Ezekiel 38 - MUKANDA USANDU WA ZAMBI 1975

¹ Liji lia Yehova yiliza kuli yami ngwe nyi,

² Mwana mutu, talikisa meso je ku Ngoke, wa mu chifuchi cha Mangoke, mwe mulemu mukwa lutwe wa Mesheke ni Tupale, ukaprofeteze kulimika nenyi ngwe,

³ Mwene Yehova kanambe ngwenyi, Nyingika, kunalimika ni yena Ngoke, mwe mulemu, mukwa lutwe wa Mesheke ni Tupale.

⁴ Mungukakwalumuna; mungukasa tuzambu mu mbangachi je ni kukukoka haze, ni tujita twe eswe, ni tuvwalu ni akwa kwendesa tuvwalu, eswe a kuzala utale, mbunga yinene, eswe ni kepwe jinene ni jikepe, nikukwata tutana.

⁵ Ni Persia, ni Etiopia, ni Pute hamuwika, eswe ni kepwe ni ngalau;

⁶ ni Ngome ni yihuji yenyi yeswe; ni Mbete-Tokama wa ku songo lia ku Norte ni yihuji yenyi yeswe—mavungu anji uli no.

⁷ Ulilulike, upwe wa kululika, ni yena ni yihuji ye yize hiyinalikungulula kuli yena, upwe kalayi ko.

⁸ Kulutwe lia matangwa anji makakukungulula; ha miaka ya kusula mukaya kulimika ni chifuchi chize hanachihwimisa ku jita ni kuchilulika; chifuchi kuze e atu haakonga ku mavungu anji ku milundu ya Izalele kuze kwapwile te puya ya miaka. Atu jako aachijile hakachi ka mavungu mba haliapwila kanatwama ni chipi kuchishiko—e eswe lume.

⁹ Yena musenya kulutwe ni kwiza ngwe kangonga. Kumuopwa ngwe lelwa lia kufuka chifuchi, yena ni yihuji ye yeswe, ni mavungu anji hamwe ni yena.

¹⁰ Mwene Yehova kanambe ngwenyi, Ha tangwa lize manyonga makeza mu mutwe we, ni yena mukataka chuma chipi,

¹¹ ukambe ngwe, Mimguya kulimika ni chifuchi cha yihunda kuyishi yipanga-ya-mawe. Munguhulumukina hali atu ahwima waze anatwama ni chipi chakuhi, eswe kanatwama keshi ni yipanga-ya-mawe, chipwe njalo, chipwe mapito,

¹² ngukalambule upite wa jita ni kumbata yuma ya kupunda; ngukase jita ni yihela yapwile te puya alioze haliapwila ni atu jayo, ni atu aze aakongele ku mavungu, mba hapita yimuna ni upite, waze atwama he ha muchima lia hashi.

¹³ Mba Shipa ni Ndetane ni akwa kutalika a ku Tashi ni mievu ja ndumba jako makamba kuli yena ngwe, Kuma, hiweza kutambula upite wa jita, Ukambate yuma ya kupunda, kumbata prata, ni oru, kumbata yimuna ni yikumba, kupunda upite wunji?

¹⁴ Kashika yena mwana mutu, profeteza wambe kuli Ngoke ngwe, Mwene Yehova kanambe ngwenyi, Ha tangwa lize muze atu jami A-Izalele kanatwama, ni chipi chakuhi, yena mukalisunga,

¹⁵ ukatuke kuma kwe ku songo lia ku Norte, ni yena ni mavungu anji hamuwika, eswe anende hali tuvwalu, chihuji chinene, tujita a ndundo.

¹⁶ Mukeza kulimika ni atu jami A-Izalele, ngwe lelwa lia kufuka chifuchi. Ha matangwa a kusula mungukakukoka ulimike ni chifuchi chami hanga mavungu ukangunyingike muze mungukasolola usandu wami muli yena Ngoke kumeso jo.

¹⁷ Mwene Yehova kanambe ngwenyi, Yena uli mwe mutu natongwele ha shakulu ku makanwa ja tuvumbi twami aprofeta ja Izalele. Te ha matangwa aze aprofetezele miaka ngwo, Yehova makakukoka ukalimike no.

¹⁸ Alioze ha tangwa lize muze Ngoke meza kulimika ni chifuchi cha Izalele, Mwene Yehova kanambe ngwenyi, Ufwatulo wami muukakasumuka.

¹⁹ Mumu ni ukwa wami, ni ufwatulo wami wa kulekwoka ngunambe ngwami, Ha tangwa lize kumukukapwa minyiko yinene mu chifuchi cha Izalele.

²⁰ Yishi a mu kalunga-lwiji, ni tujila a mu tetela, ni tushitu a mu yambu, ni tututu eswe akukalala ha mavu, ni atu aze eswe atwama hashi, eswe makachikima kumeso jami. Makanunguna milundu, ni kuze kwachikuluka mukukapuzuka, ni yipanga yeswe ya mawe muyikalimbuka hashi.

²¹ Mungukasanyika katana kulimika nenyi mweswe mu milundu yami. Mwene Yehova kanambe ngwenyi, Katana ka mutu mweswe makalimika ni mukwo.

²² Mungukaputuka kusopa nenyi ni yilungo ni manyinga a kumwanga. Mungukanokesa hali iye ni yihuji yenyi, ni mavungu aze anji ali no, vula munji, ni chiwe, ni kahia, ni fundanga.

²³ Chocho mungukasolola unene wami ni usandu wami, ni kulisolola yami mwene kumeso ja mavungu anji. Henaho makanyingika yami nguli Yehova.