ezekiel 39 - MUKANDA USANDU WA ZAMBI 1975

¹ Ni yena mwana mutu, profeteza kulimika ni Ngoke wambe ngwe, Mwene Yehova kanambe ngwenyi, Kunalimika ni yena Ngoke mwe mulemu mukwa lutwe wa Mesheke ni Tupale,

² kashika mungukakwalumuna, ni kukusenyesa kulutwe, ni kukuchiza ku songo lia ku Norte, ni kukukoka ulimike ni milundu ya Izalele.

³ Mba mungukakapula uta we ku kwoko lie lia chimeso, ni kukuholola mivu ye ku kwoko lie lia chindume.

⁴ Kumukalimbukila ha milundu ya Izalele ni yena ni yihuji ye yeswe ni mavungu aze eswe uli no. Mungukakuhana kuli tujila a milali yeswe akulia yifwo, ni kuli tushitu asasu, akakulie.

⁵ Kumakalimbuka mwe mu yambu mumu yami hinachamba. Chocho kanambe Mwene Yehova.

⁶ Mungukatuma kahia ha Mangoke ni hali waze anatwama ni chipi chakuhi mu yifuchi ya mbaka, mba kumakanyingika yami nguli Yehova.

⁷ Mungukanyingikisa jina liami lisandu hakachi ka atu jami A-Izalele. Chichi katayiza jina liami lisandu akalijilule nawa, mba mavungu makanyingika yami nguli Yehova, mwe Musandu mu Izalele.

⁸ Nyingikenu ngwami, Kuchineza, kumuchikapwa. Chocho kanambe Mwene Yehova. Lie tangwa lino liene te hinamba.

⁹ Mba waze atwama mu yihunda ya Izalele makatuhuka nikuwika majiko ja yuma ya jita nikuyocha; kepwe jinene ni jikepe, ni mata ni mivu, ni makunga ehi ni makunga asuku. Kumakayitenga kunyi ha miaka shimbiali,

¹⁰ chocho kechi kafupa kunyi ja mu yambu, chipwe kujichá mu musenge, mumu matenga kunyi ye yuma ya jita. Makapupa waze aapupile nikupunda upite wa waze apunjile niwo. Chocho kanambe Mwene Yehova.

¹¹ Ha tangwa lize munguhana kuli Ngoke kuma kwenyi kwa kumufunda mu Izalele, Chana cha Ngeji, sali lia kalunga-lwiji ku Chivumbuko. Muchikakwika ngeji mumu kwenako Ngoke ni chihuji chenyi cheswe makaafunda, mba makatukako ngwo, Chana cha Hamone-ngoke.

¹² Akwa munyachi wa Izalele makapwa tukweji shimbiali ha kwafunda hanga akapemese chifuchi.

¹³ Akwa chifuchi eswe makafunda A-Ngoke, mba muchikapwa cha kwalemesa ha tangwa lize mungukasolola uhenya wami. Chocho kanambe Mwene Yehova.

¹⁴ Makasela malunga kupalika chifuchi cheswe tangwa ha tangwa nikutanda waze hasala helu lia mavu akachipemese. Ha songo lia tukweji shimbiali makahengula chocho.

¹⁵ Muze wano makapalika mu chifuchi mba umwe mawana chifwaha cha mutu, mamikako chinyingi ndo tufunde machifunda mu Chana cha Hamonengoke.

¹⁶ (Chihunda Hamona chiliko nawa.) Chocho makapemesa chifuchi.

¹⁷ Ni yena mwana mutu, Mwene Yehova kanambe ngwenyi, Hanjika ni milali yeswe ya tujila, ni kuli tushitu eswe a mu yambu ngwe, Swenu nwize; kungulukenu ku malumbu eswe ku chiwanyino chize ngunanulingila; chiwanyino chinene ha milundu ya Izalele, mba munukalia yifwo ni kunwa manyinga.

¹⁸ Munukalia yifwo ya akwa ndundo, munukanwa manyinga ja alemu a hashi—ja kuji a mapanga, ni ana-mapanga, ni pembe, ni kuji a ngombe, eswe akwa maji a ku Mbashane.

¹⁹ Munukalia maji ndo hinwakuta; munukanwa manyinga ndo hinwazengewa, ku chiwanyino chize ngunanululikila.

²⁰ Ku mesa yami munukakuta ni tuvwalu ni akwa kwaendesa, ni akwa ndundo ni tujita twa milali yeka ni yeka. Chocho kanambe Mwene Yehova.

²¹ Mba mungukasa uhenya wami hakachi ka mavungu, ni mavungu eswe makamona upatwilo wami uze hinalinga, ni kwoko liami lize hinasa hali ayo.

²² Akwa munyachi wa Izalele makanyingika yami nguli Yehova Zambi yo chize ku tangwa lize ni kulutwe.

²³ Ni mavungu makanyingika ngwo, Akwa munyachi wa Izalele ayile ku ufunge mumu ha uhenge wo, mumu ha kulinga ni yami ni mafwefwe, chocho naaswekelele meso jami nikwahana kuli akwa kole jo; eswe afwile ni katana.

²⁴ Nalingile no nikulita ni luchisa wo ni milonga yo, ni kwaswekela meso jami.

²⁵ Kashika Mwene Yehova kanambe ngwenyi, Haliapwila mungukahilwisa kuwaha cha Yakomba, mungukavwila keke munyachi weswe wa Izalele. Mungukevwa ukwa ha jina liami lisandu.

²⁶ Kumakavulama sonyi jo, ni mafwefwe aze eswe angulingile, muze makatwama kawape mu chifuchi cho ni yoze maavwisa woma wakuhi;

²⁷ muze hinaachiza hakachi ka mavungu ni ku yifuchi ya akwa kole jo, muze hinasolola usandu wami muli ayo kumeso ja mavungu anji.

²⁸ Henaho makanyingika yami nguli Yehova Zambi yo mumu naatumine ku unjize hakachi ka mavungu, mba naakungile nawa ku chifuchi cha ayo ene. Chichi kahichika niumwe akasale hakachi ka mavungu nawa.

²⁹ Chichi kaaswekela nawa meso jami muze mungukazukula Spiritu yami hali akwa munyachi wa Izalele. Chocho kanambe Mwene Yehova.